കൊച്ചി: രാഹുല് മാങ്കൂട്ടത്തിലിനെതിരായ മൂന്നാം ബലാത്സംഗ കേസില് കസ്റ്റഡിയിലുള്ള ഫോണുകളുടെ പാസ്വേഡ് പോലീസിന് കൈമാറണമെന്ന തിരുവല്ല മജിസ്ട്രേറ്റ് കോടതി ഉത്തരവ് ഹൈക്കോടതി സ്റ്റേ ചെയ്തു. രണ്ട് ഫോണുകളുടെ പാസ്വേഡ് കൈമാറണമെന്നായിരുന്നു പ്രോസിക്യൂഷന് ആവശ്യപ്രകാരം മജിസ്ട്രേറ്റ് കോടതി നിര്ദേശിച്ചിരുന്നത്.
പോലീസിന് തന്റെ മൊബൈല് ഫോണുകളിലേക്ക് അനിയന്ത്രിതമായി പ്രവേശനം അനുവദിക്കുന്നത് ഭരണഘടനയുടെ ആര്ട്ടിക്കിള് 21 പ്രകാരമുള്ള സ്വകാര്യതയ്ക്കുള്ള മൗലികാവകാശത്തിന്റെ ലംഘനമാകുമെന്ന് എംഎല്എ വാദിച്ചു. കേസില് ഉന്നയിക്കപ്പെട്ട ആരോപണങ്ങളുമായി യാതൊരു ബന്ധവുമില്ലാത്ത വലിയ അളവില് വ്യക്തിപരവും സ്വകാര്യവുമായ വിവരങ്ങള് ഫോണുകളില് അടങ്ങിയിട്ടുണ്ടെന്ന് ഹര്ജിയില് പറയുന്നു. ഈ വാദം വിലയിരുത്തി നിയമപരമായ പ്രശ്നങ്ങള് പരിശോധിക്കുമെന്ന് ഹൈക്കോടതി വ്യക്തമാക്കി .
അതേസമയം രണ്ടാമത്തെ അതിജീവിതയുമായി ബന്ധപ്പെടരുതെന്ന ജാമ്യവ്യവസ്ഥ ലംഘിച്ചുവെന്ന് ആരോപിച്ച് അന്വേഷണ സംഘം രാഹുലിനെതിരെ കോടതിയെ സമീപിച്ചിട്ടുണ്ട്. പരാതിക്കാരിയുടെ ഫോണിലേയ്ക്ക് രാഹുല് മിസ്ഡ് കോള് ചെയ്തുവെന്നാണ് അന്വേഷണസംഘം കോടതിയില് ചൂണ്ടിക്കാട്ടിയത്. എന്നാല് അബദ്ധത്തില് സംഭവിച്ചതാണെന്നാണ് രാഹുലിന്റെ വാദം. തന്റെ വാട്ട്സ് ആപ്പ് സ്റ്റാറ്റസിന് രണ്ടാം അതിജീവിത മറുപടിയായി ഇമോജി അയച്ചിരുന്നുവെന്നും രാഹുല് ചൂണ്ടിക്കാട്ടുന്നു.
