തിരുവനന്തപുരം: ഭിന്നശേഷി സംവരണത്തില്‍ എന്‍.എസ്.എസ്സിന് അനുകൂലമായ സുപ്രീം കോടതി ഉത്തരവ് സംസ്ഥാനത്തെ മുഴുവന്‍ എയ്ഡഡ് മാനേജ്മെന്റുകള്ക്കും ബാധകമാക്കുമെന്ന് പൊതുവിദ്യാഭ്യാസ വകുപ്പ് മന്ത്രി വി. ശിവന്‍കുട്ടി പ്രഖ്യാപിച്ചുവെങ്കിലും ഇത് സംബന്ധിച്ച് സുപ്രീം കോടതിയുടെ നിലപാട് ഇനിയും വ്യക്തമാകാനുണ്ട്. എന്‍.എസ്.എസ്. നല്‍കിയ കേസില്‍ ഭിന്നശേഷി തസ്തികകള്‍ ഒഴിച്ചിട്ട് ബാക്കിയുള്ളവര്‍ക്ക് അപ്രൂവല്‍ നല്‍കാന്‍ ഉത്തരവിട്ട വിധി എല്ലാ മാനേജ്മെന്റുകള്ക്കും ബാധകമാക്കണമെന്ന് ആവശ്യപ്പെട്ട് സര്‍ക്കാര്‍ സുപ്രീം കോടതിയില്‍ സത്യവാങ്മൂലം നല്‍കിയിട്ടുണ്ടെങ്കിലും കേസ് ഏപ്രില്‍ 14 നാണ് ഇനി പരിഗണിക്കുക. തെരഞ്ഞെടുപ്പ് വിജ്ഞാപനം ഉടന്‍ ഉണ്ടാകുമെന്നതിനാല്‍ തുടര്‍ നടപടികള്‍ വൈകും. ഫലത്തില്‍ അടുത്ത സര്‍ക്കാരിനേ സ്വാഭാവികമായി അതു ചെയ്യാന്‍ കഴിയൂ. ഏറെക്കാലമായി അധ്യാപക സംഘടനകളും മറ്റും ഇത്തരമൊരു ഉത്തരവിറക്കണമെന്ന് ആവശ്യമുന്നയിച്ചെങ്കിലും സര്‍ക്കാര്‍ കേട്ടഭാവം നടിച്ചിരുന്നില്ല. സുപ്രീം കോടതി വിധി വരട്ടെയെന്ന നിലപാടാണ് സര്‍ക്കാര്‍ പുലര്‍ത്തിയിരുന്നത്. എന്നാല്‍ തെരഞ്ഞെടുപ്പിന്‌റെ പടിവാതില്‍ക്കല്‍ നടത്തിയ ഈ പ്രഖ്യാപനം വോട്ടുതട്ടാനുള്ള സൂത്രപ്പണി മാത്രമാണെന്ന് വ്യക്തം.
