പത്തനംതിട്ട: സ്വര്‍ണക്കൊള്ളയ്‌ക്ക് സന്നിധാനത്തു നിന്നു കട്ടിളപ്പാളികളും ദ്വാരപാലക ശില്‍പ പാളികളും ഇളക്കിമാറ്റി കടത്താന്‍ ദീര്‍ഘനാളത്തെ ആസൂത്രണമെന്ന് പ്രത്യേക അന്വേഷണ സംഘം കണ്ടെത്തി. ഇതിനുള്ള ഉപാധി മാത്രമായിരുന്നു സ്വര്‍ണം പൂശല്‍. നിറംമങ്ങിയതിനാല്‍ സ്വര്‍ണം പൂശാന്‍ കൊണ്ടുപോകുന്നെന്നു രേഖകള്‍ ചമച്ചത് കൊള്ളയ്‌ക്കു നിയമ പരിരക്ഷയുറപ്പാക്കാനെന്നും എസ്‌ഐടിക്ക് ബോധ്യമായി. ഇക്കാര്യങ്ങളെല്ലാം വ്യക്തമാക്കിയ ഇടക്കാല റിപ്പോര്‍ട്ടാകും എസ്‌ഐടി ഇന്ന് ഹൈക്കോടതിയില്‍ സമര്‍പ്പിക്കുക. ശബരിമല ശ്രീകോവില്‍ 1998ല്‍ വിജയ് മല്യ സ്വര്‍ണം പൊതിഞ്ഞിരുന്നതറിയാവുന്ന പ്രതികള്‍ സ്വര്‍ണക്കൊള്ളയ്‌ക്ക് 2017-19ലെ ദേവസ്വം ബോര്‍ഡ് പ്രസിഡന്റിന്റെ നേതൃത്വത്തില്‍ ഗൂഢാലോചന നടത്തി. ദേവസ്വം അഡ്മിനിസ്‌ട്രേറ്റീവ് ഓഫീസര്‍, എക്‌സിക്യൂട്ടീവ് ഓഫീസര്‍, തിരുവാഭരണം കമ്മിഷണര്‍, ദേവസ്വം കമ്മിഷണര്‍ എന്നിവരടങ്ങുന്ന സംഘം ഗൂഢാലോചനയില്‍ പങ്കാളികളായി. ദേവസ്വം പ്രസിഡന്റായിരുന്ന എ. പത്മകുമാറിന്റെ നേതൃത്വത്തിലായിരുന്നു നീക്കം. കേസില്‍ പങ്കാളികളെന്നു സംശയിക്കുന്ന ദേവസ്വം ബോര്‍ഡ് അംഗങ്ങളെയും ദേവസ്വം സെക്രട്ടറിയെയും ചോദ്യം ചെയ്യാന്‍ കൂടുതല്‍ സമയം അനുവദിക്കണമെന്നും റിപ്പോട്ടില്‍ ആവശ്യപ്പെടുമെന്ന് അറിയുന്നു.
ഇടക്കാല റിപ്പോര്‍ട്ട് ഇന്ന് ഹൈക്കോടതിയില്‍; സ്വര്‍ണക്കൊള്ള ദീര്‍ഘകാല ആസൂത്രണമെന്ന് എസ്‌ഐടി
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.