ആലപ്പുഴ: ജമാഅത്തെ ഇസ്ലാമിക്കും, മുസ്ലീംലീഗിനുമെതിരെ പ്രസ്താവനകള് നടത്തി മുതലെടുപ്പിന് ശ്രമിക്കുന്ന മന്ത്രി സജി ചെറിയാന്റെ കാപട്യം ചര്ച്ചയാകുന്നു. സ്വന്തം ജില്ലയായ ആലപ്പുഴയില് നിരോധിത മതഭീകരസംഘടനയായ പിഎഫ്ഐയുടെ രാഷ്ട്രീയ മുഖം എസ്ഡിപിഐയുമായും, മദനിയുടെ പിഡിപിയുമായും അവിശുദ്ധ സഖ്യത്തില് ഏര്പ്പെട്ടാണ് വര്ഗീയതയ്ക്കെതിരെ സജി ചെറിയാനും സിപിഎമ്മും ഉണ്ടയില്ലാവെടി പൊട്ടിക്കുന്നതെന്നാണ് വിമര്ശനം.
മുസ്ലീം ലീഗിന്റെ തീവ്രത പോരെന്ന് പറഞ്ഞ് രൂപീകരിച്ച ഐഎന്എല്ലിനെ ഘടകകക്ഷിയാക്കിയതും എംഎല്എ സ്ഥാനം നല്കിയതും, പിന്നീട് മന്ത്രി സ്ഥാനം വരെ നല്കി മാന്യതയുടെ പരിവേഷം നല്കിയതും സിപിഎമ്മാണെന്നതാണ് ശ്രദ്ധേയം.
ഇത്തവണ ആലപ്പുഴ നഗരസഭയില് സ്റ്റാന്ഡിങ് കമ്മിറ്റി തെരഞ്ഞെടുപ്പില് എല്ഡിഎഫ് വിജയിച്ചത് എസ്ഡിപിഐയുടെയും പിഡിപിയുടെയും പിന്തുണയിലാണ്. യുഡിഎഫിനും എല്ഡിഎഫിനും ഭൂരിപക്ഷം ഇല്ലാത്ത നഗരസഭയില് സ്വതന്ത്രന്റെ പിന്തുണയിലാണ് യുഡിഎഫ് ഭരണം. എന്നാല് മതതീവ്രവാദ സംഘടനകളെ ഒപ്പംകൂട്ടി എല്ഡിഎഫ് സ്റ്റാന്ഡിങ് കമ്മിറ്റികള് പിടിച്ചെടുക്കുകയായിരുന്നു. ഇവിടെ ആദ്യമായി പിഡിപിക്ക് സ്റ്റാന്ഡിങ് കമ്മിറ്റി ചെയര്മാന് സ്ഥാനവും സിപിഎം സമ്മാനമായി നല്കി. വിദ്യാഭ്യാസ, കലാകായികകാര്യ സ്റ്റാന്ഡിങ് കമ്മിറ്റി ചെയര്മാനായി പിഡിപിയുടെ കൗണ്സിലര് ഫൈസല് എസ്. നറുക്കെടുപ്പിലൂടെയാണ് തെരഞ്ഞെടുക്കപ്പെട്ടത്. കോണ്ഗ്രസിന്റെ കൗണ്സിലറുമായാണ് ചെയര്മാന് സ്ഥാനത്തേക്ക് മത്സരിച്ചത്. സിപിഎം കൗണ്സിലര്മാര് ഫൈസലിനെ പിന്തുണച്ചതോടെ ഇരുവര്ക്കും തുല്യവോട്ട് ലഭിക്കുകയായിരുന്നു. ഇതോടെയാണ് നറുക്കിട്ടത്.
മുസ്ലീം ചെറുപ്പക്കാരില് തീവ്രവാദ ചിന്ത വളര്ത്തുന്നതില് മദനിക്ക് പങ്കുണ്ടെന്ന് സിപിഎം സംസ്ഥാന സമിതി അംഗം പി. ജയരാജന് തന്റെ പുസ്തകത്തില് അടക്കം പരാമര്ശിച്ചതിന് പിന്നാലെയാണ് ആലപ്പുഴ നഗരസഭയില് സ്റ്റാന്ഡിങ് കമ്മിറ്റി ചെയര്മാന് സ്ഥാനം പിഡിപിക്ക് നല്കിയത് എന്നതും ശ്രദ്ധേയം. 1993 ലെ ഒറ്റപ്പാലം ലോക്സഭാ തെരഞ്ഞെടുപ്പില് എല്ഡിഎഫ് സ്ഥാനാര്ത്ഥിക്ക് വേണ്ടി മദനി തെരഞ്ഞെടുപ്പ് പര്യടനം നടത്തിയിരുന്നു. ഇഎംഎസ് മദനിയെ മഹാത്മാഗാന്ധിയോടാണ് അന്ന് ഉപമിച്ചത്. മതഭീകര സംഘടനകള്ക്ക് മാന്യതയുടെ പരിവേഷം നല്കി കൂടെക്കൂട്ടി എങ്ങിനെയും അധികാരത്തിലെത്തുക എന്ന നയമാണ് സിപിഎം പയറ്റുന്നത്. എസ്ഡിപിഐ, പിഡിപി, ഐഎന്എല് എന്നിവരെ ഇടത് മുന്നണിക്കൊപ്പം കൂടെകൂട്ടിയാണ് മാറാട് കലാപത്തെക്കുറിച്ചും മറ്റും സിപിഎം നേതാക്കള് ഓര്മ്മിപ്പിക്കുന്നത് എന്നതാണ് ശ്രദ്ധേയം.
കഴിഞ്ഞ പല തെരഞ്ഞെടുപ്പുകളിലും എസ്ഡിപിഐയും പിഡിപിയും സംസ്ഥാനതലത്തില് ഇടതുപക്ഷത്തെ, പ്രത്യേകിച്ച് സിപിഎമ്മിനെയാണ് പിന്തുണയ്ക്കുന്നത്. സജി ചെറിയാന്റെ ചെങ്ങന്നൂരിലെ തുടര്ച്ചയായ വിജയത്തിന് പിന്നിലും എസ്ഡിപിഐ സഹായം ഉണ്ടെന്നത് പരസ്യമായ രഹസ്യമാണ്. പിഡിപിയാകട്ടെ പരസ്യ പിന്തുണയാണ് സിപിഎമ്മിന് നല്കുന്നത്.
