തിരുവനന്തപുരം: 93-ാമതു ശിവഗിരി തീര്‍ത്ഥാടനത്തിന്റെ ഔദ്യോഗിക ഉദ്ഘാടനം 30ന് രാവിലെ 10ന് ഉപരാഷ്ട്രപതി സി.പി. രാധാകൃഷ്ണന്‍ നിര്‍വഹിക്കുമെന്ന് ശ്രീനാരായണ ധര്‍മസംഘം ട്രസ്റ്റ് പ്രസിഡന്റ് സച്ചിദാനന്ദ സ്വാമി വാര്‍ത്താസമ്മേളനത്തില്‍ അറിയിച്ചു.
സച്ചിദാനന്ദ സ്വാമിയാണ് അധ്യക്ഷത വഹിക്കുക. ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ മുഖ്യാതിഥിയാകും. ധര്‍മസംഘം ട്രസ്റ്റ് ജനറല്‍ സെക്രട്ടറി സ്വാമി ശുഭാംഗാനന്ദ അനുഗ്രഹ പ്രഭാഷണം നടത്തും. ധര്‍മസംഘം ട്രസ്റ്റ് ബോര്‍ഡ് അംഗം സ്വാമി പരാനന്ദ, കേന്ദ്രമന്ത്രി സുരേഷ്‌ഗോപി, മന്ത്രി എം.ബി. രാജേഷ്, തീര്‍ത്ഥാടനക്കമ്മിറ്റി സെക്രട്ടറി സ്വാമി ശാരദാനന്ദ, ചെയര്‍മാന്‍ ഡോ. എ.വി. അനൂപ് എന്നിവര്‍ പ്രസംഗിക്കും.
11 മണിക്ക് വിദ്യാഭ്യാസ സമ്മേളനം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. 3ന് നടക്കുന്ന ആത്മീയ സമ്മേളനം ബീഹാര്‍ ഗവര്‍ണര്‍ ആരിഫ് മുഹമ്മദ് ഖാന്‍ ഉദ്ഘാടനം ചെയ്യും. മുന്‍ കേന്ദ്ര മന്ത്രി വി. മുരളീധരന്‍ വിശിഷ്ടാതിഥിയാകും. മുന്‍ മിസോറാം ഗവര്‍ണര്‍ കുമ്മനം രാജശേഖരന്‍ പങ്കെടുക്കും. 4 മണിക്ക് ശ്രീനാരായണ ദിവ്യ സത്സംഗം നടക്കും. വൈകിട്ട് 5ന് നടക്കുന്ന ഭക്തി സമ്മേളനം കുളത്തൂര്‍ അദ്വൈതാശ്രമം അധ്യക്ഷന്‍ സ്വാമി ചിദാനന്ദപുരി ഉദ്ഘാടനം ചെയ്യും. ശ്രീനാരായണ ധര്‍മ സംഘം ട്രസ്റ്റ് ബോര്‍ഡ് മെമ്പര്‍ സ്വാമി സൂക്ഷ്മാനന്ദ അധ്യക്ഷത വഹിക്കും.
31ന് പുലര്‍ച്ചെ 5.30ന് തീര്‍ത്ഥാടന ഘോഷയാത്ര മഹാസമാധിയില്‍ നിന്നും തിരിച്ച് മൈതാനം, റെയില്‍വേ സ്റ്റേഷന്‍ വഴി മഹാസമാധിയില്‍ തിരിച്ചെത്തും. തുടര്‍ന്ന് സച്ചിദാനന്ദ സ്വാമി തീര്‍ത്ഥാടന സന്ദേശം നല്‍കും. 9.30ന് തീര്‍ത്ഥാടന സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. സച്ചിദാനന്ദ സ്വാമി അധ്യക്ഷത വഹിക്കും. കര്‍ണാടക മുഖ്യമന്ത്രി സിദ്ധാരാമയ്യ, എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍, ബിജെപി സംസ്ഥാന ജനറല്‍ സെക്രട്ടറി ശോഭാ സുരേന്ദ്രന്‍ എന്നിവര്‍ സംസാരിക്കും. 12 മണിക്ക് കാര്‍ഷിക വ്യാപാര സമ്മേളനം മന്ത്രി പി. രാജീവ് ഉദ്ഘാടനം ചെയ്യും. നബാര്‍ഡ് ചെയര്‍മാന്‍ കെ.വി. ഷാജി, കൊച്ചിന്‍ ഷിപ്‌യാര്‍ഡ് ചെയര്‍മാന്‍ മധു എസ്. നായര്‍, ബിജെപി ദേശീയ നിര്‍വാഹക സമിതി അംഗം പി.കെ. കൃഷ്ണദാസ് തുടങ്ങിയവര്‍ പങ്കെടുക്കും.2.30ന് നടക്കുന്ന സമ്മേളനം മന്ത്രി ജി.ആര്‍. അനില്‍ ഉദ്ഘാടനം
ചെയ്യും. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്‍ മുഖ്യാതിഥിയാകും. 5ന് മാധ്യമ സമ്മേളനം കേന്ദ്ര മന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. കേരളാ ഗവര്‍ണറുടെ അഡീ. പ്രൈവറ്റ് സെക്രട്ടറി പി. ശ്രീകുമാര്‍, മാധ്യമപ്രവര്‍ത്തകരായ സാജന്‍ സ്‌കറിയ, എന്‍.എം. പിയേഴ്‌സണ്‍, സുജയപാര്‍വതി തുടങ്ങിയവര്‍ പങ്കെടുക്കും.
ജനുവരി 1ന് രാവിലെ 10 മണിക്ക് നടക്കുന്ന സമ്മേളനം ബംഗാള്‍ ഗവര്‍ണര്‍ ഡോ. സി.വി. ആനന്ദബോസ് ഉദ്ഘാടനം ചെയ്യും. ശശി തരൂര്‍ എംപി മുഖ്യപ്രഭാഷണം നടത്തും. 11ന് ശ്രീനാരായണ പ്രസ്ഥാന സംഗമം ധനമന്ത്രി കെ.എന്‍. ബാലഗോപാല്‍ ഉദ്ഘാടനം ചെയ്യും. ധര്‍മസംഘം മുന്‍ പ്രസിഡന്റ് സ്വാമി വിശുദ്ധാനന്ദ അനുഗ്രഹ പ്രഭാഷണം നടത്തും. എസ്എന്‍ഡിപി യോഗം വൈസ് പ്രസിഡന്റ് തുഷാര്‍ വെള്ളാപ്പള്ളി മുഖ്യാതിഥിയാകും. 2 മണിക്ക് ശ്രീനാരായണ സംഗമം തമിഴ്‌നാട് ക്ഷീരവികസന മന്ത്രി ടി. മനോ തങ്കരാജ് ഉദ്ഘാടനം ചെയ്യും. 5ന് നടക്കുന്ന സമാപന സമ്മേളനം മന്ത്രി സജി ചെറിയാന്‍ ഉദ്ഘാടനം ചെയ്യും. മന്ത്രി പി. പ്രസാദ് അധ്യക്ഷനാകും.
ശീനാരായണ ധര്‍മസംഘം ട്രസ്റ്റ് ജനറല്‍ സെക്രട്ടറി സ്വാമി ശുഭാംഗാനന്ദ, തീര്‍ത്ഥാടന കമ്മിറ്റി സെക്രട്ടറി സ്വാമി ശാരദാനന്ദ, തീര്‍ത്ഥാടന കമ്മറ്റി ജോ. സെക്രട്ടറി സ്വാമി വിരജാനന്ദഗിരി, മഠം പിആര്‍ഒ ഇ.എം. സോമനാഥന്‍, മീഡിയ കമ്മറ്റി ചെയര്‍മാന്‍ ഡോ. എം. ജയരാജു തുടങ്ങിയവരും പത്രസമ്മേളനത്തില്‍ പങ്കെടുത്തു.
