തൃശൂര് : ‘ ഇറ്റ്സ് അമൈസിങ് …. ഹൗ ദേ കാന്?’ ലിത്വാനിയക്കാരിയായ മൊണിക്കയ്ക്കും ഭര്ത്താവ് ബോബി ചിക്കിനും അത്ഭുതം. ആണ്കുട്ടികളുടെ ഭരതനാട്യ സദസിലിരുന്ന് ഇരുവരും ആശ്ചര്യത്തോടെയാണ് മത്സരം കണ്ടത്. അത്ഭുതം അടക്കാനാകാതെ വന്നതോടെ വേദിക്ക് പിന്നിലെത്തി. മേക്കപ്പിട്ട കുട്ടികളെ അടുത്ത് കണ്ടു. കണ്ടംപററി ഡാന്സറായ മൊണിക്കയ്ക്ക് മുദ്രകളെ പറ്റി അറിയണം. മത്സരത്തിനായി തയാറായി നിന്ന ഇടുക്കി വണ്ടന്മേട് എംഇഎസ് ഹയര് സെക്കന്ഡറി സ്കൂളിലെ ആര്യന് ഈശ്വരന് ഭരതനാട്യം മുദ്രകളൊക്കെ കാണിച്ച് കൊടുത്തു. ചിലത് ഇരുവരെയും കൊണ്ട് ചെയ്യിപ്പിച്ചു. തെറ്റിയപ്പോള് ഇരുവര്ക്കും ചിരി.
തൊണ്ണൂറു ദിവസത്തെ ഇന്ത്യാ സന്ദര്ശനത്തിനെത്തിയതായിരുന്നു ഇംഗ്ലണ്ട് സ്വദേശിയായ ബോബി ചികും ഭാര്യ മൊണിക്കയും. ഡിസംബര് 24 ന് ഭാരതത്തിലേക്ക് എത്തിയ ഇരുവരും മുംബൈ, ഗോവ എന്നിവിടങ്ങളില് പോയശേഷം കഴിഞ്ഞദിവസം തിരുവനന്തപുരം വര്ക്കലയിലെത്തി. അവിടെ നിന്നാണ് ഇന്നലെ രാവിലെ തൃശൂരില് എത്തിയത്. തൃശൂരിലെ ഹോട്ടലില് നിന്നാണ് കലോത്സവത്തെ കുറിച്ച് അറിഞ്ഞത്. അഞ്ച് വയസ് മുതല് കണ്ടംപററി ഡാന്സ് ചെയ്യുന്നുണ്ട് മൊണിക്ക. പരമ്പരാഗത നൃത്തങ്ങള് ഉള്പ്പെടെയുള്ള പരിപാടികള് ഉണ്ടെന്ന് അറിഞ്ഞതോടെയാണ് ഇരുവരും വടക്കുംനാഥ ക്ഷേത്ര മൈതാനത്തെ വേദി ‘പാരിജാത’ത്തിലേക്ക് എത്തിയത്.
ഹോസ്പിറ്റാലിറ്റി മേഖലയിലാണ് ബോബി ജോലി ചെയ്യുന്നത്. അഭിഭാഷക കൂടിയാണ് മൊണിക്ക. ജോലിത്തിരക്കുകള്ക്ക് താല്ക്കാലിക ഇടവേള നല്കിയാണ് ഇരുവരും വിദേശ സഞ്ചാരത്തിന് ഇറങ്ങിയത്. അതിനിടയില് വീണുകിട്ടിയ സൗഭാഗ്യം പോലെ കലോത്സവ നഗരിയിലേക്ക് എത്തുകയായിരുന്നു. എല്ലാ വേദികളിലേക്കും എത്തി മത്സരങ്ങള് ആസ്വദിച്ച ഇരുവരും ഇന്ന് കൂടി തൃശൂരിലുണ്ടാകും. ഭാരതം മുഴുവന് ചുറ്റിക്കണ്ടശേഷം മാര്ച്ച് 9 ന് തിരികെ മടങ്ങാനാണ് ഇരുവരുടെയും പദ്ധതി.
