ന്യൂദല്‍ഹി: ഡിജിറ്റല്‍ അറസ്റ്റ്, സൈബര്‍ തട്ടിപ്പുകളില്‍ കുടുങ്ങി വന്‍ തോതിലുള്ള ഇടപാടുകള്‍ നടത്തുന്നത് തടയാന്‍ ഉപഭോക്താക്കള്‍ക്ക് മുന്നറിയിപ്പ് നല്‍കുന്നതിനുള്ള സംവിധാനങ്ങള്‍ വികസിപ്പിക്കേണ്ടത് ബാങ്കുകളുടെ ഉത്തരവാദിത്തമാണെന്ന് സുപ്രീംകോടതി.
10,000 അല്ലെങ്കില്‍ 20,000രൂപ വരെ മാത്രം പിന്‍വലിക്കുന്ന ഒരു വിരമിച്ചയാള്‍ പെട്ടെന്ന് 25 ലക്ഷമോ 50 ലക്ഷമോ വരെയുള്ള ഇടപാടുകള്‍ നടത്തുമ്പോള്‍, ബാങ്കുകള്‍ മുന്നറിയിപ്പ് നല്‍കണമെന്ന് കോടതി അഭിപ്രായപ്പെട്ടു. സ്വമേധയാ എടുത്ത കേസിലാണ് കോടതിയുടെ നടപടി. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്‌മല്യ ബാഗ്ചി, ജസ്റ്റിസ് എന്‍.വി. അഞ്ജരിയ എന്നിവരടങ്ങിയ ബെഞ്ചാണ് കേസ് പരിഗണിച്ചത്. കേസുകളില്‍ ഫലപ്രദമായ അന്വേഷണത്തിന് വിവിധ ഏജന്‍സികളുടെ ഏകോപനം ഉറപ്പാക്കണമെന്ന് സുപ്രീംകോടതി നിര്‍ദ്ദേശിച്ചു. ഇത്തരം കേസുകള്‍ കൈകാര്യം ചെയ്യുന്നതിനായി ആര്‍ബിഐ മാനദണ്ഡങ്ങള്‍ തയ്യാറാക്കിയതായി കേന്ദ്രം കോടതിയെ അറിയിച്ചു. ഇത് രാജ്യവ്യാപകമായി നടപ്പാക്കുന്നതിനാവശ്യമായ നിര്‍ദ്ദേശങ്ങള്‍ പുറത്തിറക്കാന്‍ ആഭ്യന്തരമന്ത്രാലയത്തോട് സുപ്രീംകോടതി നിര്‍ദേശിച്ചു.
