തിരുവനന്തപുരം: മലങ്കര കത്തോലിക്ക സഭയുടെ കീഴിലുള്ള മാര്‍ ഇവാനിയോസ് ഓട്ടോണമസ് കോളജിന്റെ പ്ലാറ്റിനം ജൂബിലി ആഘോഷങ്ങളുടെ സമാപനം 30ന് ഉപരാഷ്ട്രപതി സി.പി. രാധാകൃഷ്ണന്‍ ഉദ്ഘാടനം ചെയ്യും.
ഉച്ചയ്‌ക്ക് 12.30ന് മാര്‍ ഇവാനിയോസ് സ്റ്റേഡിയത്തില്‍ നടക്കുന്ന സമ്മേളനത്തില്‍ ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍, മുഖ്യമന്ത്രി പിണറായി വിജയന്‍, കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ, ഡോ. ശശി തരൂര്‍ എം.പി, കടകംപള്ളി സുരേന്ദ്രന്‍ എം.എല്‍.എ, ഡോ. കെ. ജയകുമാര്‍, തിരുവനന്തപുരം മേയര്‍, പ്രിന്‍സിപ്പല്‍ ഡോ. മീരാ ജോര്‍ജ് എന്നിവര്‍ പങ്കെടുക്കും. പ്ലാറ്റിനം ജൂബിലിയോടനുബന്ധിച്ച് നിര്‍മിക്കുന്ന റിസര്‍ച്ച് സെന്ററിന്റെ ശിലാസ്ഥാപനവും ഉപരാഷ്ട്രപതി നിര്‍വഹിക്കും.
കഴിഞ്ഞ ഒരു വര്‍ഷമായി നടക്കുന്ന പ്ലാറ്റിനം ജൂബിലി ആഘോഷത്തില്‍ പൂര്‍വ വിദ്യാര്‍ത്ഥി സംഘടനയായ അമിക്കോസിന്റെ നേതൃത്വത്തില്‍ ആഗസ്തില്‍ മൂന്ന് ദിവസത്തെ മെഗാ റീയൂണിയന്‍ നടത്തിയിരുന്നു. വിവിധ വിഭാഗങ്ങളുടെ നേതൃത്വത്തില്‍ നാല് അന്താരാഷ്‌ട്ര സെമിനാറും 25 റീജിയണല്‍ സെമിനാറും നടത്തി. ജൂബിലിയുടെ ഭാഗമായി പഠനത്തില്‍ മിടുക്കരായ 75 വിദ്യാര്‍ത്ഥികള്‍ക്ക് സ്‌കോളര്‍ഷിപ്പും നല്‍കിയെന്ന് കര്‍ദ്ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ, പ്രിന്‍സിപ്പല്‍ ഡോ. മീരാ ജോര്‍ജ്, ബര്‍സാര്‍ ഫാ. തോമസ് കൈയാലയ്‌ക്കല്‍, സഭ പിആര്‍ഒ ഫാ. ബോവസ് മാത്യു എന്നിവര്‍ വാര്‍ത്താസമ്മേളനത്തില്‍ അറിയിച്ചു.
