കോട്ടയം: എസ് എന്‍ ഡി പി യോഗം ജനറല്‍ സെക്രട്ടറി വെളളാപ്പളളി നടേശനുമായി ചര്ച്ചയ്ക്ക് തയാറാണെന്ന് എന്‍ എസ് എസ് ജനറല്‍ സെക്രട്ടറി ജി സുകുമാരന്‍ നായര്‍. എന്‍ എസ് എസ് -എസ് എന്‍ ഡി പി ഐക്യത്തെ കുറിച്ച് വെളളാപ്പളളി ഇതു വരെ സംസാരിച്ചിട്ടില്ല.ആവശ്യമുന്നയിച്ചാല്‍ നേതൃതലത്തില്‍ ആലോചിച്ച് തീരുമാനിക്കും.
മുതിര്‍ന്ന സമുദായ നേതാവായ വെളളാപ്പളളിയെ ആക്ഷേപിക്കുന്നത് രാഷ്‌ട്രീയ നേതാക്കള്‍ക്ക് ഭൂഷണമല്ലെന്നും ജി സുകുമാരന്‍ നായര്‍ പറഞ്ഞു.വെളളാപ്പളളിയെ മുഖ്യമന്ത്രി കാറില്‍ കയറ്റിയതിനെയാണ് അധിക്ഷേപിക്കുന്നത്. വെളളാപ്പളളി കാര്‍ കണ്ടിട്ടില്ലാത്ത ആളാണോ ആക്ഷേപിക്കാന്‍.വെളളാപ്പളളി കാര്‍ കണ്ട ശേഷമാകും ആക്ഷേപിക്കുന്നവര്‍ കാര്‍ കണ്ടതെന്നും എന്‍ എസ് എസ് ജനറല്‍ സെക്രട്ടറി പറഞ്ഞു.
എന്‍ എസ് എസിനെയും എസ് എന്‍ ഡി പി യോഗത്തെയും തമ്മില്‍ തല്ലിച്ചത് യു ഡി എഫ് ആണെന്ന വെളളാപ്പളളിയുടെ പ്രതികരണം സംബന്ധിച്ച്, തനിക്ക് ഈ വിഷയത്തില്‍ അഭിപ്രായം ഉണ്ടെങ്കിലും ഇപ്പോള്‍ അതേക്കുറിച്ച് പറയുന്നില്ല എന്ന് ജി സുകുമാരന്‍ നായര്‍ പറഞ്ഞു.
എന്‍ എസ് എസുമായി സമരസപ്പെടുമെന്ന് നേരത്തേ വെളളാപ്പളളി നടേശന്‍ പറഞ്ഞിരുന്നു.കൊമ്പുകോര്‍ക്കാനില്ലെന്നും അദ്ദേഹം വെളിപ്പെടുത്തി. പ്രതിപക്ഷ നേതാവ് വി ഡി സതീശന്‍ മുഖ്യമന്ത്രി സ്ഥാനം ലക്ഷ്യമിട്ട് വര്‍ഗ്ഗീയവാദികള്‍ക്ക് കുടപിടിക്കുകയാണെന്നും കുറ്റപ്പെടുത്തി.യു ഡി എഫ് അധികാരത്തില്‍ എത്തിയാല്‍ മുസ്ലീം ലീഗ് ആകും ഭരിക്കു എന്നും ആവര്‍ത്തിച്ചു.
