തിരുവനന്തപുരം: ഭിന്നശേഷിക്കാരുടെ പരിചാരകരായ 22,700 പേര്‍ക്കുകൂടി ആശ്വാസകിരണം പദ്ധതിയുടെ ആനുകൂല്യം ലഭ്യമാക്കുമെന്ന് മന്ത്രി ആര്‍. ബിന്ദു. നിലവില്‍ 24,355 ഗുണഭോക്താക്കള്‍ക്കാണ് പദ്ധതിയിലൂടെയുള്ള ധനസഹായം എത്തുന്നത്. ഇവര്‍ക്ക് ഒക്ടോബര്‍ വരെയുള്ള മുഴുവന്‍ സഹായവും സര്‍ക്കാര്‍ നല്‍കിയെന്നും നവംബറിലെ ധനസഹായ നടപടികള്‍ പുരോഗമിക്കുകയാണെന്നും മന്ത്രി വാര്‍ത്താസമ്മേളനത്തില്‍ പറഞ്ഞു.
2018 ഏപ്രില്‍ ഒന്നു മുതല്‍ അപേക്ഷിച്ചിട്ടുള്ള, ഭിന്നശേഷിക്കാരുടെ പരിചാരകരെയാണ് പദ്ധതിയില്‍ ഉള്‍പ്പെടുത്താന്‍ തീരുമാനിച്ചത്. ഇവര്‍ക്ക് പ്രതിമാസം 600 രൂപ വീതം ലഭ്യമാക്കുമെന്നും ഭിന്നശേഷി സമൂഹത്തോടുള്ള സാമൂഹ്യ ഉത്തരവാദിത്വത്തിന്റെ ഭാഗമായാണ് പദ്ധതിയുടെ ആനുകൂല്യം ഇത്രയും പേരിലേക്കുകൂടി വ്യാപിപ്പിക്കുന്നതെന്നും മന്ത്രി പറഞ്ഞു.
തീവ്രമായ ശാരീരിക/മാനസിക വെല്ലുവിളി നേരിടുന്നവര്‍, മാരക രോഗം ബാധിച്ച് പൂര്‍ണമായും കിടപ്പിലായവര്‍ തുടങ്ങി ദൈനംദിന കാര്യങ്ങള്‍ക്ക് പരസഹായം ആവശ്യമായ ആളുകളെ പരിചരിക്കുന്ന ഒരാള്‍ക്ക് പ്രതിമാസം 600 രൂപ വീതം ധനസഹായം അനുവദിക്കുന്ന പദ്ധതിയാണ് ആശ്വാസകിരണം.
ഭിന്നശേഷിക്കാരായവരുടെ പരിചാരകരായ ഗുണഭോക്താക്കള്‍ക്ക് ധനസഹായം അനുവദിച്ചശേഷം 2018 ഏപ്രില്‍ ഒന്നു മുതല്‍ അപേക്ഷിച്ചിട്ടുള്ള മറ്റു വിഭാഗങ്ങളില്‍പ്പെട്ട ഗുണഭോക്താക്കള്‍ക്കും ആനുകൂല്യം അനുവദിക്കുന്ന കാര്യം സര്‍ക്കാര്‍ പരിഗണനക്കെടുക്കുമെന്നും മന്ത്രി പറഞ്ഞു.
