ന്യൂദല്ഹി: എയ്ഡഡ് സ്കൂള് നിയമനങ്ങളിലെ ഭിന്നശേഷി സംവരണത്തില് എന്എസ്എസിന് ലഭിച്ച അനുകൂല വിധി നിയമസഭാ തെരഞ്ഞെടുപ്പിന് മുന്നേ മറ്റ് മാനേജ്മെന്റുകള്ക്കും നടപ്പാക്കി അതിന്റെ ഗുണം നേടിയെടുക്കാനുളള കേരള സര്ക്കാര് നീക്കത്തിന് സുപ്രീം കോടതിയില് തിരിച്ചടി. കേസ് പരിഗണിക്കുന്നത് കോടതി ആറ് ആഴ്ചത്തേക്ക് മാറ്റി.
സര്ക്കാരിന്റെ ആവശ്യം അംഗീകരിക്കരുതെന്ന് സിംഗിള് എയ്ഡഡ് മാനേജ്മെന്റുകള്ക്ക് കീഴിലെ താത്കാലിക അധ്യാപകരും ഭിന്ന ശേഷിക്കാരും സുപ്രീം കോടതിയില് ആവശ്യപ്പെട്ടു.ഭിന്നശേഷി ഉദ്യോഗാര്ത്ഥികളുടെ അവസരം ഇല്ലാതാക്കാനാണ് സര്ക്കാര് ശ്രമമെന്ന് ഭിന്നശേഷിക്കാരുടെ അഭിഭാഷകര് വാദിച്ചു.തുടര്ന്ന് കേസ് പരിഗണിക്കുന്നത് സുപ്രീം കോടതി ആറ് ആഴ്ചത്തേക്ക് മാറ്റുകയായിരുന്നു.
എയ്ഡഡ് സ്കൂള് നിയമനങ്ങളിലെ ഭിന്നശേഷി സംവരണത്തില് എന് എസ് എസിന് അനുകൂലമായ വിധി മറ്റ് മാനേജ്മെന്റുകള്ക്ക് കൂടി ബാധകം ആക്കുന്നതാണ് നീതിയെന്ന് പറഞ്ഞാണ് കേരളം സുപ്രീം കോടതിയെ സമീപിച്ചത്.ക്രിസ്ത്യന് മാനേജ്മന്റുകള് ഈ ആവശ്യം നിരന്തരം ഉന്നയിച്ച് വരികയാണ്. സുപ്രീം കോടതി വിധി തങ്ങളുടെ മാനേജമന്റുകള്ക്ക് ബാധകമാക്കാത്തതില് ക്രിസ്ത്യന് മാനേജ്മന്റുകള് സര്ക്കാരിനെ വിമര്ശിച്ചിരുന്നു. ആറ് ആഴ്ചത്തേക്ക് ഹര്ജി സുപ്രീം കോടതി മാറ്റിയതോടെ നിയമസഭാ തെരഞ്ഞെടുപ്പിന് മുന്നേ നടപ്പാക്കി വോട്ട് പിടിക്കാം എന്ന തന്ത്രമാണ് പാളിയത്.
