കോട്ടയം: പണമടച്ചിട്ടും ബുക്കു ചെയ്ത വസ്ത്രം കിട്ടിയില്ലെന്ന പരാതിയില് സ്ഥാപനമുടമയ്ക്ക് പിഴയിട്ട് ജില്ലാ ഉപഭോക്തൃ തര്ക്ക പരിഹാര കമ്മീഷന്.
സ്ഥാപനമുടമ ഏറനാട് ഷമീല കൃപ ഡ്രസ് ഉടമ ഷമീല ബാനു വസ്ത്രവിലയായ 11,300 രൂപ ഒന്പതു ശതമാനം പലിശ സഹിതവും നഷ്ടപരിഹാരമായി 25,000 രൂപയും നല്കണമെന്നാണ് കമ്മീഷന് ഉത്തരവ്. നീഡില് ക്രാഫ്റ്റ് ഡിസൈന് സ്റ്റോര് എന്ന ഇന്സ്റ്റഗ്രാം പേജിലെ പരസ്യം കണ്ടാണ് അമേരിക്കയില് ഡന്റിസ്റ്റായ കോട്ടയം സ്വദേശിനി ക്രിസ്റ്റി സാറാ തോമസ് ഭിന്നശേഷിക്കാരിയായ സഹോദരിക്കുള്ള പ്രത്യേക ഡ്രസ്സ് പണമടച്ച് ബുക്കു ചെയ്തത്.
പാര്സല് ലഭിക്കാതെ വന്നതോടെ പലകുറി ബന്ധപ്പെട്ടെങ്കിലും മറുപടിയുണ്ടായില്ല. ഇതേത്തുടര്ന്നാണ് ജില്ലാ ഉപഭോക്തൃ തര്ക്ക പരിഹാര കമ്മീഷനെ സമീപിച്ചത്. അഡ്വ.വി.എസ്. മനുലാല് പ്രസിഡന്റും അഡ്വ. ആര്. ബിന്ദു, കെ.എം. ആന്റോ എന്നിവര് അംഗങ്ങളുമായ ജില്ലാ ഉപഭോക്തൃ തര്ക്ക പരിഹാര കമ്മീഷനാണ് നഷ്ടപരിഹാരത്തിന് ഉത്തരവിട്ടത്.
