ന്യൂദല്‍ഹി: ദേശീയ ചലച്ചിത്രവികസന കോര്‍പറേഷന്‍ ചെയര്‍മാനായി നടനും ബിജെപി നേതാവുമായ ജി. കൃഷ്ണകുമാര്‍ ചുമതലയേറ്റു. കേന്ദ്ര വാര്‍ത്താവിതരണ പ്രക്ഷേപണവകുപ്പ് മന്ത്രി അശ്വിനി വൈഷ്ണവിന്റെ സാന്നിധ്യത്തിലാണ് ചുമതലയേറ്റത്.
എന്‍എഫ്ഡിസി ചെയര്‍മാനായി ചുമതല ഏല്‍പിച്ച പ്രധാനമന്ത്രി നരേന്ദ്ര മോദിക്ക് കൃഷ്ണകുമാര്‍ നന്ദി അറിയിച്ചു. ഏറെ ഉത്തരവാദിത്വം നിറഞ്ഞ ചുമതലയാണെന്ന് കൃഷ്ണകുമാര്‍ മാധ്യമങ്ങളോട് പറഞ്ഞു. നിരവധി പ്രമുഖര്‍ ഇരുന്ന കസേരയിലാണ് താന്‍ ഇരിക്കാന്‍ പോകുന്നത്. ഭാരതീയ സിനിമയെ കൂടുതല്‍ ഉയരത്തില്‍ എത്തിക്കുകയാണ് ലക്ഷ്യം. എന്‍എഫ്ഡിസിയുടെ പ്രവര്‍ത്തനം കൂടുതല്‍ കാര്യക്ഷമമാക്കാനാണ് മന്ത്രി നിര്‍ദേശിച്ചതെന്നും കൃഷ്ണകുമാര്‍ പറഞ്ഞു.
സമാന്തര ചിത്രങ്ങള്‍ക്കൊപ്പം ലോകശ്രദ്ധയാകര്‍ഷിക്കാവുന്ന കൊമേഴ്സ്യല്‍ ചിത്രങ്ങള്‍ക്കും പ്രധാന്യം നല്‍കും. യുവാക്കള്‍ക്കും കൂടുതല്‍ അവസരം നല്‍കും. സംസ്‌കാരത്തെയും ചരിത്രത്തെയും പിന്തുണയ്‌ക്കുന്ന, ദേശീയബോധമുണര്‍ത്തുന്ന ചിത്രങ്ങള്‍ക്കും പ്രധാന്യം നല്‍കും. പ്രവര്‍ത്തിക്കുമ്പോള്‍ വിവാദങ്ങള്‍ ഉണ്ടാവുക സ്വാഭാവികമാണ്. കൂട്ടായ തീരുമാനങ്ങള്‍ എടുത്ത് സിനിമയ്‌ക്ക് വേണ്ടി ഏറ്റവും നല്ലത് ചെയ്യാന്‍ ശ്രമിക്കും. പ്രശ്നങ്ങള്‍ പരമാവധി ഇല്ലാതാക്കി മുന്നോട്ട് പോകും. ചലച്ചിത്രമേളകള്‍ പരമാവധി ഭംഗിയാക്കി നടത്തുക എന്നതും ഉത്തരവാദിത്തമാണെന്നും അദ്ദേഹം പറഞ്ഞു.
