ആലപ്പുഴ: ഭര്‍തൃവീട്ടില്‍ നിന്ന് 35 പവന്‍ സ്വര്‍ണാഭരണങ്ങളും 30,000 രൂപയും കവര്‍ന്ന കേസില്‍ യുവതി അറസ്റ്റിലായി. ചേര്‍ത്തല എസ് എല്‍ പുരം കോര്‍ത്തുശ്ശേരി ആതിര ജി (26) ആണ് പിടിയിലായത്.
പൂച്ചാക്കല്‍ പൊലീസ് കോട്ടയത്ത് നിന്നാണ് യുവതിയെ അറസ്റ്റ് ചെയ്തത്.തൈക്കാട്ടുശ്ശേരി പഞ്ചായത്ത് ഏഴാം വാര്‍ഡ് മണപ്പുറം കൊച്ചുപറമ്പില്‍ രഘുനാഥന്റെ വീട്ടിലെ അലമാരയില്‍ സൂക്ഷിച്ചിരുന്ന സ്വര്‍ണവും പണവുമാണ് ആതിര മോഷ്ടിച്ചത്.മോഷണത്തിന് ശേഷം പല സ്ഥലങ്ങളിലായി ഒളിവില്‍ കഴിയുകയായിരുന്നു യുവതി.
ഭര്‍ത്താവിന്റെ അമ്മയുടെയും സഹോദരിയുടെയും പണവും സ്വര്‍ണവുമാണ് മോഷണം പോയത്. യുവതിയെ കോടതിയില്‍ ഹാജരാക്കി.
2022ലാണ് ചേര്‍ത്തല സ്വദേശിയുമായി ആതിരയുടെ വിവാഹം നടന്നത്.രൂപയും മാലയും വളയും കൊലുസുമെല്ലാമടങ്ങുന്ന 35 പവന്‍ സ്വര്‍ണവും ഡയമണ്ട് സ്റ്റഡും വീട്ടില്‍ നിന്ന് മോഷണം പോയതായി വീട്ടുകാര്‍ അറിയുന്നത് 2024 നവംബറിലാണ്. അന്ന് ഒന്നും അറിയാത്തത് പോലെ ആതിര അഭിനയിച്ചെന്ന് ഭര്‍ത്താവ് പറയുന്നു. പൊലീസ് സ്റ്റേഷനിലെത്തി കേസ് കൊടുക്കാനും ആതിര മുന്നില്‍ നിന്നു.പൂച്ചാക്കല്‍ പൊലീസ് കേസെടുത്ത് അന്വേഷണം തുടങ്ങിയപ്പോള്‍ തനിക്ക് ജോലി ലഭിച്ചെന്നും സൗകാര്യാര്‍ഥം സ്വന്തം വീട്ടില്‍ നില്‍ക്കാമെന്നും പറഞ്ഞ് ആതിര അങ്ങോട്ട് മാറി. ഒടുവില്‍ പൊലീസ് അന്വേഷണം ആതിരയിലേക്ക് നീളുമെന്ന് ഉറപ്പായതോടെ ഭര്‍ത്താവിനെ വീട്ടില്‍ വിളിച്ചുവരുത്തി എല്ലാം മോഷ്ടിച്ചത് താനെന്ന് കുറ്റം സമ്മതം നടത്തി.
