പുറത്ത് ചൂട് കൂടുന്ന വേനൽക്കാലത്ത് ഫ്രിജിന് ഇരട്ടി പണിയെടുക്കേണ്ടി വരും. എന്തുകൊണ്ടാണ് ഫ്രിജ് പൊട്ടിത്തെറിക്കുന്നതെന്നും, അത് ഒഴിവാക്കാനും ഫ്രിജ് വൃത്തിയായി സൂക്ഷിക്കാനും നമ്മൾ എന്തൊക്കെ ശ്രദ്ധിക്കണമെന്നും നോക്കാം.ഫ്രിജിന്റെ പിൻഭാഗത്തുള്ള കംപ്രസ്സർ ആണ് പ്രധാന വില്ലൻ. ഫ്രിജിനുള്ളിലെ ചൂട് പുറത്തേക്ക് കളഞ്ഞ് തണുപ്പ് നിലനിർത്തുന്നത് കംപ്രസ്സറും അതിനോട് ചേർന്നുള്ള കോയിലുകളും ചേർന്നാണ്.
പുതിയ കാലത്തെ ഫ്രിജുകളിൽ പരിസ്ഥിതിക്ക് ദോഷം ചെയ്യാത്ത ഐസോബ്യൂട്ടെയ്ൻ പോലെയുള്ള ഗ്യാസുകളാണ് ഉപയോഗിക്കുന്നത്. ഇവയ്ക്ക് തീപിടിക്കാൻ സാധ്യത കൂടുതലാണ്. കംപ്രസ്സറിനോ പൈപ്പുകൾക്കോ തകരാറുണ്ടായി ഗ്യാസ് ചോരുകയും, ആ സമയത്ത് പ്ലഗ്ഗിൽ നിന്നോ മറ്റോ ഒരു ചെറിയ തീപ്പൊരി ഉണ്ടാകുകയും ചെയ്താൽ പൊട്ടിത്തെറി നടക്കാം.
ഫ്രിജിന് പുറകിലെ കോയിലുകളിൽ അമിതമായി പൊടിപിടിച്ചിരുന്നാലോ, ഫ്രിജ് ചൂടായിട്ടും അത് തണുക്കാൻ അനുവദിക്കാതെ കംപ്രസ്സർ തുടർച്ചയായി പ്രവർത്തിച്ചാലോ പൊട്ടിത്തെറിക്കാൻ സാധ്യതയുണ്ട്.
1. വായുസഞ്ചാരം പ്രധാനം
ഫ്രിജ് ഒരിക്കലും ഭിത്തിയോട് ചേർത്ത് ഒട്ടിച്ച് വെക്കരുത്. പുറകിലും വശങ്ങളിലും കുറഞ്ഞത് 4 മുതൽ 6 ഇഞ്ച് വരെ അകലം നൽകണം. കംപ്രസ്സർ പുറന്തള്ളുന്ന ചൂട് എളുപ്പത്തിൽ പോയിക്കിട്ടാൻ ഇത് അത്യാവശ്യമാണ്.
2. ചൂടുള്ള ഭക്ഷണം വെക്കരുത്
ഗ്യാസിൽ നിന്ന് വാങ്ങിയ ഉടനെ ചൂടുള്ള കറികളോ പാലോ ഫ്രിഡ്ജിൽ എടുത്തുവെക്കുന്ന ശീലമുണ്ടോ? എങ്കിൽ അത് ഉടൻ മാറ്റുക. ചൂടുള്ള ഭക്ഷണം വെക്കുമ്പോൾ ഫ്രിജിനുള്ളിലെ താപനില പെട്ടെന്ന് കൂടുകയും, ഇത് കംപ്രസ്സറിന് അമിത ഭാരമാവുകയും ചെയ്യും. ഭക്ഷണം നന്നായി തണുത്ത ശേഷം മാത്രം ഫ്രിജിൽ വെക്കുക.
3. ഫ്രിജിന് മുകളിൽ സാധനങ്ങൾ വെക്കരുത്
ഫ്രിജിന്റെ മുകൾഭാഗം ഒരു അലമാര പോലെ ഉപയോഗിക്കുന്നവരുണ്ട്. മിക്സിയുടെ ജാർ, ന്യൂസ്പേപ്പർ, തുണികൾ എന്നിവയൊന്നും ഫ്രിഡ്ജിന് മുകളിൽ വെക്കരുത്. ഇത് ചൂട് പുറത്തുപോകുന്നതിനെ തടസ്സപ്പെടുത്തും.
4. വോൾട്ടേജ് വ്യതിയാനം
കറന്റ് പോയി വരുമ്പോൾ പെട്ടെന്നുണ്ടാകുന്ന വോൾട്ടേജ് വ്യതിയാനം ഫ്രിജിന്റെ കംപ്രസ്സറിനെ ബാധിക്കാം. ഇൻബിൽറ്റ് സ്റ്റെബിലൈസർ ഇല്ലാത്ത പഴയ ഫ്രിജുകൾക്ക് നിർബന്ധമായും നല്ലൊരു സ്റ്റെബിലൈസർ ഉപയോഗിക്കുക.
5. ഐസ് കുത്തിയിളക്കരുത്
ഡീഫ്രോസ്റ്റ് ചെയ്യാൻ മടികാണിച്ച്, ഫ്രീസറിൽ കട്ടപിടിച്ചിരിക്കുന്ന ഐസ് കത്തി വച്ചോ കൂർത്ത കമ്പി വെച്ചോ കുത്തിയിളക്കുന്ന ശീലം വളരെ അപകടമാണ്. ഇത് ഗ്യാസ് ട്യൂബ് പൊട്ടി ഗ്യാസ് ലീക്കാവാൻ കാരണമാകും
ഫ്രിജിൽ നിന്ന് എപ്പോഴും അസാധാരണമായ വലിയ ശബ്ദം കേൾക്കുക, ഫ്രിജിന്റെ വശങ്ങളിൽ തൊടുമ്പോൾ പൊള്ളുന്നതുപോലെ ചൂട് തോന്നുക, ഉള്ളിൽ ആവശ്യത്തിന് തണുപ്പ് കിട്ടാതിരിക്കുക എന്നിങ്ങനെയുള്ള ലക്ഷണങ്ങൾ കണ്ടാൽ ഉടൻ തന്നെ ഒരു മെക്കാനിക്കിനെ വിളിച്ച് കാണിക്കാൻ ശ്രദ്ധിക്കുക. പത്ത് പതിനഞ്ച് വർഷത്തിലധികം പഴക്കമുള്ള ഫ്രിജ് ആണെങ്കിൽ അത് മാറ്റി പുതിയത് വാങ്ങുന്നതാണ് സുരക്ഷയ്ക്കും പോക്കറ്റിനും നല്ലത്.
