ന്യൂദൽഹി : റിപ്പബ്ലിക് ദിനം ആഘോഷിക്കാൻ ഒരുങ്ങുകയാണ് ഇന്ത്യ . ഈ വർഷം, റിപ്പബ്ലിക് ദിന പരേഡിൽ സെൻട്രൽ റിസർവ് പോലീസ് സേനയുടെ (CRPF) പുരുഷ സംഘത്തെ നയിക്കുന്നത് 26 കാരിയായ സിമ്രാൻ ബാല എന്ന വനിതാ കമാൻഡോയാണ്.
ജമ്മു കശ്മീരിലെ രജൗരി ജില്ലയിലെ നൗഷേരയിൽ നിന്നുള്ള 26 കാരിയായ സിമ്രാൻ ബാല സിആർപിഎഫിൽ അസിസ്റ്റന്റ് കമാൻഡന്റായി സേവനമനുഷ്ഠിക്കുന്നു. 140-ലധികം പുരുഷ ഉദ്യോഗസ്ഥരാണ് സംഘത്തിലുള്ളത്. രജൗരി ജില്ലയിൽ നിന്ന് സിആർപിഎഫിൽ ചേരുന്ന ആദ്യ വനിതാ ഓഫീസറാണ് സിമ്രാൻ.
സിമ്രാൻ ബാല 2023 ലാണ് സൈന്യത്തിൽ ചേർന്നത്. 2023 ൽ യുപിഎസ്സി സെൻട്രൽ ആംഡ് പോലീസ് ഫോഴ്സ് (സിഎപിഎഫ്) പരീക്ഷയിൽ ആദ്യ ശ്രമത്തിൽ തന്നെ അവർ വിജയിച്ചു . 2023 ൽ ജമ്മു കശ്മീരിൽ നിന്ന് തിരഞ്ഞെടുക്കപ്പെട്ട ഏക വനിതാ അസിസ്റ്റന്റ് കമാൻഡന്റാണ് അവർ. സിആർപിഎഫ് പുരുഷ സംഘത്തെ നയിച്ചുകൊണ്ട് 26 കാരിയായ സിമ്രാൻ ബാല ചരിത്രം സൃഷ്ടിക്കാനൊരുങ്ങുകയാണ്. റിപ്പബ്ലിക് ദിന പരേഡ് റിഹേഴ്സലിൽ മികച്ച പ്രകടനം കാഴ്ചവച്ചതിന് ശേഷമാണ് പുരുഷ സംഘത്തെ നയിക്കാനുള്ള ഉത്തരവാദിത്തം സിമ്രാന് ലഭിച്ചത്. പരിശീലനത്തിനിടെ സിമ്രാൻ കാഴ്ച്ച വച്ച ആത്മവിശ്വാസം, കൃത്യത, കമാൻഡ് എന്നിവ വളരെ വലുതാണെന്ന് ഉദ്യോഗസ്ഥർ പറയുന്നു.
