ശിവഗിരി: 93-മത് ശിവഗിരി തീര്ത്ഥാടന കാലത്തെ ആഘോഷ പരിപാടികളും സമ്മേളനങ്ങളുടെ തുടക്കവും 15ന് രാവിലെ 10ന് അശ്വതി തിരുനാള് ഗൗരി ലക്ഷ്മിബായി ഉദ്ഘാടനം ചെയ്യും. യോഗത്തില് ശ്രീനാരായണ ധര്മസംഘം ട്രസ്റ്റ് പ്രസിഡന്റ് സച്ചിദാനന്ദ സ്വാമി അധ്യക്ഷനാകും. അറിവിന്റെ തീര്ത്ഥാടനം എന്ന പേരില് പ്രസിദ്ധി ആര്ജിച്ച ശിവഗിരി തീര്ത്ഥാടനത്തിന് 15 മുതല് 29 വരെ വൈവിധ്യമാര്ന്ന സമ്മേളനങ്ങള് നടക്കും. 30,31, ജനുവരി ഒന്ന് തീയതികളില് മഹാതീര്ത്ഥാടനം പ്രമാണിച്ചുള്ള പ്രത്യേക സമ്മേളനങ്ങളും ഉണ്ടാകും.
ഗുരുപൂജ ഹാളിനോട് ചേര്ന്ന് പ്രത്യേകമായി നിര്മിക്കുന്ന ഓഡിറ്റോറിയത്തിലാകും തീര്ത്ഥാടനകാല സമ്മേളനങ്ങള്. എല്ലാ ദിവസവും രാവിലെ 10ന് ഗുരുദേവകൃതികളെയും ദര്ശനത്തെയും ആസ്പദമാക്കി വിവിധ സമ്മേളനങ്ങള് ഉണ്ടാകും. ശിവഗിരി മഠത്തിലെ സംന്യാസിവര്യരും പ്രസിദ്ധരായ പ്രഭാഷകരും സമ്മേളന പരിപാടികളില് പ്രഭാഷണങ്ങള് നടത്തും. യുവജന സമ്മേളനം, പരിസ്ഥിതി സംരക്ഷണ സമ്മേളനം, പാരമ്പര്യ വൈദ്യസംഗമം, പിന്നാക്ക സമുദായ സമ്മേളനം, ഗുരുധര്മ പ്രചരണസഭാ സമ്മേളനം, സത്യവ്രത സ്വാമി ശതാബ്ദി സമ്മേളനം എന്നിവ വിവിധ ദിവസങ്ങളില് ഉണ്ടാകും. ഗുരുദേവ കൃതികളെയും ഗുരുദേവ ശിഷ്യന്മാരുടെ കൃതികളെയും ആസ്പദമാക്കി നടത്തുന്ന അക്ഷരശ്ലോക സദസും സംഘടിപ്പിക്കുന്നുണ്ട്. ഗുരുദേവ ചരിതത്തില് രേഖപ്പെടുത്താതെ പോയ ചരിത്ര സംഭവങ്ങളെ രേഖപ്പെടുത്തി ഭാവി ജനതയ്ക്ക് സമര്പ്പിക്കുന്നതിന്റെ ഭാഗമായി ഗുരുദേവ ചരിത്ര കഥാമൃതം എന്ന വിശേഷാല് പരിപാടിയില് ഭക്തജനങ്ങള്ക്ക് ചരിത്ര സംഭവങ്ങള് അവതരിപ്പിക്കുന്നതിന് സൗകര്യവും ഉണ്ടായിരിക്കും. പങ്കെടുക്കുന്നവര് മുന്കൂട്ടി പേര് രജിസ്റ്റര് ചെയ്യേണ്ടതാണ്. ഗുരുദേവ സങ്കീര്ത്തനങ്ങള് സംഗീത സാന്ദ്രമായി ആലാപനം ചെയ്തു ഗുരുദേവദേവസ്തോത്ര ഗാനാര്ച്ചന നടത്തുവാനും സൗകര്യം ഒരുക്കിയിട്ടുണ്ട്. ഗുരുദേവ ശിഷ്യനായ എം.പി മൂത്തേടത്തിന്റെ വിയോഗദിനം പ്രമാണിച്ച് അനുസ്മരണയോഗവും ഉണ്ടാകും.
