കളമശേരി: ബ്രഹ്മപുരം ഖരമാലിന്യ സംസ്കരണ പ്ലാന്റില് 2023 മാര്ച്ചിലുണ്ടായ മാലിന്യക്കൂമ്പാരത്തിലെ തീപ്പിടിത്തം നഗരത്തിലെ വായു മലിനീകരണം കുത്തനെ ഉയര്ത്തിയതായും എന്നാല് കാലാവസ്ഥാ ഘടകങ്ങള് മലിനീകരണം കുറയ്ക്കാന് നിര്ണായകമായെന്നും പുതിയ ഗവേഷണം.
പഠനം അനുസരിച്ച് തീപ്പിടിത്തം രണ്ട് ഘട്ടത്തിലായാണ് ഉണ്ടായത്. മാര്ച്ച് 4-13 ആദ്യഘട്ടം, മാര്ച്ച് 19-28 രണ്ടാംഘട്ടം. ആദ്യഘട്ടത്തില്, വൈറ്റിലയിലെ സെന്ട്രല് പൊല്യൂഷന് കണ്ട്രോള് ബോര്ഡിന്റെ നിരീക്ഷണ കേന്ദ്രത്തില് നിന്നുള്ള ഡാറ്റ പ്രകാരം- അന്തരീക്ഷ മലിനീകരണത്തില് പ്രധാന പങ്കുവഹിക്കുന്ന പിഎം 2.5, 152% ഉം, പിഎം 10 175% ഉം, എന് ഒ2, 440% ഉം, എസ്ഒ2 420% ഉം, സാധാരണ നിലയെ അപേക്ഷിച്ച് വര്ധിച്ചതായി കണ്ടെത്തി.
അന്തരീക്ഷത്തില് മാലിന്യഘടകങ്ങളുടെ സാന്ദ്രത കൂടുതലായി നിലനിന്നത് അതിരാവിലെയാണെന്ന് പഠനം സൂചിപ്പിക്കുന്നു. അന്തരീക്ഷം കൂടുതല് സ്ഥിരതയുള്ള അവസ്ഥയിലായതിനാല് വായുവിന്റെ മിശ്രണവും വ്യാപനവും കുറക്കുകയും, അതിനാല് പൊടിപടലങ്ങള് അന്തരീക്ഷത്തിന്റെ താഴെത്തട്ടില് തന്നെ കുടുങ്ങി സാന്ദ്രത ഉയര്ന്നതായും പഠനം വ്യക്തമാക്കുന്നു.
ആദ്യഘട്ടത്തില് കിഴക്ക് നിന്ന് പടിഞ്ഞാറോട്ടായി അധികമായി വീശിയ കാറ്റ് കാരണം പൊടിപടലങ്ങളും വിഷാംശമുള്ള വാതകങ്ങളും നഗരപ്രദേശങ്ങളില് നിന്ന് മാറി കിഴക്കന് അറബിക്കടലിന്റെ ഭാഗത്തേക്ക് സഞ്ചരിച്ചത് നഗര പ്രദേശങ്ങളിലെ തീവ്രത കുറയാന് സഹായിച്ചു. തുടര്ന്നുള്ള ദിവസങ്ങളില് ഉണ്ടായ മഴ ഇവ നീക്കുന്നതില് കൂടുതല് ആശ്വാസമായി. മാസത്തിന്റെ മധ്യഭാഗത്ത് തുടര്ച്ചയായി ഉണ്ടായ മഴപെയ്ത്തുകള് മലിനീകരണങ്ങള് വെറ്റ് ഡെപ്പോസിഷന് വഴി കഴുകിക്കളഞ്ഞ് വായുവിന്റെ ഗുണനിലവാരം മെച്ചപ്പെടുത്തി. അന്തരീക്ഷം അമിതമായി മലിനീകരിക്കപ്പെടാതെ നിലനിന്നതിന് പ്രധാന കാരണമായി ഇതുമാറി.
കാറ്റിന്റെ സ്വാധീനത്തില് മലിനീകരണം നിറഞ്ഞ പൊടിപടലങ്ങള് കടലിലേക്ക് പടര്ന്നപ്പോള് തെക്കുകിഴക്കന് അറബിക്കടല് ഭാഗത്ത് ക്ലോറോഫില്- എ വര്ധിച്ചതായി പഠനം റിപ്പോര്ട്ട് ചെയ്യുന്നു. സാധാരണമായി അപ് വെല്ലിങ്ങ് (സമുദ്രത്തിന്റെ അടിത്തട്ടില് നിന്ന് തണുപ്പുള്ളതും പോഷകങ്ങള് നിറഞ്ഞതുമായ ജലം ഉപരിതലത്തിലേക്ക് വരുന്ന പ്രക്രിയ) മൂലം ഇത്തരമൊരു വര്ധന വരാം. എന്നാല് ഈ കാലയളവില് കടല് താപനില സാധാരണയേക്കാള് ഉയര്ന്ന തോതില് രേഖപ്പെടുത്തിയതിനാല് അപ്വെല്ലിങ് ഇല്ലാതെ തന്നെ, തീപ്പിടിത്തത്തില് നിന്നുള്ള കണികകളുടെ നിക്ഷേപം വഴി സമുദ്ര ഉല്പാദനത്തില് മാറ്റം വന്നിരിക്കാം എന്നതാണ് ഗവേഷകരുടെ വിലയിരുത്തല്.
കുസാറ്റിലെ അഡ്വാന്സ്ഡ് സെന്റര് ഫോര് അറ്റ്മോസ്ഫെറിക് റഡാര് റിസര്ച്ച് ഡയറക്ടറായ ഡോ. എസ്. അഭിലാഷിന്റെ മേല്നോട്ടത്തിലാണ് പഠനം നടത്തപ്പെട്ടത്. ഗവേഷക സംഘത്തില് ശ്രീനാഥ് എ.വി, റിസര്ച്ച് ഫെലോ, മോനാഷ്, പ്രിതം ദാസ് മഷാപര്ഹ്ര, റിസര്ച്ച് ഫെലോ, ഇന്ത്യന് ഇന്സ്റ്റിറ്റ്യൂട്ട് ഓഫ് ട്രോപ്പിക്കല് മീറ്റിയറോളജി, വിനോദ്, കുസാറ്റ്, ഡോ. ആനന്ദ്, കുസാറ്റ് എന്നിവരും, എം.ജി സര്വകലാശാലയിലെയും ഒമാനിലെ യൂണിവേഴ്സിറ്റി ഓഫ് നിസ്വയിലെയും ഗവേഷകരും പഠനത്തില് പങ്കെടുത്തു.
