കൊല്ലം: ശബരിമല സ്വര്ണക്കൊള്ളയില് അറസ്റ്റിലായ മുന് ദേവസ്വം ബോര്ഡ് പ്രസിഡന്റും സിപിഎം നേതാവുമായ എ. പത്മകുമാര് കൊല്ലം വിജിലന്സ് കോടതിയില് ജാമ്യാപേക്ഷ സമര്പ്പിച്ചു. സ്വര്ണക്കൊള്ളയില് തനിക്ക് പങ്കില്ലെന്നും ദേവസ്വം പ്രസിഡന്റ് എന്ന നിലയില് ബോര്ഡിന്റെ തീരുമാനം നടപ്പിലാക്കി എന്നുമാണ് ജാമ്യ ഹര്ജിയില് എ. പത്മകുമാര് പറയുന്നത്. താന് വരുന്നതിനു മുമ്പ് തന്നെ ഉണ്ണികൃഷ്ണന് പോറ്റി ശബരിമലയില് ഉണ്ടായിരുന്നുവെന്നും സൂചിപ്പിക്കുന്നുണ്ട്. ജാമ്യാപേക്ഷ ചൊവ്വാഴ്ച വിജിലന്സ് കോടതി പരിഗണിക്കും.
പത്മകുമാറിനെ രണ്ടുദിവസം എസ്ഐടി വീണ്ടും കസ്റ്റഡിയില് വാങ്ങി ചോദ്യം ചെയ്തിരുന്നു. അതേസമയം ഇരുകേസുകളിലും അറസ്റ്റിലായ മുന് തിരുവാഭരണം കമ്മീഷണര് കെ.എസ്. ബൈജുവിനെ വീണ്ടും റിമാന്ഡ് ചെയ്തു. എസ്ഐടിയുടെ കസ്റ്റഡി അപേക്ഷ പരിഗണിച്ച് ഒരു ദിവസത്തെ ചോദ്യം ചെയ്യലിന് ശേഷമാണ് ഡിസംബര് 11 വരെ റിമാന്ഡ് ചെയ്തത്. ബൈജുവിന്റെ ജാമ്യാപേക്ഷ വിജിലന്സ് കോടതി തള്ളിയിരുന്നു. ഒരു ഉദ്യോഗസ്ഥന് എന്ന നിലയില് കെ.എസ്. ബൈജുവിന്റെ പ്രവര്ത്തനം ദുരൂഹമാണ് എന്നതാണ് കോടതിയുടെ നിരീക്ഷണം. സ്വര്ണ കവര്ച്ചയിലെ മറ്റൊരു പ്രതിയായ മുന് ദേവസ്വം കമ്മീഷണര് എന്. വാസുവിന്റെ ജാമ്യാപേക്ഷയില് ചൊവ്വാഴ്ചയാണ് വിധി പറയുക.
