ശിവഗിരി: അദ്വൈതം എന്ന ധര്‍മശാസ്ത്ര ചിന്താ പദ്ധതിയെ ശ്രീനാരായണഗുരു പ്രായോഗിക ജീവിത പദ്ധതിയാക്കി എന്ന് ശ്രീനാരായണ ധര്‍മ സംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ. ശിവഗിരി തീര്‍ത്ഥാടന ഉദ്ഘാടന സമ്മേളനത്തില്‍ അധ്യക്ഷത വഹിക്കുകയായിരുന്നു അദ്ദേഹം.
ശിവഗിരി തീര്‍ത്ഥാടനത്തിന്റെ സവിശേഷത ശ്രീനാരായണ ഗുരുവിന്റെ പ്രായോഗികതയാണ്. 1400 വര്‍ഷങ്ങള്‍ക്കു മുമ്പ് ശങ്കരാചാര്യര്‍ അവതരിപ്പിച്ച അദ്വൈത വേദാന്ത ദര്‍ശനത്തെ ദേശത്തിനും കാലത്തിനും അനുസൃതമായി അദ്ദേഹം പുനഃപ്രവചനം ചെയ്തു. അദ്വൈതത്തെ പ്രായോഗിക ജീവിത പദ്ധതിയാക്കി ശ്രീനാരായണഗുരു മാറ്റി. ഉത്തര ഭാരതത്തില്‍ സ്വാമി വിവേകാനന്ദന് ഉണ്ടായിരുന്ന പ്രഭാവത്തിന് തുല്യമായിരുന്നു ദക്ഷിണ ഭാരതത്തില്‍ ശ്രീനാരായണഗുരുവിന് ഉണ്ടായിരുന്ന പ്രഭാവം.
ഗുരുവിഭാവനം ചെയ്തത് ഏക ലോക ദര്‍ശനമാണ്. അരുവിപ്പുറത്ത് ശിവപ്രതിഷ്ഠ നടത്തി, വിഭാഗീയത ഇല്ലാതെ സര്‍വരും സാഹോദര്യരായി കഴിയുന്ന ഏകലോകത്തെയാണ് ഗുരു ദര്‍ശിച്ചത്. തന്റെ ആയുസും വപുസും ആത്മ തപസും ഇതിനായാണ് അദ്ദേഹം വിനിയോഗിച്ചത്.
ജാതി മത ദേശ ചിന്തകള്‍ക്ക് അതീതമായി അദ്വൈത ദര്‍ശനത്തിന്റെ അടിസ്ഥാനത്തില്‍ എല്ലാവരും സഹോദരരാണ് എന്ന ദര്‍ശനത്തെ അന്തരാത്മാവില്‍ സാക്ഷാത്കരിച്ച് മുന്നോട്ടു പോകുവാന്‍ ഈ തീര്‍ത്ഥാടനം സഹായകരമാകട്ടെ എന്നും സ്വാമി സച്ചിദാനന്ദ പറഞ്ഞു.
