കഴിഞ്ഞ പത്ത് വര്‍ഷത്തിനിടെ ഇംഗ്ലീഷ് പ്രീമിയര്‍ ലീഗ് ഫുട്‌ബോളില്‍ ഹൃദയം കീഴടക്കിയൊരു പ്ലേയര്‍ ആരെന്ന ചോദ്യത്തിന് ഒരൊറ്റ ഉത്തരമേയുള്ളൂ- മുഹമ്മദ് സലാ. അതിന്റെ തെളിവാണ് ആരാധക പിന്തുണയോടെ ഏറ്റവും കൂടുതല്‍ തവണ പിഎഫ്എ പ്ലേയര്‍ ഓഫ് ദി ഇയര്‍ ആയി തെരഞ്ഞെടുക്കപ്പെട്ടത്. ചൊവ്വാഴ്‌ച്ച രാത്രി ഏറെ വൈകിയാണ് ലോക ഫുട്‌ബോളിനെയാകെ വിഷമത്തിലാഴ്‌ത്തി സലാ തന്റെ സമൂഹമാധ്യമ അക്കൗണ്ടിലൂടെ ലിവറില്‍ നിന്നും വിടുകയാണെന്ന വിവരം വെളിപ്പെടുത്തിയത്. ലിവര്‍പൂള്‍ എഫ്‌സിക്കൊപ്പം നേടിയ കിരീടങ്ങള്‍ അണിനിരത്തിയ ഷോക്കേസിന് മുന്നിലിരിക്കുന്ന ചിത്രം പോസ്റ്റ് ചെയ്തുകൊണ്ടായിരുന്നു മുഹമ്ദ് സലാ ഈ സീസണിനൊടുവില്‍ താന്‍ ലിവര്‍പൂള്‍ എഫ്‌സിയില്‍ നിന്നും ഒഴിയും എന്ന് അറിയിച്ചത്.
2017ല്‍ ഇറ്റാലിയന്‍ ക്ലബ്ബ് എഎസ് റോമയില്‍ നിന്നും ലിവര്‍പൂളിലെത്തിയ ഘട്ടം മുതലേ വിസ്മയം കാട്ടിത്തുടങ്ങി. ചടുലമായി താളത്തിലും വേഗത്തിലും സലാ നടത്തുന്ന മുന്നേറ്റങ്ങളും ഡ്രിബ്ലിങ്ങുകളും ഹൃദയം നിറയ്‌ക്കുന്നവയായിരുന്നു. ലിവര്‍പൂള്‍ ഫുട്‌ബോള്‍ ടീം അതിന്റെ സുവര്‍ണ കാലം തിരിച്ചുപടിച്ച കാലഘട്ടത്തിലാണ് സലാ ഇവിടേക്കെത്തിയത്. ഇക്കാലയളവിലാണ് ജര്‍മന്‍ പരിശീലകന്‍ യര്‍ഗോന്‍ ക്ലോപ്പും ടീമിന്റെ ഭാഗമാകുന്നത്. അതില്‍ പിന്നെ ലിവറിന് തിരിഞ്ഞുനോക്കേണ്ടി വന്നിട്ടില്ല. നിലവിലെ സീസണില്‍ ആണ് സ്ലോട്ടിന് കീഴില്‍ നിറം മങ്ങിയ പ്രകടനമാണ് ലിവര്‍ കാഴ്‌ച്ചവച്ചു വരുന്നത്. ചാമ്പ്യന്‍സ് ലീഗ് രണ്ടാം പാദ പ്രീക്വാര്‍ട്ടറിലെ വിജയം വലിയൊരു ആശ്വാസമാണ് ലിവര്‍ ആരാധകര്‍ക്ക് സമ്മാനിച്ചത്. അതില്‍ വിജയം ഉറപ്പിച്ച രണ്ടാം ഗോള്‍ മുഹമ്മദ് സലായുടെ സ്വതസിദ്ധശൈലിയിലുള്ള ഇടംകാലന്‍ ഷോട്ടില്‍ നിന്നായത് ആരാധകരെ കൂടുതല്‍ ആവേശത്തിലും ആഹ്ലാദത്തിലുമാഴ്‌ത്തി. ഇനി ഇതുപോലൊരു അവസരം കിട്ടുമോയെന്ന് ഉറപ്പില്ല. അതിമനോഹരമായ ഈ ഒരു പശ്ചാത്തലത്തിലാണ് സലാ തന്റെ വിടവാങ്ങല്‍ പ്രഖ്യാപനം നടത്തിയിരിക്കുന്നത്.
ഒമ്പത് വര്‍ഷത്തിനിടെ സലാ എന്ന ആഫ്രിക്കന്‍ ഫുട്‌ബോളര്‍ ലോക ഫുട്‌ബോള്‍ ആരാധകരുടെ ഹൃയത്തിലേറിയ, യൂറോപ്യന്‍ ഫുട്‌ബോളിന്റെ കിരീടം വയ്‌ക്കാത്ത രാജാവായി വാണ വസ്തുതകളിലേക്കൊരു തിരിഞ്ഞുനോട്ടം.
ഒരേ പ്രീമിയര്‍ ലീഗ് ക്ലബ്ബിനായി ഏറ്റവും കൂടുതല്‍ ഗോളുകള്‍
പ്രായം 33ലെത്തിയ സലാ 2017 മുതല്‍ ഇതുവരെ 435 കളികളില്‍ ലിവറിനായി ബൂട്ടുകെട്ടി. 277 ഗോളുകളിളില്‍ പങ്കാളിത്തം. മാഞ്ചസ്റ്റര്‍ യുണൈറ്റഡിനായി 276 ഗോളുകളുടെ ഭാഗമായിരുന്ന വെയ്ന്‍ റൂണിയുടെ റിക്കാര്‍ഡ് ഭേദിച്ചു.
ക്രിസ്റ്റ്യാനോ റൊണാള്‍ഡോ, തിയറി ഹെണ്‍റി, കെവിന്ഡ ഡി ബ്രൂയിനെ, ഗാരെത്ത് ബെയ്ല്‍, മാര്‍ക് ഹ്യൂഗ്‌സ്, അലന്‍ ഷിയറെര്‍ എന്നിവര്‍ രണ്ട് തവണ വീതം പിഎഫ്എ പ്ലേയര്‍ ഓഫ് ദി ഇയര്‍ പുരസ്‌കാരം നേടി. എന്നാല്‍ സലാ ഈ നേട്ടം മൂന്ന് തവണ കൈവരിച്ചു. ഏറ്റവും സ്വന്തമാക്കിയത്. ഒടുവില്‍ 2024-25 സീസണില്‍.
പ്രീമിയര്‍ ലീഗ് ഫുട്‌ബോളില്‍ ഓരോ സീസണിലും കൂടുതല്‍ ഗോളുകള്‍ നേടുന്ന താരത്തിനുള്ള സുവര്‍ണ ബൂട്ട് സ്വന്തമാക്കിയതിനുള്ള റിക്കാര്‍ഡ് സലായുടെ പേരിലാണ്. 2024-25 സീസണില്‍ നാലാം തവണയാണ് ഈ നേട്ടം സ്വന്തമാക്കിയത്. ആഴ്‌സണലിന്റെ സ്‌ട്രൈക്കറായിരുന്ന ഫ്രഞ്ച് ഇതിഹാസം തിയറി ഹെണ്‍റിക്കൊപ്പമാണെത്തിയത്.
ഇടംകാല്‍ ഷോട്ടിലൂടെ കൂടുതല്‍ ഗോളുകള്‍ നേടുന്ന പ്രീമിയര്‍ ലീഗ് താരമായി. റോബി ഫവ്‌ളര്‍ ബാക്കിനെ ഇക്കാര്യത്തില്‍ മറികടന്നത് മൂന്ന് വര്‍ഷം മുമ്പ്.
അമ്പത് ചാമ്പ്യന്‍സ് ലീഗ് ഗോളുകള്‍ നേടുന്ന ആദ്യത്തെ ആഫ്രിക്കന്‍ ഫുട്‌ബോളര്‍. ഗല്ലാട്ടസാരെയ്‌ക്കെതിരെ 4-0ന് വിജയിച്ച മത്സരത്തിലൂടെയാണ് സലാ ഈ നേട്ടം കൈവരിച്ചത്. ദിദിയര്‍ ദ്രോഗ്ബയും സാമുവല്‍ ഏറ്റുവും നേടിയ 44 ഗോളുകള്‍ ആണ് സലയ്‌ക്ക് തൊട്ടുപിന്നിലുള്ളത്.
