തിരുവനന്തപുരം: ശബരിമല തീര്‍ത്ഥാടകരെ രാത്രി വഴിയില്‍ ഇറക്കിവിട്ടെന്ന പരാതിയില്‍ കടുത്ത നടപടി. താല്‍ക്കാലിക ജീവനക്കാരനായ ബസ് ഡ്രൈവറെ പിരിച്ചുവിടാനും കണ്ടക്ടറെ സ്ഥലംമാറ്റാനും ഗതാഗത മന്ത്രി കെ ബി ഗണേഷ് കുമാര്‍ നിര്‍ദ്ദേശം നല്‍കി. തിരുവനന്തപുരത്തുളള പൂവാറില്‍ നിന്ന് കാസര്‍ഗോഡ് ജില്ലയിലെ കാഞ്ഞങ്ങാട്ടേക്കാണ് കണ്ടക്ടറെ സ്ഥലംമാറ്റിയത്. സംഭവത്തില്‍ അന്വേഷണത്തിനും മന്ത്രി നിര്‍ദ്ദേശം നല്‍കി.
കഴിഞ്ഞ രാത്രിയായിരുന്നു സംഭവം.പമ്പ -തിരുവനന്തപുരം കെഎസ്ആര്‍ടിസി ബസിലെ ഡ്രൈവര്‍ക്കെതിരെയാണ് തീര്‍ത്ഥാടകര്‍ പരാതിപ്പെട്ടത്. പമ്പയില്‍ നിന്നും നിലയ്‌ക്കല്‍ സ്റ്റാന്‍ഡിലേക്ക് ടിക്കറ്റ് എടുത്തവരെയാണ് വഴിയില്‍ ഇറക്കിവിട്ടത്. നിലയ്‌ക്കല്‍ സ്റ്റാന്‍ഡില്‍ കയറാതെ ഒരു കിലോമീറ്റര്‍ അപ്പുറം വനമേഖലയില്‍ തീര്‍ത്ഥാടകരെ ഇറക്കിവിട്ടെന്നാണ് പരാതി. വയോധികരും കുഞ്ഞും അടങ്ങുന്ന 13 അംഗം സംഘത്തിനാണ് ദുരനുഭവമുണ്ടായത്.
തീര്‍ത്ഥാടകരെ ബസില്‍ നിന്ന് ഇറക്കിവിടുന്ന ദൃശ്യങ്ങള്‍ പുറത്തുവന്നിരുന്നു. ഏറെ നേരം വനമേഖലയില്‍ കാത്തുനിന്നശേഷം വാഹനം വിളിച്ചുവരുത്തിയാണ് സംഘത്തിന് വീണ്ടും യാത്ര തുടങ്ങാനായത്.
