തിരുവനന്തപുരം: കാലടി ശ്രീശങ്കരാചാര്യ സംസ്കൃത സര്വകലാശാലയില് കഴിഞ്ഞ 15 വര്ഷമായി വ്യാപകമായ സാമ്പത്തിക ക്രമക്കേടുകളാണ് നടക്കുന്നതെന്ന് സേവ് യൂണിവേഴ്സിറ്റി ക്യാമ്പയിന് കമ്മിറ്റിയുടെ ആരോപണം.മുന് വൈസ് ചാന്സലര് ഡോ.ധര്മ്മരാജ് അടാട്ട് ഉള്പ്പെടെ സാമ്പത്തിക തിരിമറികളില് പങ്കാളികളാണെന്ന് ഗവര്ണര്ക്കും നിലവിലെ വിസിക്കും നല്കിയ നിവേദനത്തില് കമ്മിറ്റി പറയുന്നു.
സംസ്കൃത ഭാഷാ വികസനത്തിനായി കേന്ദ്ര സര്ക്കാരില് നിന്ന് ലഭിക്കുന്ന കോടിക്കണക്കിന് രൂപയുടെ പ്രൊജക്റ്റുകളിലാണ് തട്ടിപ്പ് നടക്കുന്നത്. ലക്ഷങ്ങള് അഡ്വാന്സ് കൈപ്പറ്റിയ ശേഷം ബില്ലുകളോ വൗച്ചറുകളോ ഹാജരാക്കാതെ തുക സാധൂകരിച്ചെടുക്കുന്ന രീതിയാണ് ഇവിടെയുളളത്. മുന് വിസി ഡോ. ധര്മ്മരാജ് അടാട്ട് 2,44,600 രൂപ മതിയായ രേഖകളില്ലാതെ ചെലവഴിച്ചതായി ആരോപണമുണ്ട്.
സ്വന്തം സത്യവാംഗ്മൂലം കണക്കിലെടുത്ത് ഈ തുക സര്വകലാശാല സാധൂകരിച്ച് നല്കി.സമാനമായി നിരവധി ഇടത് അനുകൂല അധ്യാപകര്ക്കും അനധ്യാപകര്ക്കും അവിഹിതമായി തുക അനുവദിച്ചിട്ടുണ്ട്.ബിഎഫ്എ പരീക്ഷ തോറ്റ വിദ്യാര്ത്ഥികള്ക്ക് എംഎഫ്എ പ്രവേശനം നല്കി പാസാക്കുന്ന അക്കാദമിക് തട്ടിപ്പുകളും സര്വകലാശാലയില് നടക്കുന്നുണ്ടെന്ന് ആരോപണമുണ്ട്.
സിപിഎം അനുകൂല അധ്യാപക സംഘടനയുടെ ഒത്താശയിലാണ് ഈ സാമ്പത്തിക തട്ടിപ്പുകള് നടക്കുന്നതെന്നാണ് പരാതി. ഇതിനെതിരെ നിലവിലെ വിസി പ്രൊഫ. സിസ തോമസ് അന്വേഷണം ആരംഭിച്ചതോടെ മുന് വിസിയുടെ നേതൃത്വത്തില് പ്രതിഷേധങ്ങള് ആസൂത്രണം ചെയ്യുകയാണെന്നും സേവ് യൂണിവേഴ്സിറ്റി ക്യാമ്പയിന് കമ്മിറ്റി പറയുന്നു.
കഴിഞ്ഞ 15 വര്ഷത്തിനിടെ സര്വകലാശാലയില് നടന്ന എല്ലാ സാമ്പത്തിക ഇടപാടുകളെക്കുറിച്ചും സമഗ്ര അന്വേഷണം നടത്തണമെന്നും ക്രമവിരുദ്ധമായി അഡ്വാന്സുകള് സാധൂകരിച്ചു നല്കിയ ഉത്തരവുകള് റദ്ദാക്കണമെന്നും ആവശ്യപ്പെട്ട് കമ്മിറ്റി ഗവര്ണര്ക്ക് നിവേദനം നല്കി.
