ന്യൂദൽഹി: ഇന്ത്യയിൽ കാണപ്പെടുന്ന നീളൻ കുരുമുളക് വിഭാഗത്തിൽപ്പെടുന്ന ” തിപ്പലി ” വൻകുടൽ കാൻസർ ചികിത്സിക്ക് ഉപയോഗപ്രദമായേക്കാം. വൻകുടൽ കാൻസർ കോശങ്ങളെ ഇല്ലാതാക്കുന്നതിനുള്ള ഒരു സവിശേഷ പ്രകൃതിദത്ത സംയുക്തം തിപ്പലിയിൽ കണ്ടെത്തിയതായി റൂർക്കലയിലെ നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി (എൻഐടി) ഗവേഷകർ അറിയിച്ചു.
ഇതോടെ വൻകുടൽ കാൻസറിന് ഏറ്റവും ഫലപ്രദവും ചെലവുകുറഞ്ഞതുമായ ചികിത്സാ മാർഗ്ഗമായി ഇനി ഈ ഔഷധ സസ്യം മാറിയേക്കാം.
തിപ്പലിയിൽ കാണപ്പെടുന്ന പൈപ്പർലോംഗുമിൻ എന്ന സംയുക്തം കാൻസർ കോശങ്ങളെ നശിപ്പിക്കുകയും ആരോഗ്യമുള്ള കോശങ്ങളെ ബാധിക്കാതിരിക്കുകയും ചെയ്യുന്നുവെന്ന് എൻഐടി ഗവേഷണ സംഘം അവകാശപ്പെടുന്നു. “ബയോഫാക്ടറുകൾ” എന്ന ശാസ്ത്ര ജേണലിൽ ഈ കണ്ടെത്തലുകൾ പ്രസിദ്ധീകരിച്ചിട്ടുണ്ട്. എൻഐടി റൂർക്കലയിലെ ലൈഫ് സയൻസസ് വകുപ്പിലെ അസോസിയേറ്റ് പ്രൊഫസർ ബിജേഷ് കുമാർ ബിസ്വാൾ രചിച്ച ഗവേഷണ പ്രബന്ധത്തിൽ തിപ്പലിയിൽ നിന്ന് ഉരുത്തിരിഞ്ഞ ഈ പ്രകൃതിദത്ത സംയുക്തം കാൻസർ വിരുദ്ധ ശേഷി കാണിക്കുന്നുണ്ടെന്നും പാർശ്വഫലങ്ങൾ വളരെ കുറവാണെന്നും പറയുന്നു.
കൂടാതെ ഇത് കാൻസറിനുള്ള കീമോതെറാപ്പിക്ക് ഒരു ബദൽ ചികിത്സയായി മാറിയേക്കാം. ഗവേഷണത്തിന്റെ അടുത്ത ഘട്ടത്തിൽ ഓക്സാലിപ്ലാറ്റിൻ പോലുള്ള കീമോതെറാപ്പി മരുന്നുകളുമായി ചേർന്ന് പൈപ്പർലോംഗുമിൻ ഉപയോഗിക്കുന്നതിനുള്ള സാധ്യത എൻഐടി സംഘം പരിശോധിക്കുന്നുണ്ട്.
നിലവിൽ, കാൻസർ ചികിത്സാ ഓപ്ഷനുകൾ പരിമിതമാണ് എന്നാൽ ഭാവിയിൽ, പ്രകൃതിദത്ത സംയുക്തങ്ങൾ ഉപയോഗിക്കുന്ന ചികിത്സാ ഓപ്ഷനുകൾ വിപുലീകരിക്കുമെന്നും പഠനത്തിൽ പറയുന്നു. വൻകുടലിലെ കോശങ്ങൾ അനിയന്ത്രിതമായി വളർന്ന് മുഴകൾ രൂപപ്പെടുന്ന ഒരു ജീവന് ഭീഷണിയായ രോഗമാണ് വൻകുടൽ കാൻസർ.
