ദക്ഷിണേന്ത്യൻ സിനിമയിലെ മുൻനിര നായകന്മാരിൽ ഒരാളായ വിജയ് സേതുപതിക്ക് ലോകമെമ്പാടും ആരാധകരുണ്ട്. അദ്ദേഹത്തിന്റെ ഏറ്റവും പുതിയ ചിത്രം ‘ഗാന്ധി ടോക്സ്’ 2026 ജനുവരി 30-നാണ് തിയേറ്ററുകളിലെത്തിയത്, ഒടിടി പ്ലാറ്റ്ഫോമിലും ചിത്രം റിലീസ് ചെയ്യാനിരിക്കുകയാണ്. വ്യക്തിജീവിതത്തിലേക്കു വന്നാൽ, 2003-ലാണ് വിജയ് സേതുപതി ഭാര്യ ജെസ്സിയെ വിവാഹം ചെയ്യുന്നത്. ഓൺലൈനിലൂടെ പരിചയപ്പെട്ട ഇരുവരും പിന്നീട് പ്രണയത്തിലാവുകയായിരുന്നു.
താൻ സിനിമയിൽ അഭിനയിക്കുന്നതിനോട് ഭാര്യക്ക് തീരെ താത്പര്യമുണ്ടായിരുന്നില്ലെന്ന് അദ്ദേഹം ഒരിക്കൽ പറഞ്ഞിട്ടുണ്ട്. അതിന്റെ പേരിൽ ഭാര്യ ജെസ്സി ഒരിക്കൽ അദ്ദേഹത്തോട് ദേഷ്യപ്പെട്ട്, വീടുവിട്ട് ഇറങ്ങിപ്പോവുകപോലും ചെയ്തു.
ടിവി ഷോയിൽ പങ്കെടുക്കവേയാണ്, അഭിനയമെന്ന തന്റെ സ്വപ്നം എങ്ങനെയാണ് ഭാര്യക്കും തനിക്കുമിടയിൽ പ്രശ്നങ്ങളുണ്ടാക്കിയതെന്ന് വിജയ് പറഞ്ഞത്. “അവൾ അനുവദിക്കില്ലെന്ന് എനിക്കറിയാമായിരുന്നു, അതിനാൽ ഞാൻ രഹസ്യമായി ഫോട്ടോയെടുക്കാൻ തുടങ്ങി. പക്ഷെ ജെസ്സി അത് കണ്ടെത്തി. അവൾ രണ്ടാമതും ഗർഭിണിയായ സമയമായിരുന്നു അത്. ജെസ്സി ദേഷ്യത്തോടെ പറഞ്ഞു, ‘ഞാൻ അമ്മയുടെ വീട്ടിലേക്ക് പോകുന്നു’, എന്നിട്ട് ഇറങ്ങിപ്പോയി. പക്ഷെ ഉടനെ ഓടിച്ചെന്ന് അവളുടെ വയറ്റിൽ കൈവെച്ച്, ഞാൻ ഇനി അഭിനയിക്കില്ലെന്ന് വാക്ക് കൊടുത്തു. എന്റെ കുടുംബമാണ് എനിക്ക് പ്രധാനം എന്നും പറഞ്ഞു”
നടനാകാനുള്ള സ്വപ്നം ഉപേക്ഷിക്കാൻ കഴിയാത്തതുകൊണ്ട്, ഭാര്യക്ക് കൊടുത്ത വാക്ക് അദ്ദേഹത്തിന് ലംഘിക്കേണ്ടി വന്നു. വിജയ് സിനിമയിൽ സജീവമായി, ആദ്യം ഷോർട്ട് ഫിലിമുകളിലൂടെയും സഹനടനായും സിനിമയിലെത്തി. അദ്ദേഹം അഭിനയിക്കുന്ന വിവരം ഭാര്യയിൽ നിന്ന് മറച്ചുവെക്കേണ്ടി വന്നു, പക്ഷെ അവരത് കണ്ടെത്തുകയും ചെയ്തു. പിന്നീടദ്ദേഹം സിനിമയിൽ വളരെയധികം സജീവമാവുകയായിരുന്നു
