കൊച്ചി: നടി ആക്രമിക്കപ്പെട്ട കേസില്‍ പ്രതികള്‍ക്കുളള ശിക്ഷ കുറഞ്ഞു പോയെന്ന് താര സംഘടന എഎംഎംഎ പ്രസിഡന്റ് ശ്വേത മേനോന്‍. കേസില്‍ അപ്പീല്‍ പോകണമെന്നും നടി പറഞ്ഞു.അതേസമയം, ശിക്ഷാവിധിയെ ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്മി രൂക്ഷമായി വിമര്‍ശിച്ചു.
എഎംഎംഎ അതിജീവിതയ്‌ക്കൊപ്പമാണ്. ദിലീപിനെ തിരിച്ചെടുക്കുന്ന എഎംഎംഎയില്‍ ഒരു ചര്‍ച്ചയും നടന്നിട്ടില്ലെന്നും ശ്വേത പറഞ്ഞു.
ഈ വിഷയങ്ങളില്‍ എഎംഎംഎ പ്രതികരിക്കാന്‍ വൈകിയെന്ന ബാബുരാജിന്റെ വിമര്‍ശനം അദ്ദേഹത്തിന്റെ മാത്രം അഭിപ്രായമാണെന്നും സംഘടനാകാര്യങ്ങള്‍ അറിയാത്തയാളല്ല ബാബുരാജ് എന്നും ശ്വേത പറഞ്ഞു.
അതേസമയം,പെണ്ണിന്റെ മാനത്തിന് അഞ്ച് ലക്ഷം രൂപയാണോ വിലയെന്ന് ഭാഗ്യലക്ഷ്മി ചോദിച്ചു.ഇതെന്ത് രാജ്യമാണെന്ന് തോന്നിപോകുന്നു. നിയമത്തിന് മുന്നില്‍ ഇത് ചെയ്തവരെല്ലാവരും നിഷ്‌കളങ്കരും അവള്‍ വലിയ കുറ്റക്കാരിയുമെന്ന പോലെയായെന്നും ഭാഗ്യലക്ഷ്മി പറഞ്ഞു.കുട്ടികളോട് കുറുമ്പ് കാണിക്കരുതെന്ന് പറഞ്ഞ് ശാസിക്കുന്നത് പോലെയാണ് വിധി കേട്ടിട്ട് തോന്നുന്നതെന്നും ഭാഗ്യലക്ഷ്മി കൂട്ടിച്ചേര്‍ത്തു.
വൈകുന്നേരം ആറ് മണി കഴിഞ്ഞാല്‍ പെണ്‍കുട്ടികള്‍ എല്ലാം വീട്ടില്‍ ഇരുന്നോള്ളൂ, കുറ്റക്കാര്‍ക്ക് ഏറ്റവും കുറഞ്ഞ ശിക്ഷയെ ലഭിക്കൂ എന്ന തെറ്റായ സന്ദേശമാണ് വിധി നല്‍കുന്നതെന്നും ഭാഗ്യലക്ഷ്മി വിമര്‍ശിച്ചു.
