ന്യൂദല്‍ഹി: ഡിജിറ്റല്‍ അറസ്റ്റ് തട്ടിപ്പുമായി ബന്ധപ്പെട്ട കേസുകള്‍ അന്വേഷിക്കാന്‍ സുപ്രീംകോടതി സിബിഐയോട് ആവശ്യപ്പെട്ടു. ഡിജിറ്റല്‍ തട്ടിപ്പുകള്‍ വര്‍ദ്ധിച്ചു വരുന്ന സാഹചര്യത്തില്‍ അടിയന്തര ശ്രദ്ധ ആവശ്യമാണെന്നും കേസ് പരിഗണിച്ച ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്‌മല്യ ബാഗ്ചി എന്നിവരടങ്ങിയ ബെഞ്ച് അറിയിച്ചു. നിക്ഷേപ അവസരങ്ങളുടെയും പാര്‍ട്ട് ടൈം ജോലികളുടെയും പേരിലുള്ള തട്ടിപ്പുകളും സിബിഐ അന്വേഷണപരിധിയിലാണ്.
അതിര്‍ത്തി കടക്കുന്ന കേസുകളില്‍ ആവശ്യമെങ്കില്‍ ഇന്റര്‍പോളിന്റെ സഹായം തേടാം. ഡിജിറ്റല്‍ തട്ടിപ്പ് കേസിന്റെ അന്വേഷങ്ങളോട് സമൂഹ മാധ്യമ ഇടനിലക്കാര്‍ പൂര്‍ണമായി സഹകരിക്കണം. തട്ടിപ്പുകള്‍ക്കായി വന്‍തോതില്‍ സിം കാര്‍ഡുകള്‍ ദുരുപയോഗം ചെയ്യുന്നുണ്ട്. ഇത് നിയന്ത്രിക്കുന്നതിന് ടെലികോം സേവന ദാതാക്കള്‍ക്കായി മാര്‍ഗ നിര്‍ദേശം നല്‍കാനും ടെലികമ്യൂണിക്കേഷന്‍ വകുപ്പിനോട് ആവശ്യപ്പെട്ടിട്ടുണ്ട്.സൈബര്‍ കുറ്റകൃത്യങ്ങള്‍ തടയുന്നതിനായി പ്രാദേശിക സൈബര്‍ കുറ്റകൃത്യ യൂണിറ്റുകളുടെ വേഗത്തിലുള്ള പ്രവര്‍ത്തനം എല്ലാ സംസ്ഥാനങ്ങളും ഉറപ്പാക്കണം. ബാങ്ക് അക്കൗണ്ടുകള്‍ ഉപയോഗിച്ചുള്ള തട്ടിപ്പില്‍ അഴിമതി നിരോധന നിയമപ്രകാരം സിബിഐക്ക് ബാങ്ക് ഉദ്യോഗസ്ഥരെ ചോദ്യം ചെയ്യാനും പൂര്‍ണമായ സ്വാതന്ത്ര്യം ഉണ്ടായിരിക്കും. ഇത്തരം അക്കൗണ്ടുകള്‍ കണ്ടെത്താനും കുറ്റകൃത്യത്തിലൂടെ ലഭിച്ച പണം മരവിപ്പിക്കാനും റിസര്‍വ് ബാങ്കിനെ സമീപിക്കാമെന്നും ചീഫ് ജസ്റ്റിസ് അറിയിച്ചു.
2024-ല്‍ 1,23,672 കേസുകളാണ് ദേശീയ സൈബര്‍ക്രൈം റിപ്പോര്‍ട്ടിങ് പോര്‍ട്ടലില്‍ മാത്രം റിപ്പോര്‍ട്ട് ചെയ്തിട്ടുള്ളത്. ഇത്തരം കുറ്റകൃത്യങ്ങള്‍ വര്‍ദ്ധിച്ചു വരുന്ന സാഹചര്യത്തിലാണ് കേന്ദ്ര ഏജന്‍സിയോട് അന്വേഷിക്കാന്‍ ആവശ്യപ്പെട്ടത്.
