ആലപ്പുഴ: നിയമസഭാ തെരഞ്ഞെടുപ്പില് ആലപ്പുഴ ജില്ലയില് ഇടത് പക്ഷത്തിന് വേണ്ടി ഇത്തവണ പഴയ മുഖങ്ങള് തന്നെ മത്സരിക്കാന് സാദ്ധ്യത. ജില്ലയില് ഒന്പത് നിയമസഭാ മണ്ഡലങ്ങളാണുള്ളത്. ഇതില് ആറിടത്ത് സിപിഎമ്മും, രണ്ടിടത്ത് സിപിഐയും, ഒരിടത്ത് എന്സിപിയുമായാണ് നിലവില് മത്സരിക്കുന്നത്. ഇത്തവണ ഇതേനില തുടരാനാണ് ധാരണ. ഹരിപ്പാട് ഒഴികെ മറ്റ് മണ്ഡലങ്ങളിലെല്ലാം കഴിഞ്ഞ തെരഞ്ഞെടുപ്പില് ഇടതുപക്ഷമാണ് വിജയിച്ചത്.
തുടര്ച്ചയായി രണ്ട് തവണ മത്സരിച്ചവരെ ഒഴിവാക്കാനുള്ള തീരുമാനത്തില് നിന്ന് സിപിഎം പിന്മാറാനാണ് സാധ്യത. ഇതോടെ നിലവിലെ എംഎല്എമാരെല്ലാം തന്നെ വീണ്ടും മത്സരിക്കും. കായംകുളം എംഎല്എ പ്രതിഭാ ഹരി തുടര്ച്ചയായി രണ്ട് തവണ മത്സരിച്ച് വിജയിച്ചതാണ്. ഇത്തവണ ഒഴിവാക്കുമെന്നായിരുന്നു പ്രചാരണം. പകരം ജില്ലാ സെക്രട്ടറി ആര്. നാസറിനെ പരിഗണിക്കാനും നേരത്തെ ജില്ലാ സെക്രട്ടറിയേറ്റ് യോഗത്തില് തീരുമാനമെടുത്തിരുന്നു. എന്നാല് ജയസാധ്യത മാത്രം എന്ന തീരുമാനത്തിലേക്ക് പാര്ട്ടി എത്തിയതോടെ നാസറിന്റെ വഴിയടഞ്ഞു. സ്ഥാനാര്ത്ഥി നിര്ണയത്തില് സിറ്റിങ് എംഎല്എമാരെ തന്നെ നിലനിര്ത്തണമെന്ന സംസ്ഥാന നേതൃത്വത്തിന്റെ കര്ശന നിര്ദേശത്തോടെയാണ് നാസറിനെ വീണ്ടും തഴഞ്ഞത്.
കഴിഞ്ഞ തെരഞ്ഞെടുപ്പിലും നാസറിന് സീറ്റ് നല്കണമെന്ന് ആവശ്യം ഉയര്ന്നിരുന്നു. മാത്രമല്ല ജില്ലയില് ആധിപത്യമുള്ള സജി ചെറിയാന് അനൂകൂലികളും പ്രതിഭയെ പിന്തുണച്ചു. ഇതോടെ കേന്ദ്ര കമ്മിറ്റിയംഗമായ സി. എസ്. സുജാതയെ മത്സരിപ്പിക്കണമെങ്കില് ജില്ലയ്ക്ക് പുറത്ത് സീറ്റ് കണ്ടെത്തേണ്ടി വരും. നാസറിനായി കുട്ടനാട് സീറ്റ് എന്സിപിയില് നിന്ന് ഏറ്റെടുക്കണമെന്ന് സിപിഎമ്മില് ആവശ്യമുയര്ന്നെങ്കിലും പിണറായി വിജയന് അനൂകൂല നിലപാടല്ല സ്വീകരിച്ചത്. ഇതോടെ കുട്ടനാട്ടില് എന്സിപി സംസ്ഥാന അധ്യക്ഷന് തോമസ് കെ. തോമസ് വീണ്ടും മത്സരിക്കാനാണ് സാധ്യത. മത, സാമുദായിക പരിഗണനകള് അരൂരിലെ നിലവിലെ എംഎല്എ ദലീമ ജോജോയ്ക്കും തുണയായി.
നിലവിലെ എംഎല്എമാരെ വീണ്ടും മത്സരിപ്പിക്കാന് തീരുമാനിച്ചതോടെ മുതിര്ന്ന നേതാക്കളായ തോമസ് ഐസക്ക്, ജി. സുധാകരന് എന്നിവരെയും ഏറെ ചര്ച്ചകള് ഒന്നും കൂടാതെ ഒഴിവാക്കാനായി. ഐസക്കിന് സീറ്റ് നല്കിയാല് പോലും ജില്ലയ്ക്ക് പുറത്തായിരിക്കും നല്കുക. സുധാകരന്റെ സാധ്യതകള് പൂര്ണമായും അടയുന്ന സാഹചര്യമാണുള്ളത്. ജില്ലാ സെക്രട്ടറിയേറ്റിന്റെ അഭിപ്രായം കൂടി പരിഗണിച്ച് അടുത്ത ദിവസങ്ങളില് ചേരുന്ന സംസ്ഥാന സെക്രട്ടറിയേറ്റ്, സംസ്ഥാന കമ്മിറ്റിയോഗങ്ങളിലായിരിക്കും സ്ഥാനാര്ത്ഥികള് സംബന്ധിച്ച അന്തിമ തീരുമാനം ഉണ്ടാകുക. സിപിഐ മത്സരിക്കുന്ന ചേര്ത്തലയില് നിലവിലെ പ്രതിനിധി, മന്ത്രി പി. പ്രസാദ് വീണ്ടും ജനവിധി തേടും. ഹരിപ്പാട് മണ്ഡലത്തില് രമേശ് ചെന്നിത്തലയ്ക്ക് എതിരെ എഐവൈഎഫ് സംസ്ഥാന സെക്രട്ടറി ടി.ടി. ജിസ്മോനാകും സ്ഥാനാര്ത്ഥിയാകുക.
