സെമിയിലെ രണ്ട് കളികളും ഒരു ഫൈനലും കഴിയുന്നതോടെ ഇത്തവണത്തെ ട്വന്റി20 ക്രിക്കറ്റ് ലോകകപ്പ് കൊടിയിറങ്ങും. നാളെയാണ് ആദ്യ സെമി. ദക്ഷിണാഫ്രിക്കയും ന്യൂസിലന്ഡും ഏറ്റുമുട്ടും. ഭാരതത്തിന്റെ മത്സരം മറ്റന്നാള് വാംഖഡെയിലാണ്. ഞായറാഴ്ച്ചയാണ് ഫൈനല് മത്സരം. അഹമ്മദാബാദിലെ നരേന്ദ്ര മോദി സ്റ്റേഡിയത്തില്.
വീറും വാശിയും കണ്ട സെമി പോരാട്ടത്തിന്റെ എന്ഡ് പഞ്ച് സഞ്ജുവിന്റെ വണ്മോന്ഷോ ആയിരുന്നു. ഇനി ഇത്തവണത്തെ ട്വന്റി20 ലോകകപ്പ് ഒളിപ്പിച്ചുവച്ചിരിക്കുന്ന അത്ഭുതങ്ങളെന്തെല്ലാമെന്ന് കാത്തിരുന്നു കണ്ടറിയാം.
നേരത്തെ സ്ഥാനം പിടിച്ച് ഇംഗ്ലണ്ട്
സൂപ്പര് 8ല് നിന്ന് ആദ്യമായി സെമിയിലേക്ക് യോഗ്യത ഉറപ്പാക്കിയ ടീം ഇംഗ്ലണ്ട് ആണ്. ശ്രീലങ്കയെയും പാകിസ്ഥാനെയും പരാജയപ്പെടുത്തിക്കൊണ്ടാണ് ഇംഗ്ലണ്ട് മുന്നേറ്റം ഉറപ്പാക്കിയത്. സൂപ്പര് 8 മൂന്നാം മത്സരത്തില് ന്യൂസിലന്ഡിനെതിരായ വിജയം അനിവാര്യമായിരുന്നില്ല. എന്നിട്ടും വിജയിച്ചു ഗ്രൂപ്പ് ജേതാക്കളുടെ സ്ഥാനം ഭദ്രമാക്കി. അതിനാലാണ് സെമിയില് ഭാരതത്തെ എതിരാളികളായി കിട്ടുന്നതിലേക്ക് നയിച്ചത്.
പെര്ഫെക്ട് ദക്ഷിണാഫ്രിക്ക
കളിച്ച മത്സരങ്ങളെല്ലാം ജയിച്ച ഏക ടീം എന്ന ഖ്യാതിയുമായാണ് ദക്ഷിണാഫ്രിക്ക സെമി പോരാട്ടത്തിനിറങ്ങുന്നത്. നാളെ നടക്കുന്ന ആദ്യ സെമിയില് ന്യൂസിലന്ഡ് ആണ് എതിരാളികള്. നേരത്തെ ഒന്നാം റൗണ്ടില് ന്യൂസിലന്ഡിനെ ഏഴ് വിക്കറ്റിന് തോല്പ്പിച്ച ടീം ആണ് ദക്ഷിണാഫ്രിക്ക. ന്യൂസിലന്ഡ് ആകട്ടെ പാകിസ്ഥാനെക്കാള് റണ്റേറ്റ് കൂടുതലാണെന്ന മികവില് മാത്രം സെമിയില് കടന്നുകൂടിയ ടീം ആണ്.
കടന്നു കൂടി കിവീസ്
സൂപ്പര് 8ലെ ആദ്യ മത്സരം മഴ കാരണം ഉപേക്ഷിച്ചത് മുതലാണ് പാകിസ്ഥാനും ന്യൂസിലന്ഡിനും വെല്ലിവിളി ആരംഭിക്കുന്നത്. മത്സരം കൃത്യമായി നടക്കുന്ന മുറയ്ക്ക് ജയിച്ച കൂട്ടര്ക്ക് അല്പ്പം ആശ്വസിക്കാനാകുമായിരുന്നു. പക്ഷെ കളി നടക്കാതെ വന്നതോടെ പോയിന്റ് പങ്കുവച്ചു. ഒടുവില് രണ്ട് ടീമുകളും ഓരോ വിജയം നേടിക്കൊണ്ട് പോയിന്റ് നിലയില് തുല്യത പാലിച്ചു. ഒടുവില് റണ്നിരക്കിന്റെ ബലത്തിലാണ് കിവീസ് സൂപ്പര് 8ല് കടന്നുകൂടിയത്.
സഞ്ജുവിന്റെ ബലത്തില് ഭാരതം
സൂപ്പര് 8 അവസാന പോരാട്ടത്തില് സഞ്ജു സാംസണിന്റെ മാസ്മരിക ബാറ്റിങ് ആണ് ഭാരതത്തിന്റെ സെമി ഫൈനല് ബെര്ത്ത് ഉറപ്പാക്കിയത്. ദക്ഷിണാഫ്രിക്കയോട് സൂപ്പര്8 പോരാട്ടത്തില് കൂറ്റന് തോല്വി വഴങ്ങിയത് ഭാരതത്തിന് വലിയ പ്രതിസന്ധിയാണ് ഉണ്ടാക്കിയത്. ഇതേ തുടര്ന്നാണ് സൂപ്പര് 8ല് വിജയം ഉറപ്പിക്കും വരെ ഭാരതത്തിന് നെഞ്ചിടിപ്പോടെ കളിക്കേണ്ടി വന്നത്.
മഴ മുടക്കിയാല് ആശ്രയിക്കാന് കൂടുതല് സമയവും റിസര്വ് ദിനവും
ഐസിസി ഷെഡ്യൂള് ചെയ്ത പ്രകാരം എല്ലാ മത്സരങ്ങളും ഏഴിനായിരിക്കും തുടങ്ങുക. മഴയ്ക്കെതിരെ കരുതലായി ഇനിയുള്ള മൂന്ന് മത്സരങ്ങള്ക്കും ഒരു റിസര്വ് ദിനം ഉണ്ടായിരിക്കും. കളി പൂര്ണമായും നടക്കാതിരിക്കുകയോ ഇടയ്ക്ക് മുടങ്ങുകയോ ചെയ്താല് റിസര്വ് ദിനത്തില് വീണ്ടും കളിക്കും. നിശ്ചയിച്ച ദിവസത്തില് ഓവറുകള് വെട്ടിക്കുറച്ചുള്ള മത്സരങ്ങള്ക്ക് ശ്രമിക്കും. സെമി മത്സരങ്ങളില് 90 മിനിറ്റ് വരെ കൂടുതല് സമയം അനുവദിച്ചിട്ടുണ്ട്. ആ സമയത്തും മത്സരം തീര്ക്കാനാകാതെ വന്നാല് മാത്രമായിരിക്കും റിസര്വ് ദിനം പരിഗണിക്കുക. ഫൈനലില് കൂടതലായി അനുവദിക്കപ്പെട്ടിട്ടുള്ള സമയം 120 മിനിറ്റ് ആണ്. കളി പൂര്ണമായും മുടങ്ങിയാലേ റിസര്വ് ദിനത്തില് പുതുതായി തുടങ്ങുകയുള്ളൂ. ഇടയ്ക്ക് മുടങ്ങിപ്പോയ മത്സരമാണെങ്കില് അതിന്റെ ബാക്കിയായിരിക്കും റിസര്വ് ദിനത്തില് കളിക്കുക.
