തിരുവനന്തപുരം: കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടക്കുന്ന ഭാരതം-ശ്രീലങ്ക വനിതാ ടി20 ക്രിക്കറ്റ് പരമ്പരയിലെ അവസാന മൂന്ന് മത്സരങ്ങള്ക്കുള്ള ടിക്കറ്റ് നിരക്കുകള് പ്രഖ്യാപിച്ചു. വനിതകള്ക്കും വിദ്യാര്ത്ഥികള്ക്കും 125 രൂപയും, ജനറല് ടിക്കറ്റിന് 250 രൂപയും ഹോസ്പ്പിറ്റാലിറ്റി സീറ്റുകള്ക്ക് 3000 രൂപയുമാണ് നിരക്കുകള്.
മത്സരത്തിന്റെ ടിക്കറ്റ് ബുക്കിങ്ങിനെക്കുറിച്ചറിയാനും മാര്ഗനിര്ദ്ദേശങ്ങള് മനസ്സിലാക്കാനും കേരളാ ക്രിക്കറ്റ് അസോസിയേഷന്റെ വെബ്സൈറ്റും സാമൂഹിക മാധ്യമ പേജുകളും സന്ദര്ശിക്കുക.
സ്ത്രീകള്ക്കും വിദ്യാര്ത്ഥികള്ക്കും പ്രാധാന്യം നല്കിക്കൊണ്ടുള്ള കുറഞ്ഞ നിരക്കുകള്, വനിതാ ക്രിക്കറ്റിന് കൂടുതല് പ്രോത്സാഹനം നല്കുന്നതിന്റെ ഭാഗമായാണ് നിശ്ചയിച്ചിരിക്കുന്നത്. വരുന്ന 26, 28, 30 തീയതികളിലായാണ് മത്സരങ്ങള്. അഞ്ച് മത്സരങ്ങളുള്ള പരമ്പരയിലെ നിര്ണായകമായ മൂന്നു മത്സരങ്ങള്ക്കാണ് കേരളം സാക്ഷ്യം വഹിക്കുന്നത്. ക്രിസ്മസിനോടനുബന്ധിച്ചുള്ള അവധി ദിവസങ്ങളില് ഭാരത വനിതാ ക്രിക്കറ്റ് ടീം തലസ്ഥാനത്തെത്തുന്നുവെന്ന പ്രത്യേകതയാണുള്ളത്. ഭാരതത്തിനായി ചരിത്രം കുറിച്ചുകൊണ്ട് അടുത്തിടെ ലോക ക്രിക്കറ്റ് കിരീടം നേടിയ ശേഷം ഹര്മന്പ്രീത് കൗര്, സ്മൃതി മന്ദാന, ജെമീമ റോഡ്രിഗസ്, ദീപ്തി ശര്മ എന്നിവരടങ്ങിയ സംഘം ആദ്യമായി കേരളത്തിലെത്തുകയാണ്. വിശാഖപട്ടണത്തെ ആദ്യ രണ്ട് മത്സരങ്ങള്ക്ക് ശേഷം ഡിസംബര് 24-ന് ഇരു ടീമുകളും തിരുവനന്തപുരത്ത് എത്തിച്ചേരും.
