പത്തനംതിട്ട: ശബരിമല സ്വര്ണക്കൊള്ളയിലെ ഒന്നാം പ്രതി ഉണ്ണികൃഷ്ണന് പോറ്റിയെയോ പന്തളം സ്വദേശി പ്രവാസി വ്യവസായിയെയോ അറിയില്ലെന്ന് തമിഴ്നാട് ദിണ്ടിഗല് സ്വദേശി ഡി. മണി. ചൊവ്വാഴ്ച രാവിലെ 10.30 മുതല് ആരംഭിച്ച എട്ടു മണിക്കൂര് ചോദ്യം ചെയ്യലില് ശബരിമല സ്വര്ണക്കൊള്ളയുമായി ബന്ധപ്പെട്ട യാതൊരു വിവരവും മണിയില് നിന്ന് എസ്ഐടിക്ക് ലഭിച്ചില്ലെന്നാണ് സൂചന.
”ശബരിമല സ്വര്ണക്കൊള്ളയുമായി ഒരു ബന്ധവുമില്ല. ദര്ശനത്തിനായി സന്നിധാനത്ത് എത്താറുണ്ട്. എന്നാല് ഉണ്ണികൃഷ്ണന് പോറ്റിയെയോ ദേവസ്വം ബോര്ഡ് ഉദ്യോഗസ്ഥരെയോ പരിചയപ്പെട്ടിട്ടില്ല. വരി നിന്നാണ് ദര്ശനം നടത്തിയിട്ടുള്ളത്” എന്നും മണി എസ്ഐടിയോട് പറഞ്ഞു. അന്താരാഷ്ട്ര വിഗ്രഹക്കടത്തുകാരന് ആണെന്നും ഇയാള്ക്ക് പോറ്റിയുമായും ദേവസ്വം ഉന്നതനുമായും ബന്ധമുണ്ടെന്നും പ്രവാസി വ്യവസായി എസ്ഐടിയെ അറിയച്ചതിനെത്തുടര്ന്നാണ് മണിയെ എസ്ഐടി ദിണ്ടിഗലില് നിന്നു തിരുവനന്തപുരത്തേക്ക് കഴിഞ്ഞദിവസം വിളിച്ചുവരുത്തി ചോദ്യം ചെയ്തത്.
മണിയുടെ കൂട്ടാളി വിരുദുനഗര് സ്വദേശി ശ്രീകൃഷ്ണന് ഇറിഡിയം തട്ടിപ്പ് കേസില് പ്രതിയാണ്. തമിഴ്നാട് പോലീസ് രജിസ്റ്റര് ചെയ്ത കേസില് ഇയാള് ജയില് ശിക്ഷ അനുഭവിച്ചിട്ടുണ്ട്. ഇറിഡിയം കൈയില് വെച്ചാല് ഭാഗ്യം സിദ്ധിക്കുമെന്ന് വിശ്വസിപ്പിച്ച് നിരവധി പേരില് നിന്നായി ഇയാള് കോടികളുടെ തട്ടിപ്പാണു നടത്തിയത്.
തിരുവനന്തപുരത്ത് നിരവധി തവണ സ്വകാര്യ ആവശ്യങ്ങള്ക്കായി എത്തിയിട്ടുണ്ടെന്ന് മണി സമ്മതിച്ചു. എന്നാല് വിഗ്രഹകടത്തുമായി ഇതിനു ബന്ധമില്ല. ഇയാളുടെ യാത്രാ രേഖകളും ബാങ്ക് ഇടപാടുകളും എസ്ഐടി പരിശോധിക്കുന്നുണ്ട്. മണിയുടെ മൊഴി പൂര്ണമായും എസ്ഐടി വിശ്വാസത്തിലെടുത്തിട്ടില്ല. കേസില് കൂടുതല് വ്യക്തത വരുത്താന് പ്രവാസി വ്യവസായിയേയും ഉണ്ണികൃഷ്ണന് പോറ്റിയേയും വീണ്ടും ചോദ്യം ചെയ്യും. വിരുദുനഗര് സ്വദേശി ശ്രീകൃഷ്ണനും പോറ്റിയും തമ്മില് ഫോണില് ബന്ധപ്പെട്ടിരുന്നതായി എസ്ഐടി കണ്ടെത്തിയിരുന്നു. അതിനാല് ഡി. മണി സംഘവുമായി പോറ്റിക്ക് ബന്ധമുണ്ടെന്നു തന്നെയാണ് അന്വേഷണ ഉദ്യോഗസ്ഥര് കരുതുന്നത്.
