ആലപ്പുഴ: സംഘടിത മതന്യൂനപക്ഷങ്ങളുടെ ഏകീകരണത്തിലൂടെ ലഭിച്ച മുന്നേറ്റം ആവര്‍ത്തിക്കാന്‍ യുഡിഎഫും, കൈവിട്ടുപോയ വോട്ട് ബാങ്ക് നിലനിര്‍ത്താന്‍ ഇടതുപക്ഷവും പ്രീണന രാഷ്‌ട്രീയത്തില്‍ മത്സരിക്കുന്നതിന്റെ പ്രകടമായ ഉദാഹരണങ്ങളാണ് മുന്‍ മന്ത്രി എ.കെ. ബാലന്റെയും കൊച്ചി മേയര്‍ വി.കെ. മിനിമോളുടെയും പരസ്യ പ്രകടനങ്ങള്‍. ജമാഅത്തെ ഇസ്ലാമിയുടെ വക്കീല്‍ നോട്ടീസിന് മറുപടി നല്‍കാന്‍ വിളിച്ചുചേര്‍ത്ത പത്രസമ്മേളനം അക്ഷരാര്‍ത്ഥത്തില്‍ ഒരു കമ്യൂണിസ്റ്റുകാരന്‍ മത ശക്തികള്‍ക്ക് മുന്നില്‍ കീഴടങ്ങുന്നതിന്റെ സാക്ഷ്യപത്രമായി മാറി.
താന്‍ നടത്തിയ പരാമര്‍ശത്തില്‍ മാപ്പ് പറയാനോ നഷ്ടപരിഹാരം നല്‍കാനോ തയാറല്ലെന്ന് അദ്ദേഹം വ്യക്തമാക്കിയെങ്കിലും പിന്നീട് പൊളിറ്റിക്കല്‍ ഇസ്ലാമിസ്റ്റുകളെ സന്തോഷിപ്പിക്കുന്ന പ്രസ്താവനകളാണ് നടത്തിയത്. ജയിലില്‍ പോകാനാണ് വിധിയെങ്കില്‍ അത് സന്തോഷപൂര്‍വം സ്വീകരിക്കുമെന്നും അവിടെയിരുന്ന് ഖുര്‍ആന്‍ വായിച്ച് തീര്‍ക്കുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. ഖുര്‍ആനില്‍ മുനാഫിക്കുകളെ കുറിച്ച് പറയുന്നുണ്ടെന്നും, താനൊരു ഈമാനുള്ള കമ്യൂണിസ്റ്റാണെന്നും അദ്ദേഹം പറഞ്ഞു. ഖുര്‍ആന്റെ മലയാള പരിഭാഷയുമായാണ് എ.കെ. ബാലന്‍ വാര്‍ത്താസമ്മേളനത്തിനെത്തിയതെന്നതും ശ്രദ്ധേയമായി.
കൊച്ചി കോര്‍പറേഷന്‍ മേയര്‍ പദവി ലഭിക്കാന്‍ ലത്തീന്‍ സഭ പിന്തുണച്ചുവെന്ന് വി. കെ. മിനിമോള്‍ തുറന്നു പറഞ്ഞതോടെ യുഡിഎഫിനെ നിയന്ത്രിക്കുന്നത് മത ശക്തികളാണെന്ന് വീണ്ടും തുറന്നുകാണിക്കപ്പെട്ടു. ലത്തീന്‍ സമുദായത്തിന്റെ ഉറച്ചശബ്ദം സമുദായത്തിനായി സമൂഹത്തില്‍ ഉയര്‍ന്നതിന്റെ തെളിവാണ് തന്റെ കൊച്ചി മേയര്‍ പദവിയെന്നും സഭാ നേതൃത്വം തനിക്കായി പറഞ്ഞു എന്നുമായിരുന്നു കേരള റീജിയന്‍ ലാറ്റിന്‍ കാത്തലിക് കൗണ്‍സില്‍ ജനറല്‍ അസംബ്ലിയില്‍ മേയറുടെ പരാമര്‍ശം. സഭാ നേതാക്കള്‍ക്ക് നന്ദി പറഞ്ഞ മിനിമോള്‍ സംഘടനാ ശക്തിയുടെ തെളിവാണിതെന്നും പറഞ്ഞിരുന്നു.
നിയമസഭാ തെരഞ്ഞെടുപ്പില്‍ യുഡിഎഫിന്റെ തന്ത്രം മത ജാതി അടിസ്ഥാനത്തിലുള്ള ഏകോപനമാണെന്ന് വ്യക്തമായിക്കഴിഞ്ഞു. തദ്ദേശ ഭരണ തെരഞ്ഞെടുപ്പില്‍ നേട്ടമുണ്ടാക്കിയ തന്ത്രമാണ് സംഘടിത മതവിഭാഗങ്ങളെ കൂടെകൂട്ടിയുള്ള പ്രവര്‍ത്തനം. മുസ്ലീം ലീഗിനെ പോലും പിന്നണിയിലാക്കി ജമാഅത്തെ ഇസ്ലാമിയാണ് ഇതിന് നേതൃത്വം നല്‍കിയത്. വിവിധ മുസ്ലീം ഗ്രൂപ്പുകളെ യുഡിഎഫിന് പിന്നിലെത്തിക്കാന്‍ ഇരവാദത്തിലൂടെ ഇവര്‍ക്ക് കഴിഞ്ഞു. മുസ്ലീം ലീഗിനെയും യുഡിഎഫിനെയും നിയന്ത്രിക്കുന്ന ശക്തിയായി മാറാന്‍ പൊളിറ്റിക്കല്‍ ഇസ്ലാമിസ്റ്റുകള്‍ക്ക് സാധിച്ചു. എങ്ങിനെയും ഭരണത്തിലെത്തുക എന്ന ഏകലക്ഷ്യം മാത്രമുള്ള കോണ്‍ഗ്രസ് ആകട്ടെ സംഘടിത മത വിഭാഗങ്ങളുടെ എന്ത് ആവശ്യങ്ങളും അംഗീകരിക്കുന്ന തലത്തിലെത്തിക്കഴിഞ്ഞു. മുസ്ലീം മതവിഭാഗത്തില്‍ ഉണ്ടായത്ര ഏകോപനം ക്രിസ്തുമത വിഭാഗങ്ങളില്‍ യുഡിഎഫിന് അനുകൂലമായി ഉണ്ടായില്ല. ഇത് മറികടക്കാനുള്ള ശ്രമമാണ് ഇപ്പോള്‍ പയറ്റുന്നത്.
സിപിഎം ഹിന്ദുവര്‍ഗീയ സ്വാഭാവത്തിലേക്ക് മാറിയെന്ന ജമാഅത്തെ ഇസ്ലാമിയുടെ ബുദ്ധികേന്ദ്രങ്ങള്‍ അഴിച്ചുവിട്ട പ്രചാരണത്തില്‍ പകച്ചുപോയ സിപിഎം ഇപ്പോള്‍ മുസ്ലീം മതപ്രീണനത്തിനായി എന്തൊക്കെയാണ് ചെയ്യേണ്ടതെന്ന് വ്യക്തതയില്ലാതെ ബുദ്ധിമുട്ടുകയാണ്. മുതിര്‍ന്ന നേതാക്കളെ വരെ ഹിന്ദുവര്‍ഗീയവാദികളെന്നും, ആര്‍എസ്എസ് പക്ഷപാതികളെന്നും മറുപക്ഷം വിമര്‍ശിച്ചതോടെ പകച്ചുപോയ സിപിഎം നേതൃത്വം ഇതില്‍ നിന്ന് കരകയറാന്‍ കാട്ടിക്കൂട്ടുന്നതാണ് ബാലന്റേത് അടക്കമുള്ള പ്രകടനങ്ങളെന്നും സ്വന്തം സഖാക്കള്‍ വരെ ചൂണ്ടിക്കാട്ടുന്നു. ശബരിമല സ്വര്‍ണക്കവര്‍ച്ച കേസില്‍ തന്ത്രിയെ തിടുക്കത്തില്‍ അറസ്റ്റ് ചെയ്തതും ഇതേ അടവുനയത്തിന്റെ ഭാഗമാണെന്നും ആക്ഷേപം ഉയരുന്നു. വരുന്ന മാസങ്ങളില്‍ ഇടതുവലതു നേതാക്കളുടെ ഏക അജണ്ട സംഘടിത മതപ്രീണനത്തില്‍ ഒതുങ്ങാനാണ് സാദ്ധ്യത.
