കണ്ണൂര്‍: പശ്ചിമബംഗാളില്‍ തകര്‍ന്നടിഞ്ഞ സിപിഎം ഭരണത്തെ രൂക്ഷമായി വിമര്‍ശിച്ച് കഥാകൃത്ത് ടി. പത്മനാഭന്‍. ബംഗാളിലെ സിപിഎമ്മിന്റെ മൂന്നര പതിറ്റാണ്ടിലെ ഉയര്‍ച്ചതാഴ്‌ച്ചകള്‍ പറയുന്ന, സൗര്‍ജ്യ ഭൗമിക്ക് രചിച്ച കഥേതര പുസ്തകമായ ഗാങ്സ്റ്റര്‍ സ്റ്റേറ്റിന്റെ മലയാളം പരിഭാഷ പ്രകാശന ചടങ്ങില്‍ സംസാരിക്കുകയായിരുന്നു അദ്ദേഹം.
ജ്യോതി ബസുവിന്റെയും ബുദ്ധദേവിന്റെയും കാലത്ത് ഒറ്റ ത്രിവര്‍ണ പതാക ബംഗാളിലുണ്ടായിരുന്നില്ല. ജ്യോതിബസു വിദ്യാസമ്പന്നനും പണ്ഡിതനുമായിരുന്നു. എന്നാല്‍ ആ പ്രയോജനം ബംഗാളിന് കിട്ടിയിട്ടുണ്ടോയെന്ന കാര്യം സംശയമായിരുന്നു. കവിയായിരുന്ന ബുദ്ധദേബിനുശേഷം മമതയുടെ കാലമെത്തിയപ്പോള്‍ ബംഗാളില്‍ ഒരിടത്തും ചെങ്കൊടി അടയാളം കാണാന്‍ കഴിഞ്ഞില്ല. മമത ഒരു വനിതയാണെങ്കിലും യാതൊരു മമതയില്ലാതെയാണ് ഭരിക്കുന്നത്. എല്ലാത്തിനും കാലഹരണമുണ്ട്. എന്തുകൊണ്ടാണ് ബംഗാളില്‍ കമ്യൂണിസം കാലഹരണപ്പെട്ടതെന്ന് കമ്യൂണിസ്റ്റുകള്‍ ചിന്തിക്കണം. നന്ദിഗ്രാം കേരളത്തിലും ആവര്‍ത്തിക്കാതിരിക്കാന്‍ ശ്രദ്ധിക്കണം. കേരളത്തിലെ ഹോട്ടലുകളില്‍ ജോലി ചെയ്യുന്നത് ബംഗാളികളാണ്. സിപിഎം ഭരിച്ച ത്രിപുരയില്‍ നിന്നും ഝാര്‍ഖണ്ഡില്‍ നിന്നുമൊക്കെയാളുകള്‍ ഇവിടേക്ക് വരുന്നുണ്ട്. കാല്‍ നൂറ്റാണ്ടിലേറെ കാലം കമ്യൂണിസ്റ്റ് പാര്‍ട്ടി ബംഗാളില്‍ ഭരിച്ചിട്ട് ഒന്നും നടന്നില്ല. ഇതിനെക്കാള്‍ വലിയ വീഴ്ച്ച ഒരു പ്രസ്ഥാനത്തിന് ഉണ്ടായിട്ടുണ്ടോയെന്നും ടി. പത്മനാഭന്‍ ചോദിച്ചു. പ്രിയദര്‍ശിനി പബ്ലിക്കേഷന്‍സ് പ്രസിദ്ധീകരിച്ച പുസ്തകത്തിന്റെ മലയാളം പതിപ്പ് എഐസിസി ജനറല്‍ സെക്രട്ടറി കെ.സി. വേണുഗോപാലില്‍ നിന്ന് ടി. പത്മനാഭന്‍ ഏറ്റുവാങ്ങി.
