കാലടി: ശ്രീശങ്കരാചാര്യ സംസ്കൃത സര്വകലാശാലയില് വീണ്ടും വിവാദം. മുന് വിസിയുടെ അഭാവത്തില് ഫയലുകള് കൂട്ടത്തോടെ ഒപ്പിട്ടു. വിസിയുടെ പാസ് വേര്ഡ് കൈക്കലാക്കിയുള്ള ക്രമക്കേടില് നടപടി ആവശ്യപ്പെട്ട് സേവ് യൂണിവേഴ്സിറ്റി ക്യാമ്പയിന് കമ്മിറ്റി.
മാര്ച്ച് 5ന് വൈകുന്നേരം നാലിനാണ് ഡോ. കെ.കെ. ഗീതാകുമാരിയെ വിസിയുടെ ചുമതലയില് നിന്ന് നീക്കി സാങ്കേതിക സര്വകലാശാല വിസി ഡോ. സിസാ തോമസിന് അധിക ചുമതല നല്കിയത്. ഉടന് തന്നെ ഡോ. ഗീതാകുമാരി പദവി ഒഴിഞ്ഞ് സര്വകലാശാലയില് നിന്ന് മടങ്ങി. എന്നാല് അതിനുശേഷം അന്നേദിവസം ഏറെ വൈകിയും നാല്പ്പതോളം ഫയലുകളില് വിസി തീര്പ്പ് കല്പ്പിച്ചതായ രേഖകള് പുറത്തുവന്നു.
മറ്റ് സര്വകലാശാലകളില് നിന്ന് വിഭിന്നമായി പരീക്ഷകളിലും വിദ്യാര്ത്ഥി പ്രവേശനങ്ങളിലും വ്യാപകമായ ക്രമക്കേടുകള് സംസ്കൃത സര്വകലാശാലയില് നടക്കുന്നതായി ആക്ഷേപമുള്ളപ്പോഴാണ് ഇത്തരമൊരു തട്ടിപ്പ് കൂടി നടന്നത്. ഇത് ഗുരുതരമായ ക്രമക്കേടാണെന്നും, പാസ്വേഡ് ചോര്ത്തി ഫയലുകളില് വിസിയുടെ അംഗീകാരം നല്കിയ ഉദ്യോഗസ്ഥന്മാര്ക്കെതിരെ കര്ശന നടപടിയെടുക്കണമെന്നും ആവശ്യപ്പെട്ട് സേവ് യൂണിവേഴ്സിറ്റി ക്യാമ്പയിന് കമ്മിറ്റി വിസി ഡോ. സിസാ തോമസിന് നിവേദനം നല്കി.
