കൊച്ചി: ശബരിമല ശ്രീകോവില്‍ കട്ടിളപ്പാളിയില്‍ സ്വര്‍ണം പൊതിഞ്ഞതുമായി ബന്ധപ്പെട്ട രേഖകളൊന്നുമില്ലെന്ന് മുന്‍ ദേവസ്വം ബോര്‍ഡ് പ്രസിഡന്റ് എന്‍. വാസു ഹൈക്കോടതിയില്‍. രേഖകള്‍ ഇല്ലെന്നത് സംബന്ധിച്ച് ജസ്റ്റിസ് എ. ബദരുദീന്റെ ബെഞ്ച് സംസ്ഥാന സര്‍ക്കാരിനോട് വിശദാംശങ്ങള്‍ തേടി.
വാദം കേള്‍ക്കവെ 2010 മുതല്‍ പദവി വഹിക്കുന്ന വാസുവിന് കട്ടിളപ്പാളി സ്വര്‍ണം പൊതിഞ്ഞതാണെന്ന് അറിയാമായിരുന്നോ എന്നും കൂടുതല്‍ ജാഗ്രത പാലിക്കണമായിരുന്നോ എന്നും കോടതി ചോദിച്ചു. എന്നാല്‍ ശബരിമല ശ്രീകോവില്‍ കട്ടിളപ്പാളിയില്‍ സ്വര്‍ണം പൊതിഞ്ഞതാണെന്ന് കാണിക്കുന്ന രേഖകളൊന്നുമില്ലെന്ന് വാസുവിന്റെ അഭിഭാഷകന്‍ വാദിച്ചു. തുടര്‍ന്ന് കോടതി സംസ്ഥാന സര്‍ക്കാരില്‍ നിന്ന് കൂടുതല്‍ വിശദാംശങ്ങള്‍ തേടുകയും ഹര്‍ജി ചൊവ്വാഴ്ചത്തേക്ക് മാറ്റുകയും ചെയ്തു. നവംബര്‍ 11നാണ് പ്രത്യേക അന്വേഷണ സംഘം വാസുവിനെ അറസ്റ്റ് ചെയ്തത്. അന്നു മുതല്‍ ജുഡീഷ്യല്‍ കസ്റ്റഡിയിലായ വാസു ജാമ്യം തേടി കൊല്ലത്തെ വിജിലന്‍സ് പ്രത്യേക കോടതിയെ സമീപിച്ചിരുന്നെങ്കിലും അപേക്ഷ തള്ളി. തുടര്‍ന്നാണ് ഹൈക്കോടതിയെ സമീപിച്ചത്.
കേസില്‍ ഒന്നാം പ്രതിയായ ഉണ്ണികൃഷ്ണന്‍ പോറ്റിക്ക് വാസു ഉള്‍പ്പെടെയുള്ള പ്രതികള്‍ സഹായം നല്‍കിയതായി പ്രോസിക്യൂഷന്‍ പറയുന്നു.
എന്നാല്‍, താന്‍ നിരപരാധിയാണെന്നും മനഃപൂര്‍വ്വം പ്രവര്‍ത്തിച്ചിട്ടില്ലെന്നും വാസു വാദിച്ചു. കീഴുദ്യോഗസ്ഥരില്‍ നിന്ന് ലഭിച്ച ആശയവിനിമയങ്ങള്‍ ശരിയായ മാര്‍ഗങ്ങളിലൂടെ ബോര്‍ഡിന് പരിഗണനക്കായി അയച്ചു എന്നുമാത്രമാണ് കുറ്റമെന്നാണ് ഹര്‍ജിക്കാരന്റെ വാദം.
