ആലപ്പുഴ: വി ഡി സതീശന് എസ്എന്ഡിപി യോഗത്തെ തെരുവിലിട്ട് ആക്ഷേപിക്കുന്നുവെന്ന് വെള്ളാപ്പള്ളി നടേശന്. ഇത് സംബന്ധിച്ച് കോണ്ഗ്രസ് നിലപാട് വ്യക്തമാക്കണമെന്ന് വെള്ളാപ്പള്ളി തന്റെ ഫേസ്ബുക്ക് കുറിപ്പില് ആവശ്യപ്പെട്ടു.
സവര്ണ ഫ്യൂഡല് മാടമ്പി മാനസികാവസ്ഥയാണ് സതീശന്റേത്.എല്ലാ മതസാമുദായിക സംഘടനകളെയും നേരിട്ടും അല്ലാതെയും ആക്ഷേപിക്കുന്ന നിലപാടാണ് സതീശന്റേത്. ശ്രീനാരായണ ഗുരുദേവന്റെ ദര്ശനങ്ങളിലൂന്നി രാജ്യംമുഴുവന് പ്രചരണം നടത്തുന്ന ലോക് സഭ പ്രതിപക്ഷനേതാവ് രാഹുല്ഗാന്ധിയുടെയും പിന്നാക്ക ദളിത് വിഭാഗങ്ങളുടെ പ്രതിനിധിയായ കോണ്ഗ്രസ് അദ്ധ്യക്ഷന് മല്ലികാര്ജ്ജുന ഖാര്ഗെയുടെയും അറിവോടെയാണോ ഇങ്ങനെ ചെയ്യുന്നതെന്ന് വ്യക്തമാക്കണമെന്ന് വെളളാപ്പളളി പറയുന്നു.
ബിഹാറിലെ നിയമസഭാ തിരഞ്ഞെടുപ്പില് ഉള്പ്പെടെ പിന്നാക്ക വിഭാഗങ്ങള്ക്ക് അധികാരത്തില് ഉള്പ്പെടെ അര്ഹമായ നീതി ഉറപ്പാക്കുമെന്നു പറഞ്ഞു പ്രചാരണം നടത്തിയ രാഹുല് ഗാന്ധിയെ സതീശന് വെല്ലുവിളിക്കുകയല്ലേ ഇതിലൂടെ ചെയ്യുന്നത്. ശ്രീനാരായണഗുരുദേവ തൃക്കരങ്ങളാല് സ്ഥാപിതമായ എസ്.എന്.ഡി.പി യോഗത്തെ മാത്രമല്ല ഗുരുദേവ ദര്ശനങ്ങളെകൂടിയാണ് സതീശന് ആക്ഷേപിക്കുന്നതെന്ന് വെളളാപ്പളളി പറയുന്നു. ഇതാദ്യമായല്ല സതീശന് എസ്.എന്.ഡി.പി യോഗത്തെ ആക്ഷേപിക്കുന്നത്. പറവൂരില് ഉള്പ്പെടെ ഈഴവ സമുദായത്തിന്റെ പിന്തുണ മറന്നുകൊണ്ടാണ് സതീശന്റെ നീക്കങ്ങള്. ശ്രീനാരായണ ഗുരുവിന്റെ നേതൃത്വത്തില് തുടച്ചു നീക്കിയ ഉച്ചനീചത്വത്തിന്റെയും തൊട്ടുകൂടായ്മയുടെയും കാലത്തേക്ക് കേരളത്തെ വീണ്ടും തിരികെ കൊണ്ടുപോകാനാണു സതീശന്റെ ശ്രമം.
സമുദായ നേതാക്കളുടെ തിണ്ണ നിരങ്ങില്ലെന്നു വീമ്പിളക്കുന്ന സതീശന് എന് .എസ്.എസ് ആസ്ഥാനത്ത് ഒന്നര മണിക്കൂര് തിണ്ണ നിരങ്ങിയ കഥ പുറത്തു വന്നു. കൊച്ചിയില് സിറോ മലബാര് സഭയുടെ സിനഡ് നടന്നപ്പോള് അവിടെ മറ്റൊരു കാറില് ആരും അറിയാതെ സതീശന് പോയത് എന്തിനാണ്. ആരുമറിയാതെ തിണ്ണ നിരങ്ങുന്ന സതീശന്റെ ഇരട്ടമുഖമാണിത്. എസ്.എന്.ഡി.പി യോഗത്തെ ആക്ഷേപിക്കുന്ന സതീശന്, ശിവഗിരിയില് പ്രസംഗിക്കാന് പോയപ്പോള് എന്തുകൊണ്ട് ഇതേ നിലപാട് സ്വീകരിച്ചില്ല.അതു സതീശന്റെ പ്രീണന നയവും ഇരട്ടത്താപ്പുമാണെന്ന് വെളളാപ്പളളി പറഞ്ഞു.
