തിരുവനന്തപുരം: ശ്രീപദ്മനാഭസ്വാമി ക്ഷേത്രത്തില്‍ ആറു വര്‍ഷത്തിലൊരിക്കല്‍ നടക്കുന്ന മുറജപത്തിന് സമാപനം കുറിച്ചുകൊണ്ട് നാളെ നടക്കുന്ന ലക്ഷദീപം തൊഴാനെത്തുന്ന ഭക്തര്‍ക്ക് കര്‍ശന നിയന്ത്രണങ്ങള്‍. ഓണ്‍ലൈനായി പാസെടുത്ത് വരുന്നവര്‍ക്ക് വൈകിട്ട് 4.30നും 6.30നും ഇടയില്‍ ക്ഷേത്രത്തില്‍ പ്രവേശിക്കണം.
രാത്രി 8.30നാണ് ലക്ഷദീപത്തിന്റെ ഭാഗമായ പൊന്നുംശീവേലി. പാസിന്റെ പ്രിന്റ് ഔട്ടും ആധാര്‍ കാര്‍ഡും കൈയ്യില്‍ കരുതണം. ബാഗ്, കുട, ക്യാമറ, ഹെഡ്‌ഫോണ്‍, റിമോട്ട് കീ, സ്മാര്‍ട്ട് വാച്ച്, മൊബൈല്‍ ഫോണ്‍ തുടങ്ങിയ ഇലക്ട്രോണിക് ഉപകരണങ്ങളൊന്നും പാടില്ല. സാധാരണ ഇതെല്ലാം സൂക്ഷിക്കാന്‍ ക്ഷേത്രത്തിന്റെ എല്ലാ നടകളിലും സൗകര്യമുണ്ടെങ്കിലും തിരക്ക് കാരണം ഇത് സാദ്ധ്യമാകില്ല.
ലക്ഷദീപത്തിന്റെ മുന്നോടിയായി ലക്ഷദീപ ഭക്തജന ആഘോഷസമിതിയുടെ ആഭിമുഖ്യത്തില്‍ ഇന്നലെ ശ്രീപദ്മനാഭസ്വാമി ക്ഷേത്രത്തിന് മുന്നില്‍ സാംസ്‌ക്കാരിക ഘോഷയാത്ര നടന്നു. 1750ല്‍ മാര്‍ത്താണ്ഡവര്‍മ മഹാരാജാവ് ആരംഭിച്ച മുറജപത്തിന്റെ 47ാമത് മുറജപമാണ് നടക്കുന്നത്. ശ്രീപദ്മനാഭസ്വാമി ക്ഷേത്രത്തിന്റെ കിഴക്കേനടയില്‍ വൈകീട്ട് ഭരണസമിതി അംഗം അവിട്ടംതിരുനാള്‍ ആദിത്യവര്‍മ ഘോഷയാത്രയുടെ ഉദ്ഘാടനം നിര്‍വഹിച്ചു.
ആന, ചെണ്ടമേളം, തെയ്യം, താലപ്പൊലി, പഞ്ചവാദ്യം, ഭജന സംഘങ്ങള്‍ തുടങ്ങിയ ഘോഷയാത്രയില്‍ അണിനിരന്നു. സന്യാസിമാരുടെ വേദമന്ത്രവും നിരവധി വനിതകളും കുട്ടികളും ഘോഷയാത്രയില്‍ അണിചേര്‍ന്നു. കിഴക്കേ നടയില്‍ നിന്ന് ആരംഭിച്ച ഘോഷയാത്ര ക്ഷേത്രത്തിന് മൂന്ന് നടകളും വലംവച്ച് കിഴക്കേ നടയില്‍ സമാപിച്ചു. ആഘോഷസമിതി ഭാരവാഹികളായ സന്ദീപ് തമ്പാനൂര്‍, എസ്.ജാനകിഅമ്മാള്‍, ഷാജുവേണുഗോപാല്‍ എന്നിവര്‍ നേതൃത്വം നല്‍കി.
