മുംബൈ: അന്തരിച്ച മഹാരാഷ്ട്ര ഉപമുഖ്യമന്ത്രി അജിത് പവാറിന്റെ സീറ്റില് മത്സരമില്ലാതെ ഭാര്യയും ഇപ്പോള് മഹാരാഷ്ട്ര ഉപമുഖ്യമന്ത്രിയുമായ സുനേത്ര പവാര് വിജയിക്കും. സുനേത്രയ്ക്കെതിരെ മത്സരിക്കുമെന്ന് തീരുമാനിച്ച കോണ്ഗ്രസ് ഒടുവില് ബിജെപി മുഖ്യമന്ത്രി ഫഡ് നാവിസും എന്സിപിയും നടത്തിയ അഭ്യര്ത്ഥനകള് മാനിച്ച് സ്ഥാനാര്ത്ഥിയെ പിന്വലിച്ചു.
ഏപ്രില് 23നായിരുന്നു ഉപതെരഞ്ഞെടുപ്പ് നടത്താന് നിശ്ചയിച്ചിരുന്നത്. എന്നാല് അതിന് മുന്പേ എതിര് സ്ഥാനാര്ത്ഥികള് ആരും ഇല്ലാത്ത സ്ഥിതിക്ക് സുനേത്ര പവാര് ഇവിടെ വിജയിച്ചു കഴിഞ്ഞു. ഇനി ഔദ്യോഗിക പ്രഖ്യാപനം വരണമെന്ന് മാത്രം.
2026ന്റെ തുടക്കത്തില് വിമാനാപകടത്തില് ബിജെപി നേതൃത്വത്തിലുള്ള സര്ക്കാരിലെ ഉപമുഖ്യമന്ത്രിയായിരുന്ന അജിത് പവാര് കൊല്ലപ്പെട്ടതിനെ തുടര്ന്നാണ് ബാരാമതിയില് ഉപതെരഞ്ഞെടുപ്പ് വേണ്ടിവന്നത്. തുടര്ന്ന് 72 മണിക്കൂറിനുള്ളില് ഭാര്യ സുനേത്ര പവാറിനെ ഉപമുഖ്യമന്ത്രിയായി തെരഞ്ഞെടുത്തിരുന്നു.
എന്തായാലും ബാരാമതിയില് സ്ഥാനാര്ത്ഥിയെ നിര്ത്തും എന്ന പിടിവാശിയിലായിരുന്നു കോണ്ഗ്രസ്. പക്ഷെ ബിജെപി മുഖ്യമന്ത്രി ദേവേന്ദ്ര ഫഡ്നാവിസിന് പുറമെ എന്സിപി നേതാവ് ശരദ് പവാര്, മകള് സുപ്രിയ സുലെ എന്നിവര് കോണ്ഗ്രസിനോട് സ്ഥാനാര്ത്ഥിയെ പിന്വലിക്കാന് ആവശ്യപ്പെടുകയായിരുന്നു.
സ്ഥാനാര്ത്ഥിയെ പിന്വലിക്കുന്നതിന് മുന്പ് കോണ്ഗ്രസ് ദേശീയ പ്രസിഡന്റ് ഖാര്ഗെയും സുനേത്രപവാറും തമ്മില് കൂടിക്കാഴ്ച നടത്തിയിരുന്നു.
