തിരുവനന്തപുരം:രാത്രി യാത്ര ചെയ്ത വിദ്യാര്‍ഥിനികള്‍ ആവശ്യപ്പെട്ടിടത്ത് ഇറക്കിയില്ലെന്ന പരാതിയില്‍ കെ എസ് ആര്‍ ടി സി തിരുവനന്തപുരം സെന്‍ട്രല്‍ യൂണിറ്റിലെ കണ്ടക്ടറെ സര്‍വീസില്‍ നിന്നും പുറത്താക്കി. കഴിഞ്ഞ രാത്രി തൃശൂര്‍ നിന്നും തിരുവനന്തപുരത്തേക്ക് സര്‍വീസ് നടത്തുകയായിരുന്ന തിരുവനന്തപുരം സെന്‍ട്രല്‍ ഡിപ്പോയിലെ ബസില്‍ അങ്കമാലിക്കും മുരിങ്ങൂരിനും ഇടയ്‌ക്കുള്ള ‘പൊങ്ങം’ എന്ന സ്ഥലത്ത് ഇറങ്ങേണ്ടിയിരുന്ന വിദ്യാര്‍ഥിനികളെ സ്റ്റോപ്പില്‍ ഇറക്കാതെ ചാലക്കുടി ബസ് സ്റ്റാന്‍ഡില്‍ ഇറക്കിയതാണ് പരാതിക്ക് ഇടയാക്കിയത്.
അന്വേഷണത്തില്‍ ബസ് കണ്ടക്ടറുടെ ഭാഗത്ത് ഗുരുതരമായ കൃത്യവിലോപം ഉള്ളതായി കെഎസ്ആര്‍ടിസി വിജിലന്‍സ് വിഭാഗം കണ്ടെത്തി. ഇതോടെയാണ് ഇയാളെ സര്‍വീസില്‍ നിന്നും പുറത്താക്കിയത്.രാത്രികാലങ്ങളില്‍ വനിതാ യാത്രക്കാര്‍ ആവശ്യപ്പെടുന്ന സ്റ്റോപ്പില്‍ ബസ് നിര്‍ത്തണം എന്ന ഉത്തരവ് നിലവിലുണ്ട്.
ഇനിയും ഇത്തരത്തില്‍ നിരുത്തരവാദപരമായ പ്രവര്‍ത്തികള്‍ കെഎസ്ആര്‍ടിസി ജീവനക്കാരുടെ ഭാഗത്തുനിന്നുണ്ടാകുന്നപക്ഷം കുറ്റക്കാര്‍ക്കെതിരെ അതിശക്തമായ നടപടി സ്വീകരിക്കുമെന്ന് ഉത്തരവില്‍ പറയുന്നു.
