കൊച്ചി: വിവാഹിതയായ സ്ത്രീയും കാമുകനും തങ്ങളുടെ ബന്ധത്തില് ജനിച്ച പെണ്കുട്ടിയുടെ ജനന സര്ട്ടിഫിക്കറ്റില് അച്ഛന്റെ പേരിന്റെ സ്ഥാനത്ത് നിയമപരമായി വിവാഹം കഴിച്ച ഭര്ത്താവിന്റെ പേരുള്ളത് മാറ്റണമെന്ന് ആവശ്യപ്പെട്ട് സമര്പ്പിച്ച ഹര്ജി ഹൈക്കോടതി അനുവദിച്ചു.
മകളുടെ ജനന സര്ട്ടിഫിക്കറ്റില് അച്ഛന്റെ പേര് മാറ്റണമെന്ന ഹര്ജിക്കാരുടെ അപേക്ഷ പരിഗണിക്കാനും ആവശ്യമായ തിരുത്തലുകളോടെ 30 ദിവസത്തിനുള്ളില് പുതിയ ജനന സര്ട്ടിഫിക്കറ്റ് നല്കാനും തൃശൂര് കോര്പറേഷനിലെ ബന്ധപ്പെട്ട ഉദ്യോഗസ്ഥനോട് ജസ്റ്റിസ് പി.വി. കുഞ്ഞികൃഷ്ണന് ഉത്തരവിട്ടു.
ഹര്ജിക്കാരിയായ പെണ്കുട്ടിയുടെ അമ്മയ്ക്ക് ബെംഗളൂരുവില് അക്കൗണ്ടന്റായി ജോലി ചെയ്യുന്ന ഒരാളുമായുള്ള നിയമപരമായ വിവാഹത്തില് നിന്ന് പ്രായപൂര്ത്തിയായ ഒരു മകനു
ണ്ട്. തുടര്ന്ന്, അവള് മറ്റൊരു പുരുഷനുമായി പ്രണയത്തിലാവുകയും ആ ബന്ധത്തില് നിന്ന് ഒരു മകള് ജനിക്കുകയും ചെയ്തു. എന്നാല് പെണ്കുട്ടിയുടെ ജനന സര്ട്ടിഫിക്കറ്റില് അമ്മയുടെ നിയമപരമായി വിവാഹം കഴിച്ച ഭര്ത്താവിനെയാണ് അച്ഛനായി രേഖപ്പെടുത്തിയത്.
ജനന സര്ട്ടിഫിക്കറ്റില് അച്ഛന്റെ പേര് മാറ്റണമെന്ന അപേക്ഷ നിഷേധിച്ച തൃശൂര് കോര്പറേഷന് ഉദ്യോഗസ്ഥന്റെ തീരുമാനത്തെ ചോദ്യം ചെയ്ത് അമ്മയും മറ്റും കോടതിയെ സമീപിച്ചു. പെണ്കുട്ടി പഠിക്കുന്ന സ്കൂള് അധികൃതര് അച്ഛന്റെ പേര് മാറ്റുന്നില്ലെങ്കില് കുട്ടിയെ പഠനം തുടരാന് അനുവദിക്കില്ലെന്ന് അറിയിച്ചതായി ഹര്ജിക്കാര് അവകാശപ്പെട്ടു. ഈ വാദം വിശ്വസിക്കാന് പ്രയാസമാണെന്ന് കോടതി നിരീക്ഷിച്ചു, അമ്മയുടെ കാമുകന് പെണ്കുട്ടിയുടെ ജൈവിക പിതാവാണെന്ന് സ്കൂള് അധികൃതര്ക്ക് എങ്ങനെ അറിയാമെന്ന് കോടതി ചോദിച്ചു. അതേസമയം, ജനന സര്ട്ടിഫിക്കറ്റ് തിരുത്തുന്നതില് തനിക്ക് എതിര്പ്പില്ലെന്ന് സ്ത്രീയുടെ നിയമപരമായി വിവാഹം കഴിച്ച ഭര്ത്താവ് കോടതിയെ അറിയിച്ചു. നിരപരാധിയായ കുട്ടിയുടെ ദുരവസ്ഥ കണക്കിലെടുത്ത്, ജനന സര്ട്ടിഫിക്കറ്റില് അച്ഛന്റെ പേര് മാറ്റുന്നതിന് സാധാരണയായി നടത്താറുള്ള ഡിഎന്എ പരിശോധന റിപ്പോര്ട്ട് നിര്ബന്ധിക്കാതെ കോടതി ഹര്ജി അനുവദിച്ചു. ഭര്ത്താവിന്റെ നിലപാട് മാന്യമായ പ്രവൃത്തിയാണെന്ന് ബെഞ്ച് അഭിപ്രായപ്പെട്ടു. അഭിമാനവും അന്തസും സ്ത്രീകള്ക്ക് മാത്രമല്ല, പുരുഷന്മാര്ക്കും അവകാശപ്പെട്ടതാണെന്ന് കേസില് കോടതി നിരീക്ഷിച്ചു.
