തിരുവനന്തപുരം: കണ്ടാല്‍ തന്നെ കൊതിയൂറും വിധം എണ്ണയില്‍ പൊരിച്ചും മറ്റുമുള്ള ഭക്ഷണ സാധനങ്ങള്‍ തെരുവോരത്തും കടകളിലും തുറന്നുവച്ചു വില്‍ക്കുന്നതു കണ്ടാല്‍ വാങ്ങി കഴിക്കരുതെന്ന് ഭക്ഷ്യസുരക്ഷാ വകുപ്പിന്‌റെ നിര്‍ദേശം. ആറ്റുകാല്‍ പൊങ്കാല പ്രമാണിച്ച് ഭക്തജനങ്ങള്‍ ഭക്ഷണ സാധനങ്ങള്‍ വാങ്ങുമ്പോള്‍ ശ്രദ്ധിക്കേണ്ട കാര്യങ്ങള്‍ സംബന്ധിച്ച മാര്‍ഗനിര്‍ദേശങ്ങളിലാണ് ഇക്കാര്യം ഓര്‍മ്മിപ്പിക്കുന്നത്. കൃത്യമായ ലേബല്‍ വിവരങ്ങള്‍ ഇല്ലാത്ത പായ്‌ക്കറ്റ് ഭക്ഷ്യവസ്തുക്കള്‍, മിഠായികള്‍, പഞ്ഞി മിഠായികള്‍, ഐസ് കാന്‍ഡി എന്നിവ ഉപയോഗിക്കാന്‍ പാടില്ലെന്നും നിര്‍ദേശിക്കുന്നു. മറ്റു നിര്‍ദേശങ്ങള്‍ ഇവയാണ്:
•നിശ്ചിത ഗുണനിലവാരമുള്ളതും ലേബല്‍ വിവരങ്ങള്‍ കൃത്യമായി രേഖപ്പെടുത്തിയിട്ടുള്ളതുമായ ഭക്ഷ്യ വസ്തുക്കള്‍ പൊങ്കാല നിവേദ്യത്തിനായി ഉപയോഗിക്കണം.
•തുറന്നിരിക്കുന്ന ഭക്ഷ്യവസ്തുക്കള്‍ വാങ്ങി ഉപയോഗിക്കാന്‍ പാടില്ല. (ശര്‍ക്കര, കല്‍ക്കണ്ടം, എണ്ണയില്‍ പൊരിച്ച ഭക്ഷണ സാധനങ്ങള്‍).
•അന്നദാനം, ദാഹജലം എന്നിവ വിതരണം ചെയ്യാന്‍ ആഗ്രഹിക്കുന്നവര്‍ പാചകത്തിന് ശുദ്ധജലവും വൃത്തിയുള്ള പാത്രങ്ങളും ഉപയോഗിക്കണം.
•ഭക്ഷണം കൈകാര്യം ചെയ്യുന്ന ആള്‍ക്ക് സാംക്രമിക രോഗങ്ങള്‍ ഒന്നുമില്ലെന്ന് ഉറപ്പുവരുത്തേണ്ടതും അസംസ്‌കൃത വസ്തുക്കള്‍ ഗുണനിലവാര മുള്ളതാണെന്ന് ഉറപ്പുവരുത്തണം.
•തിളപ്പിച്ച വെള്ളം കുടിക്കുന്നതിന് ശ്രദ്ധിക്കണം.
•സര്‍ബത്ത്, നാരങ്ങാവെള്ളം, തണ്ണിമത്തന്‍ മുതലായ ശീതള പാനീയങ്ങളില്‍ ശുദ്ധജലം ഉപയോഗിച്ച് നിര്‍മ്മിച്ച ഐസ് ആണോയെന്ന് ശ്രദ്ധിക്കണം.
•പാകം ചെയ്ത ഭക്ഷണ സാധനങ്ങള്‍ നിശ്ചിത ഉഷ്മാവില്‍ സൂക്ഷിച്ചിട്ടുണ്ടെന്ന് ഉറപ്പുവരുത്തേണ്ടതാണ്.
•പാകം ചെയ്ത ഭക്ഷണ സാധനങ്ങള്‍ വൃത്തിയുള്ള ചുറ്റുപാടിലാണ് വിതരണം ചെയ്യുന്നതെന്ന് ഉറപ്പുവരുത്തണം
•പൊതുജനങ്ങള്‍ക്ക് ഭക്ഷണത്തിലെ മായം കണ്ടുപിടിക്കുന്നതിനുള്ള പ്രാഥമിക പരിശോധന നടത്തുന്നതിന് സഞ്ചരിക്കുന്ന ഭക്ഷ്യസുരക്ഷാ ലബോറട്ടറിയുടെ സേവനം ക്ഷേത്രപരിസരത്ത് ലഭ്യമാണ്.
•ഭക്തജനങ്ങള്‍ക്ക് ഭക്ഷണവുമായി ബന്ധപ്പെട്ടുണ്ടാകുന്ന പരാതികള്‍ 1800 425 1126 എന്ന ടോള്‍ ഫ്രീ നമ്പറില്‍ വിളിച്ചറിയിക്കാം.
