വിശദവിവരങ്ങള് www.joinindiannavy.gov.in ല്
അവിവാഹിതരായ പുരുഷന്മാര്ക്കും വനിതകള്ക്കും അവസരം
യോഗ്യത- മാത്സ്, ഫിസിക്സ് വിഷയങ്ങളോടെ പ്ലസ്ടു/എന്ജിനീയറിങ് ഡിപ്ലോമ/എസ്എസ്എല്സി/തത്തുല്യം (50% മാര്ക്കില് കുറയരുത്)
നാവികസേനയില് അവിവാഹിതരായ പുരുഷന്മാര്ക്കും വനിതകള്ക്കും അഗ്നിവീര് തസ്തികയില് നിയമനത്തിന് അപേക്ഷിക്കാം. ഓണ്ലൈനില് ഏപ്രില് 6 വൈകിട്ട് 5 മണിവരെ അപേക്ഷ സ്വീകരിക്കും. വിശദവിവരങ്ങള്
www.joinindiannavy.gov.in- ല് ലഭിക്കും. 01/2027, 02/2027 എന്നിങ്ങനെ രണ്ട് ബാച്ചുകളിലേക്കാണ് സെലക്ഷന്.
യോഗ്യത: അഗ്നിവീര് (എസ്എസ്ആര്) സീനിയര് സെക്കന്റ് റിക്രൂട്ട്- മാത്തമാറ്റിക്സ്, ഫിസിക്സ് വിഷയങ്ങളോടെ പ്ലസ്ടു/ഹയര് സെക്കന്ററി/തത്തുല്യ ബോര്ഡ് പരീക്ഷ മൊത്തം 50 ശതമാനം മാര്ക്കില് കുറയാതെ വിജയിച്ചിരിക്കണം. അല്ലെങ്കില് ത്രിവത്സര എന്ജിനീയറിങ് അംഗീകൃത ഡിപ്ലോമ (മെക്കാനിക്കല്/ഇലക്ട്രിക്കല്/ഓട്ടോമൊബൈല്സ്/കമ്പ്യൂട്ടര് സയന്സ്/ഇന്സ്ട്രുമെന്റേഷന് ടെക്നോളജി/ഐടി) 50 ശതമാനം മാര്ക്കോടെ പാസായിരിക്കണം.
അഗ്നിവീര് (എംആര്) മെട്രിക് റിക്രൂട്ട്- എസ്എസ്എല്സി/തത്തുല്യ ബോര്ഡ് പരീക്ഷ 50% മാര്ക്കോടെ പാസായിരിക്കണം.
സീനിയര് സെക്കന്ററി റിക്രൂട്ട് (മെഡിക്കല്)- ഫിസിക്സ്, കെമിസ്ട്രി, ബയോളജി വിഷയങ്ങളോടെ ഹയര് സെക്കന്ററി/പ്ലസ്ടു/തത്തുല്യ പരീക്ഷ മൊത്തം 50% മാര്ക്കില് കുറയാതെ വിജയിച്ചിരിക്കണം. ഈ ഓരോ വിഷയത്തിനും 40% മാര്ക്കുണ്ടാകണം. (പുരുഷന്മാര്ക്കാണ് അവസരം).
പ്രായപരിധി- അഗ്നിവീര് 01/2027 ബാച്ചിലേക്ക് 2004 ഡിസംബര് ഒന്നിനും 2009 മേയ് 31 നും മധ്യേ ജനിച്ചവരാകണം. 02/2027 ബാച്ചിലേക്ക് 2005 മേയ് ഒന്നിനും 2009 ഒക്ടോബര് 31 നും മധ്യേ ജനിച്ചവര്ക്ക് അപേക്ഷിക്കാം.
വിശദമായ യോഗ്യതാ മാനദണ്ഡങ്ങളും അപേക്ഷിക്കേണ്ട രീതിയും സെലക്ഷന് നടപടികളും ശമ്പളവും ആനുകൂല്യങ്ങളുമെല്ലാം വെബ്സൈറ്റിലെ വിജ്ഞാപനത്തിലുണ്ട്. അപേക്ഷകര്ക്ക് മെഡിക്കല്, ഫിസിക്കല് ഫിറ്റ്നസുണ്ടായിരിക്കണം.അപേക്ഷാ/പരീക്ഷാ ഫീസ് 550 രൂപ.
ഇന്ത്യന് നേവി, എന്ട്രന്സ് ടെസ്റ്റ്, കായികക്ഷമതാ പരീക്ഷ വഴി തെരഞ്ഞെടുക്കപ്പെടുന്നവര്ക്ക് 4 വര്ഷത്തേക്കാണ് നിയമനം.
ആദ്യവര്ഷം പ്രതിമാസം 30,000 രൂപയും രണ്ടാം വര്ഷം 33,000 രൂപയും മൂന്നാം വര്ഷം 36,500 രൂപയും നാലാം വര്ഷം 40,000 രൂപയും ശമ്പളമുണ്ട്. ഇതില് 30% കോര്പ്പസ് ഫണ്ടിലേക്ക് പിടിക്കും. സേവന കാലാവധി പൂര്ത്തിയാക്കി പിരിഞ്ഞുവരുമ്പോള് 10.04 ലക്ഷം രൂപ സേവാനിധിയായി നല്കും. ഗ്രാറ്റുവിറ്റിയോ പെന്ഷനോ ലഭിക്കില്ല.
