സന്തോഷ് ട്രോഫി: ഫൈനല്‍ നിരാശ വീണ്ടും; സസന്തോഷം സര്‍വീസസ്

ധകുവാഖാന: സന്തോഷ് ട്രോഫിയില്‍ വീണ്ടും കേരളത്തിന് ഫൈനല്‍ നിരാശ. സര്‍വീസസിനെതിരെ ഏകപക്ഷീയമായ ഒരു ഗോളിന് പരാജയപ്പെട്ടു. കിരീടനേട്ടത്തിനര്‍ഹമായ പോരാട്ടം കാഴ്‌ച്ചവച്ചെങ്കിലും അധികസമയത്തിലേക്ക് നീണ്ട മത്സരത്തില്‍ സര്‍വീസസ് 109 മിനിറ്റില്‍ വിജയഗോള്‍ നേടി.

സര്‍വീസസിന്റെ ഗോള്‍ പവര്‍ബാങ്ക് അഭിഷേക് പവാര്‍ ആണ് ഫൈനലിലും വിജയഗോള്‍ നേടിയത്. സന്തോഷ് ട്രോഫി ഫൈനല്‍സില്‍ അഭിഷേകിന്റെ ആകെ ഗോള്‍ നേട്ടം ഏഴ് ആണ്. ഇത്തവണ കേരളം ഫൈനലിന് മുമ്പ് ഫൈനല്‍സില്‍ തോല്‍വി നേരിട്ട ഏക ടീമും സര്‍വീസസ് ആയിരുന്നു.

ചരിത്രത്തില്‍ എട്ടാം സന്തോഷ് ട്രോഫി കിരീടമാണ് സര്‍വീസസ് നേടുന്നത്. ഏഴ് വീതം കിരീടങ്ങള്‍ നേടിയ ടീമുകള്‍ ഫൈനലില്‍ നേര്‍ക്കുനേര്‍ പോരാടിയത് കൗതുകമായിരുന്നു. ഇതോടെ ആസാം ആതിഥ്യമരുളിയ സന്തോഷ് ട്രോഫിയുടെ 79-ാം പതിപ്പിന് കൊടിയിറങ്ങുകയാണ്.

പ്രതിരോധം കൊണ്ട് വശംകെടുത്തി, ഒറ്റയടിക്ക് കഥ കഴിച്ചു

പ്രാഥമിക റൗണ്ടിലും ഫൈനല്‍സിലെ ആദ്യ റൗണ്ടിലും സെമിവരെയും അസാമാന്യ മികവോടെ മുന്നേറിയ ടീം ആണ് കേരളം. എതിരാളികളുടെ കരുത്ത് അറിഞ്ഞ് പൊരുതുക എന്ന തന്ത്രം മാത്രമാണ് സര്‍വീസസിന് മുന്നിലുണ്ടായിരുന്ന പോംവഴി. ഒപ്പം ആദ്യറൗണ്ടില്‍ 1-0ന് ജയിച്ചതിന്റെ ആത്മവിശ്വാസവും.

കരുത്തന്‍ പഞ്ചാബിനെ സെമിയില്‍ 4-0ന് കീഴടക്കിയ അതേ ടെംപോയിലാണ് കേരളം സര്‍വീസസിനെതിരെയും തുടങ്ങിയത്. കരുത്തന്‍ ആക്രമണത്തിന് മുന്നില്‍ വിഖ്യാതമായ ബസ് ബേ പ്രതിരോധ ശൈലി മാത്രമാണ് സര്‍വീസസിന് മുന്നിലുണ്ടായിരുന്ന രക്ഷ. ആറ് പേര്‍ പ്രതിരോധത്തിലേക്ക് ഇറങ്ങിക്കളിച്ചു. കേരളത്തിന്റെ മുന്നേറ്റങ്ങള്‍ ഏതു വിധേനയും പെനാല്‍റ്റി ബോക്‌സിനടുത്തുപോലും എത്തിക്കരുതെന്നായിരുന്നു അജണ്ട. സര്‍വ്വ ശക്തിയോടെ പൊരുതിയ കേരളത്തിന്റെ മുന്നേറ്റങ്ങള്‍ ഒന്നൊന്നായി തകര്‍ന്നുവീഴുമ്പോള്‍ ടീമിന്റെ മനോവീര്യവും ക്ഷയിച്ചുകൊണ്ടിരുന്നു. ഈ സമയത്ത് ഒരൊറ്റ ഗോളില്‍ മത്സരം സ്വന്തമാക്കാനാകുമെന്ന കൃത്യമായ കണക്കുകൂട്ടലിലായിരുന്നു സര്‍വീസസ്. അത്തരം പ്രസിദ്ധമായ അന്താരാഷ്‌ട്ര മത്സരങ്ങളുടെ ഉദാഹരണങ്ങള്‍ നിരവധിയുണ്ട്. 2010 ലോകകപ്പില്‍ നെതര്‍ലന്‍ഡ്‌സിനെ അധികസമയത്തെ ഏക ഗോളില്‍ കീഴടക്കി കിരീടം നേടിയ സ്‌പെയിന്‍, 2014ല്‍ ഇതേ ശൈലിയില്‍ അര്‍ജന്റീനയെ കീഴടക്കി കിരീടം ചൂടിയ ജര്‍മനി. ഇതിന് സമാനം 109-ാം മിനിറ്റില്‍ കിട്ടിയൊരു കൗണ്ടര്‍ അറ്റാക്കില്‍ സര്‍വീസസ് കുതിച്ചു. പകരക്കാരനായി ഇറങ്ങിയ പ്രതിരോധ താരം ശുഭം റാണ ഇടത് ഭാഗത്ത് നിന്ന് നല്‍കിയൊരു ക്രോസിനെ അഭിഷേക് പവാര്‍ വലയിലെത്തിച്ചു. ഇതോടെ കേരളം സ്തബ്ധരായി. പിന്നെയൊരു തിരിച്ചടിക്കോ തിരിച്ചവരവിനോ ആവതുണ്ടായില്ല. അത്രമാത്രം കേരളത്തിന്റെ കരുത്തന്‍ നിര തളര്‍ന്നിരുന്നു.