ഇസ്ലാമാബാദ്: സ്വന്തം രാജ്യത്തിന്റെ കാപട്യം തുറന്നു കാട്ടി പാക് പാര്ലമെന്റംഗം. പാകിസ്ഥാന്റെ അതിര്ത്തി കടന്നുള്ള ആക്രമണങ്ങള് ന്യായീകരിക്കപ്പെട്ടാല്, തീവ്രവാദികളെ ഇല്ലാതാക്കാന് ഇന്ത്യ പാകിസ്ഥാന് പ്രദേശത്ത് പ്രവേശിക്കുമ്പോള് രാജ്യത്തിന് എതിര്ക്കാന് കഴിയില്ലെന്ന് പാകിസ്ഥാന് പാര്ലമെന്റംഗവും ജെയുഐ-എഫ് മേധാവിയുമായ മൗലാന ഫസ്ലുര് റഹ്മാന് പറഞ്ഞു. കറാച്ചിയിലെ ലിയാരിയില് നടന്ന ‘മജ്ലിസ്-ഇ-ഇത്തേഹാദ്-ഇ-ഉമ്മത്’ സമ്മേളനത്തെ അഭിസംബോധന ചെയ്യുകയായിരുന്നു റഹ്മാന്. അസിം മുനീറിന്റെ നേതൃത്വത്തിലുള്ള പാകിസ്ഥാന് സൈന്യം അഫ്ഗാനിസ്ഥാനില് നടത്തിയ ആക്രമണങ്ങളെ അദ്ദേഹം അപലപിച്ചു.
‘അഫ്ഗാനിസ്ഥാനില് നമ്മുടെ ശത്രുവിനെ ആക്രമിച്ചു എന്ന് നിങ്ങള് പറയുകയും അതിനെ ന്യായീകരിക്കുകയും ചെയ്താല്, കശ്മീരിലെ ആക്രമണത്തിന് ഉത്തരവാദികളായ ഗ്രൂപ്പുകളുടെ ആസ്ഥാനം ആക്രമിച്ചു എന്ന് ഇന്ത്യ പറയുന്നതില് എന്താണ് തെറ്റ് ?’. രണ്ട് നിലപാടുകളെയും നിങ്ങള് എങ്ങനെ ന്യായീകരിക്കും?’ അദ്ദേഹം ആരാഞ്ഞു.
