തിരുവനന്തപുരം: വട്ടിയൂര്‍ക്കാവ് എംഎല്‍എ വി കെ പ്രശാന്തിനെതിരെ നടനും ബി ജെ പി നേതാവുമായ ജി കൃഷ്ണകുമാറിന്റെ ഫേസ്ബുക്ക് വീഡിയോ.വട്ടിയൂര്‍ക്കാവ് ജംഗ്ഷന്‍ വികസന പദ്ധതി സംസ്ഥാന സര്‍ക്കാരിന്റെ അനാസ്ഥ മൂലം വഴിമുട്ടി നില്‍ക്കുകയാണെന്ന് ജി കൃഷ്ണകുമാര്‍ ചൂണ്ടിക്കാട്ടുന്നു. ഈ പദ്ധതിയുടെ പേരില്‍ കുടിയിറക്കപ്പെട്ടവരെയും വ്യാപാരം നഷ്ടപ്പെട്ടവരെയും ചതിക്കുന്ന കാഴ്ചയാണ് ഉളളത്.
വട്ടിയൂര്‍ക്കാവ് ജംഗ്ഷനും പരിസരത്തെ പ്രധാനപ്പെട്ട മൂന്ന് റോഡുകളും അന്താരാഷ്‌ട്ര നിലവാരത്തില്‍ വികസിപ്പിക്കുക എന്നതായിരുന്നു പദ്ധതിയുടെ ലക്ഷ്യം. വികസനത്തിനായി ബഡ്ജറ്റില്‍ കിഫ്ബി വഴി 800 കോടി രൂപയുടെ ഭരണാനുമതിയുമുണ്ട്. നിശ്ചിത സമയത്തിനുള്ളില്‍ ഭൂമി ഏറ്റെടുത്ത് നിര്‍മാണം തുടങ്ങുമെന്ന് വട്ടിയൂര്‍ക്കാവ് എംഎല്‍എ വാഗ്ദാനം നല്‍കിയിരുന്നു.
വ്യാപാര സ്ഥാപനങ്ങള്‍ നഷ്ടപ്പെടുന്നവര്‍ക്ക് ആധുനിക രീതിയിലുള്ള പുനരധിവാസ പാക്കേജ്, വട്ടിയൂര്‍ക്കാവിനെ നഗരത്തിലെ മികച്ച സാറ്റലൈറ്റ് ടൗണ്‍ഷിപ്പ് ആക്കി മറ്റും എന്നൊക്കെയുളള വാഗ്ദാനം എന്തായെന്ന് കൃഷ്ണകുമാര്‍ ചോദിക്കുന്നു. വ്യാപാരികളുടെ അവസ്ഥ ദയനീയം.കെട്ടിടങ്ങള്‍ പൊളിച്ചുമാറ്റിയെങ്കിലും അര്‍ഹമായ നഷ്ടപരിഹാരമോ പകരം സംവിധാനമോ ഒരുക്കാതെ വ്യാപാരികളെ വഴിയാധാരമാക്കി. 100 കണക്കിന് തൊഴിലാളികള്‍ക്ക് തൊഴില്‍ നഷ്ടപ്പെട്ടു. ഇവരെ സഹായിക്കാന്‍ എംഎല്‍എ ഒന്നും ചെയ്തില്ലെന്നും കൃഷ്ണകുമാര്‍ ആരോപിച്ചു.
വികസനത്തിന് മതിയായ സമയം ഉണ്ടായിട്ടും വട്ടിയൂര്‍ക്കാവ് ജംഗ്ഷന്‍ ഇപ്പോഴും പൊടി പടലങ്ങളിലും കുഴികളിലും അമര്‍ന്ന് കിടക്കുന്നു.ഇനിയും ജനങ്ങളെ വിഡ്ഡികളാക്കാനാണ് നീക്കമെങ്കില്‍ ഈ തിരഞ്ഞെടുപ്പില്‍ വോട്ടര്‍മാരുടെ മറുപടി നേരിടാന്‍ എംഎല്‍എയും പാര്‍ട്ടിയും തയാറായിക്കൊള്ളൂവെന്ന് കൃഷ്ണകുമാര്‍ പറയുന്നു.
