പത്തനംതിട്ട: ശബരിമല സ്വര്ണക്കൊള്ള കേസില് അറസ്റ്റിലായ സി.പി.എം. പത്തനംതിട്ട ജില്ലാ കമ്മിറ്റി അംഗം എ. പത്മകുമാറിനെതിരായ നടപടി ചൊവ്വാഴ്ച ചേരുന്ന പത്തനംതിട്ട ജില്ലാ സെക്രട്ടേറിയറ്റ് യോഗം തീരുമാനിച്ചേക്കും. സംസ്ഥാന സെക്രട്ടറി എം.വി. ഗോവിന്ദനും യോഗത്തില് പങ്കെടുക്കുന്നുണ്ട്. അറസ്റ്റിലായിട്ടും പത്മകുമാറിനെതിരെ അച്ചടക്കനടപടി എടുക്കാത്തത് പാര്ട്ടി അണികളില് തന്നെ വലിയ പ്രതിഷേധത്തിന് ഇടയാക്കിയ പശ്ചാത്തലത്തിലാണ് യോഗം. നടപടിയുണ്ടായാലും ഇല്ലെങ്കിലും പാര്ട്ടി പ്രതിരോധത്തിലാകുമെന്നതിനാല് വിശദമായ ചര്ച്ച വേണമെന്നാണ് നേതൃത്വം കരുതുന്നത്. തദ്ദേശ തിരഞ്ഞെടുപ്പില് ശബരിമല സ്വര്ണക്കൊള്ള ഉയര്ത്തുന്ന വെല്ലുവിളികള് എങ്ങിനെ നേരിടാനാകുമെന്ന വിലയിരുത്തലും യോഗത്തില് ഉണ്ടാകും. പാര്ട്ടിയില് നിന്ന് ആരൊക്കെ ഇനി അറസ്റ്റിലാവുമെന്ന ആശങ്കയും പത്മകുമാറിനെതിരെ നടപടി വൈകിക്കുന്നതിനു പിന്നിലെ കാരണങ്ങളിലൊന്നാണ്. കോടതിയുടെ മേല്നോട്ടമുള്ളതിനാല് അറസ്റ്റ് ഏതൊക്കെ നേതാക്കളിലേക്കു നീളുമെന്ന് പാര്ട്ടിക്ക് ഇപ്പൊഴും വ്യക്തതയില്ല. പത്തനംതിട്ടയില് തിരഞ്ഞെടുപ്പ് പ്രചാരണത്തിന് വീടുകയറുന്നവര് സ്വര്ണ്ണക്കൊള്ളയെ ന്യായീകരിക്കാനാകാതെ വിഷമിക്കുകയാണ്.
