ഗുരുവായൂര്: ഈ തെരഞ്ഞെടുപ്പില് കേരളത്തിലെ ഏറ്റവും ശ്രദ്ധാകേന്ദ്രമായ മണ്ഡലങ്ങളിലൊന്നാണ് ഗുരുവായൂര്. എന്ഡിഎ സ്ഥാനാര്ത്ഥിയായെത്തിയ ബി. ഗോപാലകൃഷ്ണന്റെ പ്രസ്താവനയാണ് മണ്ഡലത്തെ പൊടുന്നനെ ശ്രദ്ധാകേന്ദ്രമാക്കിയത്. ക്ഷേത്രനഗരിയായ മണ്ഡലത്തില് നിന്ന് 1967 മുതല് ഏതാണ്ട് അരനൂറ്റാണ്ട് കാലമായി ഒരു ഹിന്ദു എംഎല്എ ഉണ്ടായിട്ടില്ല എന്ന കാര്യമാണ് ഗോപാലകൃഷ്ണന് ചൂണ്ടിക്കാണിച്ചത്. ഇതോടെ കപട മതേതര മുന്നണികള് സജീവമായി. മതം നോക്കിയും ജാതി നോക്കിയും മാത്രം സ്ഥാനാര്ത്ഥികളെ നിര്ത്തുന്നവരൊക്കെ മതേതരത്വത്തിന്റെ അപ്പോസ്തലന്മാരായി.
1967ല് മുസ്ലിംലീഗിന്റെ ബിവിഎസ് തങ്ങള് വിജയിച്ച മണ്ഡലത്തില് എഴുപതില് വിജയിച്ചത് ബി. വടക്കനാണ്. 77ലും 80ലും തങ്ങള് വീണ്ടും വിജയിയായി. 82ലും 87ലും ലീഗിന് വേണ്ടി പികെകെ ബാവ മണ്ഡലം നിലനിര്ത്തി. 91ല് അബൂബക്കര് വിജയിച്ചു. 96ലാണ് ഇടതുപക്ഷത്തിന് ആദ്യ വിജയം. സിപിഎം സ്വതന്ത്രനായി മത്സരിച്ച സിനിമാ സംവിധായകന് പി.ടി. കുഞ്ഞുമുഹമ്മദ് ഗുരുവായൂരില് വിജയിച്ചു. 2001ല് പികെകെ ബാവയിലൂടെ ലീഗ് മണ്ഡലം തിരിച്ചുപിടിച്ചു. 2006ലും 2011ലും 2016ലും കെ.വി. അബ്ദുള്ഖാദറിലൂടെ ഹാട്രിക് വിജയമാണ് സിപിഎം നേടിയത്. 2021ല് എന്.കെ. അക്ബര് സിപിഎമ്മിന് വേണ്ടി മണ്ഡലം നിലനിര്ത്തി. ഇക്കുറിയും അക്ബര് തന്നെയാണ് സിപിഎമ്മിന് വേണ്ടി കളത്തില്. മുസ്ലിം ലീഗ് സംസ്ഥാന സെക്രട്ടറി സി.എച്ച്. റഷീദിനെ മത്സരിപ്പിക്കുന്നു. ബിജെപി സംസ്ഥാന വൈസ് പ്രസിഡണ്ട് ആയ അഡ്വ. ബി. ഗോപാലകൃഷ്ണന് എന്ഡിഎ സ്ഥാനാര്ത്ഥിയായി മത്സരത്തിന് എത്തിയതോടെയാണ് ഗുരുവായൂരില് തീപാറുന്ന പോരാട്ടത്തിന് തുടക്കമായത്. പ്രസ്താവനകളുടെ മൂര്ച്ച കൊണ്ട് എതിരാളികളെ നേരിട്ട ഗോപാലകൃഷ്ണന് മണ്ഡലത്തില് ലഭിക്കുന്നത് വലിയ ജനപിന്തുണയാണ്. ഗുരുവായൂരിന്റെ വികസനം മുരടിച്ചു നില്ക്കുന്ന സാഹചര്യം ഗോപാലകൃഷ്ണന് എണ്ണിയെണ്ണി പറയുന്നു. കുടിവെള്ളം പോലും ലഭ്യമല്ലാത്ത തീരദേശ ജനത, മാലിന്യം കൊണ്ട് പൊറുതിമുട്ടുന്ന തദ്ദേശീയര്, ശ്വാസംമുട്ടുന്ന ക്ഷേത്രനഗരി, മതിയായ യാത്രസൗകര്യങ്ങള് ഇല്ലാത്ത, അടിസ്ഥാന സൗകര്യ വികസനത്തില് പിന്നോക്കം നില്ക്കുന്ന തീരമേഖല. എങ്ങും എത്താത്ത കടല്ഭിത്തി നിര്മ്മാണം. ഇങ്ങനെ മണ്ഡലം നേരിടുന്ന വികസന പ്രതിസന്ധികള് ഏറെയാണ.് ഗുരുവായൂരില് അടുത്തകാലത്ത് കേന്ദ്രസര്ക്കാരിന്റെ പ്രസാദ്നഗരം പദ്ധതിയിലൂടെ ഏതാണ്ട് 400 കോടി രൂപയുടെ വികസന പ്രവര്ത്തനങ്ങള് നടപ്പാക്കിയതൊഴിച്ചാല് മണ്ഡലത്തില് കാര്യമായ വികസനം ഒന്നും വന്നിട്ടില്ല. ഗുരുവായൂരില് നിന്ന് തിരുനാവായക്കുള്ള റെയില്പാത ഇപ്പോഴും കടലാസില് മാത്രം ഒതുങ്ങുന്നു. സ്ഥലം ഏറ്റെടുത്തു കൊടുത്താല് പാത നിര്മ്മാണം പൂര്ത്തിയാക്കാന് തയ്യാറാണെന്ന് റെയില്വേ പലവട്ടം അറിയിച്ചിട്ടും സംസ്ഥാനം താല്പര്യം കാണിച്ചില്ല. ഗുരുവായൂരിന്റെ മുഖച്ഛായ മാറ്റാവുന്ന പദ്ധതിയായിരുന്നു ഇത്.
മൂന്ന് പ്രധാന ഭാഗങ്ങളാണ് ഗുരുവായൂര് മണ്ഡലത്തിനുള്ളത്. ക്ഷേത്രവും അനുബന്ധ പ്രദേശങ്ങളും അടങ്ങുന്ന ഗുരുവായൂര് മേഖല, ചാവക്കാട് തീരമേഖല, പുന്നയൂര്ക്കുളം ഗ്രാമപ്രദേശങ്ങള്. ചാവക്കാടും പുന്നയൂര്ക്കുളവും വികസനത്തിന്റെ കാര്യത്തില് വളരെ പിന്നാക്കമാണ.് കേരളത്തിന്റെ അഭിമാനമായ നാലപ്പാട്ട് തറവാടിന്റെ ആസ്ഥാനമാണ് പുന്നയൂര്ക്കുളം. ഭാഷയുടെയും സാഹിത്യത്തിന്റെയും കലവറയായിരുന്ന ഇവിടെ അത്തരം കാര്യങ്ങളില് സര്ക്കാര് ഒരു ശ്രദ്ധയും കാണിച്ചിട്ടില്ല. മാധവിക്കുട്ടിയുടെ ഓര്മ്മയ്ക്കായി കമലാ സുരയ്യ സ്മാരകം ഉണ്ടാക്കിയിട്ടുണ്ടെങ്കിലും അനാഥമായി കിടക്കുന്നു. ചാവക്കാട് ഫിഷ് ലാന്ഡിങ് സെന്റര് ആവശ്യത്തിനു സൗകര്യങ്ങളില്ലാത്തതിനാല് പരിമിതികള് കൊണ്ട് വീര്പ്പുമുട്ടുകയാണ്.
മാലിന്യനിര്മാര്ജന പദ്ധതികളും കടലാസില് ഒതുങ്ങി. ദിവസംതോറും പതിനായിരക്കണക്കിനാളുകള് എത്തുന്ന ക്ഷേത്രനഗരിയില് മാലിന്യ സംസ്കരണത്തിന് ശാസ്ത്രീയ സംവിധാനം ഒരുക്കാത്തത് സംസ്ഥാന സര്ക്കാരിന്റെയും നഗരസഭയുടെയും കഴിവുകേടാണ്. കിണറുകളില് എല്ലാം കോളിഫോം ബാക്ടീരിയയുടെ സാന്നിധ്യമുണ്ട്. വികസന പ്രതിസന്ധികളാണ് ഗുരുവായൂരില് ഇക്കുറി തെരഞ്ഞെടുപ്പ് വിഷയം. അതിനിടയിലാണ് 50 വര്ഷമായി മതം നോക്കി മാത്രം സ്ഥാനാര്ത്ഥികളെ നിര്ത്തുന്നവരുടെ തനിനിറം ഗോപാലകൃഷ്ണന് ഉറക്കെ വിളിച്ചുപറഞ്ഞത്. മുന്നണി നേതാക്കളുടെ ഉറക്കംകെടുത്താന് ഇത് ധാരാളമായിരുന്നു. ഗുരുവായൂരിലെ രാഷ്ട്രീയ പോരാട്ടത്തിന് ചൂട് പകരാന് ഗോപാലകൃഷ്ണന്റെ പ്രസ്താവനയ്ക്കായി. അന്തര്ദേശീയ തീര്ത്ഥാടന കേന്ദ്രമായ ഗുരുവായൂരിന്റെ പ്രാധാന്യം കണക്കിലെടുത്ത് വന് വികസന പദ്ധതികളാണ് മണ്ഡലത്തില് നടപ്പാക്കേണ്ടത്. കേന്ദ്രസര്ക്കാരിന്റെ സഹകരണത്തോടെ ഈ വികസന പദ്ധതികള് നടപ്പാക്കാന് എന്ഡിഎ സ്ഥാനാര്ത്ഥിയെ വിജയിപ്പിക്കണം എന്നതാണ് ഗോപാലകൃഷ്ണന് വോട്ടര്മാരോട് അഭ്യര്ത്ഥിക്കുന്നത്. സംസ്ഥാന സര്ക്കാരിന്റെ ഭരണത്തുടര്ച്ചയ്ക്ക് വോട്ട് തേടിയാണ് എന്.കെ അക്ബറിന്റെ പ്രചരണം. കേന്ദ്രസംസ്ഥാന സര്ക്കാരുകളെ അതിരൂക്ഷമായി വിമര്ശിച്ചുകൊണ്ട് സി.എച്ച്. റഷീദ് വോട്ട് തേടുന്നു. പ്രവചനാതീതമായ ത്രികോണ മത്സരത്തിലേക്ക് മണ്ഡലത്തിലെ തെരഞ്ഞെടുപ്പ് പോരാട്ടം ഉയര്ന്നിട്ടുണ്ട്.
