കൊച്ചി: കണ്ടല് കക്കയെ ഹാച്ചറിയില് കൃത്രിമമായി പ്രജനനം നടത്തുന്നതില് വിജയിച്ച് കേന്ദ്ര സമുദ്രമത്സ്യ ഗവേഷണ സ്ഥാപനം (സിഎംഎഫ്ആര്ഐ). ലഭ്യത കുറഞ്ഞു വരുന്ന കക്ക വര്ഗത്തെ സംരക്ഷിക്കാന് വഴിതുറക്കുന്നതാണ് ഈ ശാസ്ത്രീയ നേട്ടം. പോഷക ഗുണമേറിയ വിഭവമായ കണ്ടല് കക്ക കൃഷിയിലൂടെ തീരദേശവാസികള്ക്ക് പുതിയ വരുമാന മാര്ഗം ഒരുക്കുന്നതിനും സഹായകമാകും.
മാരികള്ച്ചര് വിഭാഗം ശാസ്ത്രജ്ഞരാണ് ജിലോയ്ന ഇറോസ എന്ന ശാസ്ത്രനാമമുള്ള കക്കയുടെ വിത്തുത്പാദന സാങ്കേതികവിദ്യ വികസിപ്പിച്ചത്. കണ്ടല്ക്കാടുകളിലും കായലോരങ്ങളിലും കണ്ടുവരുന്ന കക്ക ഇനമാണിത്. സംസ്ഥാനത്ത് വടക്കന് കേരളത്തിലാണ് ഇവയെ കൂടുതലായി കാണപ്പെടുന്നത്.
അനിയന്ത്രിതമായ കക്ക വാരല്, മലിനീകരണം, കണ്ടല്ക്കാടുകളുടെ നാശം എന്നിവ കക്ക കുറയുന്നതിനുള്ള കാരണമാകുന്നുണ്ട്. പുതിയ സാങ്കേതികവിദ്യ വഴി ഉത്പാദിപ്പിക്കുന്ന കക്ക കുഞ്ഞുങ്ങളെ കണ്ടല് വനങ്ങളില് നിക്ഷേപിക്കുന്നതിലൂടെ വംശനാശ ഭീഷണി ഒഴിവാക്കാനും ഉത്പാദനം കൂട്ടാനും വഴിയൊരുക്കുമെന്നാണ് പ്രതീക്ഷ. അതിജീവനം വര്ദ്ധിപ്പിച്ച് വന്തോതില് വിത്തുത്പ്പാദനം നടത്തുന്നതിനുമുള്ള ശ്രമങ്ങള് പുരോഗമിക്കുകയാണെന്ന് ഗവേഷകര് അറിയിച്ചു.
