കോഴിക്കോട്: നിയമസഭാ തിരഞ്ഞെടുപ്പ് പ്രഖ്യാപിക്കും മുന്പു തന്നെ യുഡിഎഫില് വിലപേശല് തുടങ്ങി. അധികാരത്തില് വന്നാല് ഉപമുഖ്യമന്ത്രി പദം വേണമെന്ന് മുസ്ലീം ലീഗ് ആവശ്യപ്പെട്ടു. ഉപമുഖ്യമന്ത്രി പദം തങ്ങള്ക്ക് അര്ഹതപ്പെട്ടതാണെന്നും ലീഗിന്റെ പ്രകടനം കണക്കിലെടുത്ത് വിഷയം മുന്നണിയില് പരിഗണിക്കണമെന്നും ലീഗ് സംസ്ഥാന സെക്രട്ടറിയേറ്റ് അംഗം കെ എന് എ ഖാദര് ഒരു ചാനലിനോട് പറഞ്ഞു.
ആവശ്യപ്പെടാതെ തന്നെ ഉപമുഖ്യമന്ത്രി പദം ലീഗിന് തരുമെന്നാണ് പ്രതീക്ഷയെന്ന് അദ്ദേഹം വ്യക്തമാക്കി. ഉപമുഖ്യമന്ത്രി ആലങ്കാരിക പദവിയാകാം, മുസ്ലീം ലീഗിനെ അര്ഹമായ പദവിയില് പ്രതിഷ്ഠിക്കണം എന്ന ധാരണ മറ്റുള്ളവര്ക്ക് വേണം. മുന്നണിയിലെ എല്ലാവരും അത് അംഗീകരിക്കുമെന്നാണ് പ്രതീക്ഷിക്കുന്നത്. അതിനുള്ള സ്റ്റാറ്റസും അര്ഹതയും ലീഗിനുണ്ട്. ആ ബോധ്യം എല്ലാ ഘടക കക്ഷികള്ക്കും ഉണ്ടാകണം. ഖാദര് പറഞ്ഞു.
