വയനാട്: തിരുനെല്ലി മഹാവിഷ്ണു ക്ഷേത്രം, തൃശ്ശിലേരി ശിവ ക്ഷേത്രം എന്നിവയുടെ ഒന്പത് കോടി രൂപ വരുന്ന സ്ഥിരനിക്ഷേപം സിപിഎം ഭരിക്കുന്ന തിരുനെല്ലി സര്വീസ് സഹകരണ ബാങ്ക് തിരികെ നല്കി. പതിനേഴ് കോടിയായിരുന്നു നിക്ഷേപം. എട്ട് കോടി നേരത്തെ തിരികെ നല്കിയിരുന്നു. ബാങ്കുകള് ക്ഷേത്രത്തിന്റെ പണം മടക്കി നല്കാന് സുപ്രീംകോടതി ഉത്തരവിട്ടിരുന്നു.
തിരുനെല്ലി, തൃശ്ശിലേരി ദേവസ്വങ്ങള് സ്ഥിര നിക്ഷേപം നടത്തിയിട്ടുള്ള അഞ്ചു സഹകരണ സംഘങ്ങളും സിപിഎം നിയന്ത്രണത്തിലുള്ളതാണ്. നിക്ഷേപം ദേശസാത്കൃത ബാങ്കുകളിലേക്ക് മാറ്റണമെന്നായിരുന്നു സുപ്രീംകോടതി ഉത്തരവ്.
ക്ഷേത്രങ്ങളുടെ നിക്ഷേപം സഹകരണ ബാങ്കുകളില് നിന്ന് ദേശസാത്കൃത ബാങ്കിലേക്ക് മാറ്റാന് ഹൈക്കോടതി ഉത്തരവിട്ടിരുന്നു. കോടതി ഉത്തരവിനെതിരെ മാനന്തവാടി അര്ബന് കോഓപ്പറേറ്റിവ് സൊസൈറ്റിയും തിരുനെല്ലി സര്വിസ് കോഓപ്പറേറ്റിവ് ബാങ്കുമാണ് സുപ്രീംകോടതിയെ സമീപിച്ചത്. കാലാവധി പൂര്ത്തിയാകാതെ ക്ഷേത്രത്തിന്റെ നിക്ഷേപങ്ങള് ഒറ്റയടിക്ക് പിന്വലിച്ചാല് സഹകരണ സംഘങ്ങള് പ്രതിസന്ധിയിലാകുമെന്ന് അവര് വാദിച്ചു. എന്നാല് ഈ വാദം കോടതി അംഗീകരിച്ചില്ലെന്ന് മാത്രമല്ല, ക്ഷേത്ര വരുമാനം ദൈവത്തിന് അവകാശപ്പെട്ടതാണെന്നും അത് ക്ഷേത്ര താല്പര്യത്തിന് വേണ്ടി മാത്രമേ ഉപയോഗിക്കാന് പാടുള്ളൂവെന്നും ചീഫ് ജസ്റ്റിസ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് വ്യക്തമാക്കി.
